بابكر سلك تكتيك ثم تيكا تاكا *نصر نستحقه *نصر كان لابد منه *نشكر الله عليه *ثم نشكر القائمين عليه *والجهاز الفني والإداري *ونرفع القبعات للاعبين فردا فردا *اداء المريخ في تطور ملحوظ *بالمزيد من الانضباط والعمل الجاد والطموح والإصرار *ومن قبل ذلك كله نظافة القلوب *أكيد حا نشاهد المريخ وهو يتأهل متبخترا من هذه المجموعة *ارتفاع في الانضباط التكتيكي *وان كان هناك ضعف هجومي *إلا أن العافية درجات *تكتيك ثم تيكا تاكا وتتأهل يا مريخ براكا *ما دايرين ذاتو زول يتأهل معانا *شكرا ريكاردو *والشكر أجزله للجالية السودانية التي ساندت بقوة وكانت زاد النصر العريض *نشكر ليبيا الثورة *وأرض ليبيا الطاهرة التي ساندتنا *فحق الجوار وطيب المعشر جعلانا نردد وبثقة ونحن نشير لأرض ليبيا *هذه الأرض لنا *إنه المريخ العالمي *كل العالم أرضه *وكل الشعوب شعبه *ويا ليت أهلي في المريخ يعرفوا *أن المريخ لا يهزمه إلا المريخ *بالتناحر وإشعال الخلاف وتوطين الاختلاف وعدم الاعتراف بالآخر *ها هي القلوب شبه متوحدة *فبدأ العد التصاعدي *خلونا مع الكيان *مع الكيان تحت شعار *لا وصي علينا فكلنا يحمل الرقم الوطني المريخي دون تجنس *شكرا لكل من ساهم في هذا النصر الكبير *أيها الناس *في موضة انتقاد لاعبين بدأت تسري بين الناس بالميديا *وانتقاد للجهاز الفني *والحاجات الزي دي ممكن نقبلها من مختص *لكن كده ساي *ده ببقى موضوع انطباعي مضر *المهم *أمس منو الكان كعب؟؟؟ *طيب حكمنا عليهو كعب كيف ونحن ما عارفين المهمة التي أوكلها إليه المدرب شنو *ممكن المشجع يشوف لاعب كعب جدا *والمدرب يكون شايفو عشرة على عشرة من واقع تنفيذ ما أوكل إليه *عشان كده الأحكام الفنية دي خلوها لي ناسها *نعود لنشكر كل من أسهم في النصر ولو بقلبه أضعف الإيمان *فالأمنيات الطيبة تنفع وتدعم وتفيد بصفاء النوايا *شكرا لله *المهم *ما حدث من المجلس مع قطاع المراحل السنية أمر مستغرب *ولأنو ده ما وكتو حا نأجل الحديث عنو *لكن لأن الموضوع هام *لابد من العودة له *أيها الناس *إن تنصروا الله ينصركم *أها *نجي لي شمارات والي الخرتوم *كان شفت يا والينا *مريخنا زينة في زينة *غلبنا في ليبيا وكل الأراضي أراضينا سلك كهربا ننساك كيف والكلب قال اتخيلوا إيداهور لو لاعب أمس وإلى لقاء.
