محمد عبد الماجد 4/ صفر كل برازيلي بي قون..!! . انا في غربة ، في (ادغال افريقيا) العبارة التي يعترض عليها عبدالمهيمن الامين بعد التقدم الكبير الذي حدث في الدول الافريقية . عبدالمهيمن بقول (الادغال) عندنا نحن ... ادغال دار السلام ادغال الهنا والسرور. . انا اول مرة اشوف لي ادغال الكهرباء مستمرة فيها 24 ساعة. . ما حصل الكهربة قطعت في البلد دي. . ولا بالغلط. . يا ريت لو بلادنا كانت مثل هذه (الادغال). . افريقيا بقت اوروبا. . اوروبا ليس في المنشآت فقط .. اوروبا في النظام والالتزام والسلوك الراقي. . الناس ديل فاهمين شديد. . ونحن لا لمينا في اوروبا ولا لمينا في الادغال. . قطعوا لينا حاجات من رأسهم. . ما عرفنا رأسنا من كرعينا. . الكهربة عندنا في الشتاء بتقطع. . ناس الكهربة عندنا شغالين (قطاعين). . بقطعوا الكهرباء وخلاص. . ما بعرفوا اكتر من كدا. . الواحد بيطلع من بيتهم ويمشي على الشغل عشان يقطع الكهرباء. . ديل قالوا ليك الحافز عندهم بطلع في (القطع). . المهم وأنا في الظروف دي قالوا لي المريخ اتغلب من شباب الاسماعيلي 4 / صفر.. ختيت ايدي في رأسي. . الاساسي بتاع الاسماعيلي تاني الطيش في الدوري المصري. . والمريخ لعب مع عناصر مواليد 2003 و 2002م. . قلت وين الرجل الخارق؟ . ناس مزمل ابوالقاسم يشكّروا في ابوجيبين تقول عندو (99) جيب. . انا برالمة زي ديل عمري ما شفت. . يعسكروا في البرد دي في مصر ويلعبوا مع (شفع) الاسماعيلي ويخوضوا غمار البطولة الافريقية في بنغازي. . ديل كلمة (برالمة) كتير عليهم. . ديل ناس (التمهيدي). . ناس (الحضانة). . من يسمعهم يتحدثوا عن المؤسسية وما فعله ايمن المبارك في الفترة التى اصبح فيها رئيسا للمريخ .. يتخيل ناس المريخ سوف يلعبوا في استادهم. . غايتو انا الفترة الفاتت كنت بسمع. . بسمع فقط. . عاوز اشوف فهمهم شنو؟ . رجعّوا امير كمال ما قلت شيء. . سجلوا يوسف فداسي سكت ساي. . جابوا ليهم (4) برازيليين كتلتها في قلبي. . ح يلعبوا في بنغازي .. عملت نفسي ما عارف حاجة. . اتعادلوا مع (اختبارات) انبي ..قلت عادي .. مستواهم كدا. . يتغلبوا كمان من الاسماعيلي 4 / صفر !!… دي والله لا بسكت عليها ولا حاجة. . ولا بقدر. . كفاية مسخرة فارغة. . لو كنت في الصين موضوع زي دا ما بسكت. . 4 / صفر. . و(4) برازيليين!! . هي الدنيا طارت؟ . الدنيا حصل فيها شنو؟ . دي زي حكاية عادل امام في مسرحية (شاهد ما شافش حاجة) لمن قال للحاجب عندك سبعة عيال وبتأخد سبعة جنيه في الشهر!! . المريخ عندو (4) برازيليين وبيأخد (4) في المباراة. . نفس الشيء. . ما في أي اختلاف. . نفس المنطق. . عشان الموضوع يبقى ليكم واضح .. الحوار في المسرحية كان على هذا النحو : . انت بتأخد كم في الشهر؟ . سبعة جنيه . عندك أولاد؟ . اه عندي سبعة . في الشهر؟ . !!! . – اه سبع أولاد .. . وأمك موجودة؟ . اه موجودة وقاعدة معايا . حماتك موجودة؟ . أهي دي الأخرى قاعدة معايا في نفس الأوضة . كلكم قاعدين في أوضة واحدة؟ . اه . سايبين الشقة كلها وقاعدين في أوضة واحدة؟ . هي أوضة يا سيد . اه انت شقتك أوضة … انت وأمك ومراتك وحماتك وسبع عيال؟ . اه . وبتاخد سبعة جنيه ؟! ……. اتكل على الله واشتغل رقاصة يالللا. . هسع ناس المريخ بقت عليهم نفس الحكاية. . 4 برازيليين وبتهزموا 4. . في الشهر!! . لا في المباراة. . فضيحة السوّاد. . انتوا البرازيليين ديل جبتوهم من السوق الشعبي بتاع ريو دي جانيرو. . الشغل دا ما شغل السوق الشعبي. . الشغل دا شغل دلالة الجمعة عديل كدا. . عليكم الله انا الجماعة ديل في الغربة دي فاضي لبهم . . هسع ديل يتصرفوا معاهم كيف؟ . هزيمة المريخ خلتني اغيّر العمود واستبدله في الادغال دي. . والله دي اربعة لا بتتفات ولا حاجة. . انتوا المعسكر وين؟ . في مصر !! . المباراة انتهت كم ؟ . اربعة!! ندعوك بالأربعة والكتب الأربعة والسور المائة والعشرة وأربعة بالملائكة الستة والكرماء الأربعة بنبينا محمد والخلفاء الأربعة والستة البَعدهُم والأئمة الأربعة والفقهاء السبعة وأقطابنا الأربعة أوتاد الأرض في القِبَل الأربعة الإبدال والنقباء العشرة في أربعة أحفظ جوارحي الثلاثة وأربعة وتجافي المضجع جُنُوبنا الأربعة زيل مرض الجسم في طبايعه الأربعة بارك إسبُوعنا ليوم الأربعاء أيام السنة التسعين في أربعة وبُحُورنا السبعة وأنهارنا الأربعة نسلَم من أربعة وُنحشر مع أربعة يا صاحِ هِمَّنا لزيارة اُمنا مصر المؤمّنا بأهل الله . الاربعة بقت على المريخ في مصر. . قلنا ليكم زمان ناس المريخ ما بعرفوا يلعبوا في (البرد). . وقت تجيب ليها (برد) الكورة بتطير من رأسهم. . في تونس امام الترجي ما عارف ح يعملوا شنو؟ . الوضع بقى صعب. وهزيمة المريخ في مصر بالاربعة هم قالوا زعيم شائل اربعة في الصيف او في الشتاء برجع بي اربعة صلاح نمر والرشيد والبرازيليين الاربعة ومزمل الكورال والاهداف الاربعة في الشوط الاول اتنين في التاني بقت اربعة . يا ربي الرجل الخارق هسع بفكر في شنو؟ . اكيد بفكر يجيب البرازيلي الخامس. . الزول دا قالوا ليه السيستم قفل. . كلموه. . اشرحوا ليه الحكاية. . ابوجيبين اصلا بكون ما عارف حاجة. . ركزوا في اربعة. . انتوا عارفين هزيمة المريخ بالأربعة دي مازدا في عز مجدو ما عملها. . مازدا وقف في تلاتة .. انتوا عملتوها اربعة. . أي حاجة زادت في البلد يعني بقت على المريخ. . بعدين اربعة مع ارتفاع الدولار في مصر بتعادل اتنين بالقديم.. . غايتو نحن في دار السلام امورنا ظابطة .. برازيلي واحد ما معانا. . امس وصل المحترف الغاني. . قبلو وصل المحترف المالي. . ومع البعثة لاعب غامبي ولاعب ملاوي ولاعب نيجيري ولاعب كنغولي. . والليلة ح يصل لاعب كنغولي. . وبعد يوم 3 فبرائر ح يصل لاعب سنغالي. . ما شاءالله عليهم. . الادغال دا عاوزين تلعبوا فيها بي اربعة برازيليين اعمارهم اكتر من 120 سنة. . تجربة نجاد البوسني تعاد من جديد .. لكن بفكرة برازيلية. . ريكاردو ما بقعد كتير مع الاربعات دي. . غايتو انا عشان اكون واضح .. الاربعة برازيليين ديل تاني ما فكهم. . ولا بجامل فيهم. . الله يستر على الفلاح. . خايف على الفلاح عطبرة من الهبوط. . الفلاح عطبرة سجل ليه (3) محترفين برازيليين. . وما في حد احسن من حد. . شوفوا ليكم مخرج. . انتوا عارفين ناس الهلال رفضوا المريخ يلعب في استادهم ليه؟ . عشان البرازيليين ديل. . ناس الهلال قالوا الاضاءة بتاعة الاستاد كعبة .. وجماعتكم ديل من خمسة الروية بتبقى ليهم طشاش. . يعني الهلال رفض للمريخ من اجل مصلحة المريخ. . ………………. متاريس . الهلال يوم 5 فبرائر سوف يلعب امام سيمبا النادي الكبير. . ويوم 31 يناير لعب الهلال امام عزام النادي ذو الامكانيات الكبيرة. . أي حاجة في دار السلام عندها علاقة بي عزام. . المريخ مباراته القادمة قالوا مع حرس الحدود. . حرس الحدود ح يلعب بالشباب ولاّ الناشئين؟ . الواحد بيسأل. . عاوزين نعرف الاربعة القادمة متين. . ربنا يحفظ الهلال. . ويديم الفرح والانتصارات. . قولوا يا رب. . بكرة نرجع نتكلم عن المحترفين. . …. . ترس اخير : احسن نقفل على كدا.. قبل ما تحصل حاجة جديدة وتاني نغيّر العمود.
