? سمعنا والعهدة على الراوي.. ان الفنان الشاب صاحب الاستايل «الغربي» ولا «الخليجي» ما معروف.. ذهب «بقدميه» للفنان الكبير محمد وردي ليسمع رأيه بصراحة في ادائه.. ? المهم .. وردي بعد استمع الى نموذج من اغنية سودانية وأخر «خليجي».. نظر الى الشاب ملياً ثم قال له (ناصحاً).. (يا زول خليك في (خليجيك) دا).. ? وبالرغم من الشكوك التي تدور حول القصة الا أن الفنان يعاني من (نفسيات) حادة هذه الايام.. ? تستاهل.. إنت ما سمعت بي وردي ولا شنو؟؟ ? يا أهل المصنفات.. يا إتحاد المهن الموسيقية.. يا فنانين يا كبار.. يا ابو (مروّه) انقذونا من فنانات (الجملة) اللائي إستبحن عرض ذوقنا.. وصرن ينتشرن كفيروس (البتاع) داك.. ? اغنيات مبتذلة.. اسماء عجيبة.. تبرج.. ورقيص و.. ? وحاجات تانية حامية القلم الكتابة.. ? يا ناس .. انقذونا قبل ان يتعفن الذوق العام وتفوح رائحته في الخارج.. ونفقد بذلك حتى بصيص الأمل في خروج أغنيتنا السودانية للعالم.. ? في تصريح خطير أعلن الفنان محمد ميرغني مقاطعته للصحافة بسبب المشاكل التي تعرض لها بعد ابداء رأيه الصريح في الكثير من قضايا الفن.. ? لا نتفق مع «ميرغني» في ذلك لان الساكت عن الحق شيطان أخرس.. ? وتكفينا الشياطين الخرساء التي تزخر بها الساحة الفنية.. ? يا «.......» يا ليلة ليلك جنا.. وخلى الزول يزوغ بالعداد بتاع حفلة الحنة!! ? ايمان لندن إشترت قميص عمر بخيت لاعب الهلال ب «5» آلاف جنيه بعد منافسة شرسة من فاطمة الجعلي بالمزاد الذي شهدته الرياضية.. ? إنتن وقت «قروشكن» دي «كتيرة» دار المايقوما دي ما قريبة.. ? ولا عشان هناك ما في «أضواء».. ? يا فنانين.. ندعوكم جميعاً لزيارة المايقوما واطفالها.. فعلى حسب علمي أن الفنان «إحساس».. ? ولا يكون «الاحساس» ذاتو لحق أمات طه.. ورجع «ورا ورا»؟؟ ? شايف رحلات نيجيريا وقفت !! ? قالو الرحلة الجاية يا الكاميرون.. يا السنغال!! ? اموت .. واعرف الزول دا البسمع ليهو منو؟؟ ? لا شغال حفلة.. ولا بنسمع شرايطو في سوق «الله اكبر دا».. ولا عندو أعمال خاصة.. وبعد دا كلما يعملوا معاهو حوار يقول ليك: (لدي مجموعة من الاعمال الخاصة في الطريق).. ? يا زول والله لو كتب ليك «ابو نواس» ذاتو ما في زول حيسمعك.. ? بالله دا كلام دا؟؟