محمد عبد الماجد انتوا فاضيين لي من (استقالة السوباط)!! اضربوا للجاكومي في تركيا .. ألحقوه قبل ما يرجع (ما يقول ليكم الشبكة كعبة)!! .. قولوا ليه مع (النجيلة) التركية وقلاب الرملة (مشكورا) اغشى معاك (اسطنبول) وامشى على أسواق (شيشيلي إسطنبول) بتلقى شارع اسمه شارع (نيشانتاشي) .. الشارع دا كلو (كيزان) جيبوا ليكم (مدرب) منو للمريخ. النجيلة براها ما بتمرقكم. المريخاب قبل (النجيلة) جابوا ليهم نائب رئيس من تركيا اسمه (اوكتاي شعبان)… الزول دا مفتوح فيه (120) بلاغ. دا عاوزين بيه شنو؟ اوكتاي دا البلاغات المفتوحة فيه سجن الهدي ما بلمها. نحن سمعنا ب (ليبيا فتحت) لكن (تركيا فتحت) دي ما سمعنا بيها إلّا مع المريخ. بعد عبدالكريم النفطي (مهند) مرشح يكون مدير الكورة في المريخ. وعشان ما يغشوكم في تركيا وتجيبوا ليكم (مهند) مضروب زي محترفيكم ، مهند دا اسمو (كيفانش تاتليتوغ). الجاكومي لو ما حفظ الاسم ح يضيعكم. عشان ما تجيبوا لينا (الطاهر حسن التوم) وتعملوا لينا فيها ما عارفين حاجة. اعملوها كلها (اتراك) .. التركي ولا المتورك. احسن ليكم. اصلو الحكاية بايظة. لو ما لقيتو ليكم مدرب في شارع (نيشانتاشي) ادخلو على حديقة (ماتشكا) بتلقوا ليكم (مدرب). اختاروا ليكم مدرب عندو (صلعة) عشان (الخبرة) التى تحدث عنها الدكتور مزمل ابوالقاسم. لازم يكون عندو (صلعة) – الشهادات ما ضروري. ومن هسع … عشان انتوا (ضل) للهلال .. المدرب البتجيبوه يكون عندو فكرة كافية عن (السنجاب). اصلو الموضوع دا عجبكم .. نحن عارفين أي حاجة. عارفين كل شيء. وما في حاجة بتفوت علينا. عشان ما تمشوا تلخبطوا ساكت. وعشان اكون واضح معاكم – احسن الموضوع دا ترفعوه لي (حميدتي). موضوع شنو؟ انا من الصباح بتكلم في شنو؟ موضوع (النزيف) دا – بدأت (تنقط) من كوستي. نقطت في الشتاء!! صبت (حصو) .. عشان كدا قلت ليكم امشوا على حميدتي. الغريبة الخريف انتهى .. وديل مطرتهم لسه شغالة. امشوا واقعدوا مع حميدتي .. قولوا ليه (النجيلة) براها ما بتحل لينا قضيتنا .. خلوه يشوف ليكم حل لموضوع (التنقيط) دا. ولو بدأت تنقط تاني ما بتقيف. موضوع (التنقيط) دا ابوجيبين ما بحلو ليكم. وإقالة المدرب التونسي غازي الغرايري ما بحلوا ليكم. واستقالة السوباط ما بحلو. امشوا عديل لي حميدتي. ما فيها حاجة. قولوا ليه نحن (بتاعين النجيلة). الموضوع دا لو ما ادخل فيه الدعم السريع ما بقيف. النجيلة مع (هزائمكم) دي ما بتقعد ليكم. النجيلة عيشتها تطير. النجيلة لو شافت البعمل فيه (جارجو) دا ما بتجيكم. بتقوم جارية. غايتو ناس صلاح نمر وكرشوم راجياهم (مذاكرة) و(قراية) تقيلة وزلقيب شديد. امتحانات جارجو وليليبو ما بقدروا عليها. زول ما عندو (رياضيات) وما بعرف (لغة روسية) من هسع بننصحوا ما يدخل على (جارجو). ومدافع ما بشرب (اللبن) لمن كان صغير .. احسن ليه يبعد من (ليليبو). ليليبو دا بسوقهم تلاتة تلاتة زي (الكشة). مدافعين الامل التلاتة لغاية الآن نفسهم مقطوع. هم مدافعين الامل براهم .. قالوا ليك صلاح نمر ذاتو داخل في الحسبة. المسكين نفسو مقطوع من المشاهدة. احسن نقول ليكم الكلام بالواضح. عشان ما تعملوا فيها ما فاهمين حاجة. الكلام إلّا يقولوه ليكم كدا زي (الدُراب) عشان يقع ليكم. الليلة مزمل ابوالقاسم بكون لقى ليه موضوع .. انا ما عارف مزمل الليلة كاتب شنو؟ لكن قطع شك بكون كاتب ألم نحذركم من هذا المدرب؟ ألم نطالب بإنهاء التعاقد معه؟ والإسراع مع التعاقد مع مدير فني كبير يمتلك خبرات في البطولات الافريقية قبل انطلاقة مباريات المجموعات. قلنا ليكم. لكن رأسكم زي الحجر ما بتسمعوا الكلام. الليلة مزمل بطلع من موضوع هدف شلش في الهلال .. وبنسى موضوع استقالة السوباط (الما جابت حقها) وبمسك في الكلام القلت ليكم فوق. يقولوا ليكم الكلام الف مرة. المريخ لمن خرج من بطولة كأس السودان .. البطولة التى لا نعلم متى سوف تلعب مباراة النهائي فيها .. مزمل قال : حذرنا مجلس المريخ من مغبة اللعب بدون الدوليين وطالبت من نبيل منير او منير نبيل ما عارف – المهم مزمل طالب من الزول دا ان لا يلعب المريخ امام الاهلي الخرطوم في بطولة كأس السودان والمريخ يفتقد (12) لاعبا مع المنتخب الوطني. المجلس ما سمع كلام الدكتور مزمل .. النتيجة كانت شنو؟ المريخ خرج من بطولة كأس السودان .. المريخ (طار) وحازم شالوه من رئاسة نادي المريخ. زارف مصطفى ذاتو (طار) لا شفع ليه الدولار البدفع فيه للمريخ ولا شفعت ليه (الدموع). غدار (دموعك) ما بتفيد!! والدموع السائلة مني لما سالت حرقتني. دموعي سالت والمنام ابي لي. هسع ابوجيبين دا احسن ليه يشيل المدرب .. زي ما شال مروان السعيدي. الرئيس الرابع جاهز للمريخ. ومستعد من الآن يقعد يزرف ليكم في الدموع. مستعد يزرف اسبوع كامل. قلنا ليكم ح تعيطوا كتير – قعدتوا تغالطوا. ديل يغالطوك في (مروحة) صالونك. سمعت تحت تحت .. ان المريخاب اعترضوا على ادارة المباراة من قبل الحكم خالد يوسف وذلك لأن خالد يوسف من مدينة كوستي .. رغم ان الهلال والمريخ اغلب مبارياتهم في الخرطوم تدار من قبل حكام من الخرطوم. انتوا يا ناس المريخ قايلين ناس الولايات ديل (اجانب)؟.. ديل عندهم في السودان وحقهم فيه اكتر من حق ناس الخرطوم. اكتر حكم ادار للمريخ مباريات في الدوري الممتاز منذ انطلاق المنافسة وحتى الآن هو حكم الخرطوم الفاضل ابوشنب. ابوشنب دا كان من سنار؟ بقت على خالد يوسف. عليكم الله انتوا ما بتخجلوا. انتوا بتلعبوا على منو؟ انتوا ما كنتوا عاملين فيها قلبكم على (الامل) وروحكم في (الفلاح). وين شعاراتكم ؟ وين وقفتكم مع اندية الولايات؟ خالد يوسف منح المريخ (10) دقائق كزمن بدل ضائع .. وكان يمكن ان يمنح المريخ زمن اقل من ذلك .. ما في زول بقدر يقول حاجة في الحتة دي. عاوزين خالد يوسف يمنحكم اكتر من كدا شنو ؟ إلّا يمنحكم (قطعة) ارض في محلية مدينة كوستي او يمنحكم (100) فدان زراعي في ولاية النيل الابيض. خالد يوسف يعمل شنو؟ الهلال في عطبرة احتسبوا عليه ضربتي جزاء … اتنين … الاتنين دقن في القائم. الهلال رجل صالح. والمريخ ضربة جزاء واحدة .. جابتو مغلوب من كوستي. الحكم مفروض يطرد لاعب المريخ احمد بيبو بعد ان ارتكب مخالفة مع مهاجم الرابطة كوستي عمر الكسمبر .. مع ذلك الحكم لم يمنح بيبو حتى (الكرت الاصفر) رغم ان الكسمبر كان في حالة انفراد تام. مزمل طبعا بقول ليهم ما كان في حالة انفراد!! كابتن المريخ رمضان عجب ضرب كابتن الرابطة كوستي الراكز ايمن باشري بالكوع وسبب له (ارتجاج) في المخ …مع ذلك الحكم لم يطرد رمضان عجب ولم يمنحه حتى (الكرت الاصفر). مزمل ح يقول ليهم ما ضربوا بالكوع ضربوا بالنية. ما فيها حاجة. الحكم يعمل شنو؟ الحكم يبقى ليكم (استقالة) للسوباط. والله انا ناس مزمل ديل من طلعوا (اشاعة) استقالة السوباط عرفتها ليكم ح (تنقط). ظاهرة. نحن حقنا ما بروح ساكت. ونحن لحمنا مر. امشوا بعيد من الهلال. الهلال رجل صالح. يقولوا ليكم الكلام الف مرة. وبرضو ما عاوز يقع ليكم. …………… متاريس الليلة في مباريات كتيرة .. الواحد ما عارف يكتب وإلّا يحضر المباريات؟ لكن (النقيط) دا ما بتفات. الكسمبر قدم مباراة كبيرة .. مهاجم يستحق يكون في المنتخب. وايمن باشري فدائي من الدرجة الاولى – مدافع لا يوجد مثيل له في الدوري الممتاز. في نجوم مظلومة. في الفلاح مصباح فيصل مفروض يكون في المنتخب. وفي الشرطة نادر بابكر مفروض يكون في المنتخب. وفي حيدوب صهيب الثعلب بقدم في الابداع كله. وهنالك عدد كبير من اللاعبين يستحقوا ان يكونوا في المنتخب. ………. ترس اخير : قالوا ليك بعد ما نقطت في كوستي .. المنذر احمد الحاج قال ليهم شوفوا لي المريخ لاعب وين المباراة القادمة؟ عشان اعرف ليكم (المطرة) ح تصب وين؟
