جاء في تفاصيل الاعترافات التي أدلى بها المتهمون في المحاولة (التخريقلابية) الأخيرة التي تم نشرها مؤخراً بالصحف مشاركة (فكي) ليقوم بأعمال الدجل والشعوذة، حيث أقرَّ (الفكي) بأن ضابطاً برتبة اللواء لجأ إليه للقيام بعمل يمنع تحركات قيادات متنفذة في الحكومة وجهاز الأمن وذكر (الفكي) في إفاداته أنه طلب من المتهمين إحضار (دجاجة) ، وعندما جاء بها أحدهم في (ضهرية) عربته وجدها (ميتة) . وعند سؤال الفكي ضمن التحريات عن سبب عدم تبليغه السلطات بالمحاولة، قال إنه رأى في المنام فشلها ولذلك آثر عدم التبليغ .. ترى لماذا ماتت الدجاجة ؟ * ميكانيكي : شوف يا معلم الجدادة دي ختوها في ضهرية العربية والعربية الظاهر المساعدين الوراء بتاعنها خفاف ومع الحفر والمطبات الجدادة ما اتحملت ولحقت أمات طه . * جزار : هو ذاتو ده إنقلاب وللا (دقة ظار) جدادة شنو كانوا يكلموني كنتا جبت ليهم خروف عمبلوك لو ختوهو في الفرن ما يموت مش ضهرية عربية. * معالج بالأعشاب : مفروض كان قبل ما يدخلوها ضهرية العربية يدوها شوية من بذر الكتان ويخلطوا معاها فنجان محريب وشوية حبة سوداء عشان المشروب ده بيعالج السخانة والكتمة بتاعت الضهرية. * حماية المستهلك : نحن دائماً ننبه المواطنين إلى ضرورة التأكد من صلاحية المنتج والحفظ والتخزين السليم له ومن الواضح أن هذه الدجاجة لم تحفظ في درجة حرارة مناسبة مما أدى إلى نفوقها. * طبيب بيطري : القصة ما عاوزة ليها أي نقاش الدجاجة دي ماتت بي أبوفرار (السحائي يعني) .. خاتينها في ضهرية العربية في الشمس الحارة دي ولافين بيها لحدت ما حصل ليها الحصل ليها. * رئيس تحرير : لو ماتت ما تموت الأهم من ده كولو المانشيت : (دجاجة تقرر مصير أمة) ! * خضرجي : كان لازم تموت .. الجدادة دي تكون ماتت بالأنيمياء .. الجداد زمان أيام الدنيا بي خيرا كان بيدوهو في البيوت باقي الرجلة وباقي الخدرة هسه البيوت بقت ناشفة وما فيها حاجة يرموها للجداد. * تاجر إسبيرات : شوف يا معلم واضح جداً إنو الجدادة دي ما (أصلية) وتجارية ساكت .. لانو لو أصلية كانت اتحملت السخانة وكده .. السوق كلو بقى مضروب . * عالم نفسي : ليس الأمر هو في موت الدجاجة بل في رد الفعل النفسي والحالة العصبية للشخص الذي قام بفتح الضهرية ووجدها ميتة. * إداري فريق قمة : غايتو أنحنا الفكي لمن يقول لينا جيبو جدادة وللا ديك قاعدين نوديهو ليهو بي (ركشة) عشان جنس الحاجات دي. * سمسار عربات : كان يكلموني والله وعلى بالطلاق بالتلاتة كنتا جبتا ليهم جدادة (كرت) موديل السنة وكمان (فل أوبشن) بدل البتكتلا السخانة دي. * مفتي : لقد قدر الله سبحانه وتعالي أن تموت هذه الدجاجة قبل ذبحها لأنها كانت ستقدم قرباناً للشيطان وفي هذا إثم وشرك عظيم. * عجلاتي : شوف يا اسطى السخانة دي مش تكتل ليها جدادة دي ترخي (الجنزير) وتفتل (الميزان) ذاااتو لو ما نفست اللساتك. * مهندس كمبيوتر : 2 مروحة (بروسيسور) في الضهرية وكانت المشكلة اتحلت و الجدادة كان وصلت (للفكي). * شرطي مرور : والله أنا بفتكر القصة كووولها من (كترة الأستوبات) الجدادة دي مما إشتروها من السوق وختوها في الضهرية يكونوا وقفوا بيها في ستمية إستوب لحدت ما السخانة قرضتا . * كاتب رياضي : والله نحنا بنعرف (حمام ميت) لكن جداد ميت دي ما أدونا ليها . * سياسي معارض : عرفنا الجماعة ديل ما بيعرفو يختو الرجل المناسب في المكان المناسب كمان (الجداد المناسب ) في المكان المناسب ما بعرفو يختوهو؟ * كسرة (إعلان مكيفات) : الكاميرا في سوق الدجاج .. مواطن يشتري من بائع الدجاج (دجاجة) يفتح ضهرية العربة ويضعها ثم يحكم إغلاقها وينطلق .. يصل إلى منزله .. يترجل من العربة ويفتح الضهرية .. يمسك بإحدى يديه بالدجاجة ويرفعها في الهواء وهي تصيح وباليد الأخرى مروحة وهو يقول : - إنها ما زالت حية لأنها كانت تستمتع بهواء مراوح (...) .. مراوح (...) تقوم بتلطيف الجو حتى لو كان في سخونة هذه الضهرية ! كسرة ثابتة : أخبار ملف خط هيثرو العند النائب العام شن(12+1)و؟ ..... شكلها حلو مش كدة؟