مش ممكن ، مش معقول اللي بيحصل في المريخ ده ، وعلشان ماحدش يزعل ويفسر جرس الإنذار أو ناقوس الخطر اللي مفروض أهل المريخ ياخدو بالهم منه ومن المرمطة والبهدلة اللي بتحصل في النادي وخربت البيت ، وسابته زي الشارع مافيش حد عارف إيه اللي داخل واللي خارج منه ، ومافيش حد عارف وضع مين إيه في المريخ ، تعالوا معايا نقرأ الخبر اللي نشرته أمبارح الزميلة ( الصدي) في صفحتها الأولي ( أثار عصام الحضري أزمة عقب وصوله إلي لواندا ورفض التوجه إلى مدينة كالولو واستقر بالسفارة المصرية في العاصمة الأنغولية لواندا احتجاجا على سوء الترتيبات الإدارية المتعلقة بسفره إلى كالولو وقال الحضري إنه أضطر إلى الانتظار لأكثر من ست ساعات في مطار لواندا عقب وصوله برحلة مرهقة من القاهرة امتدت لساعات طويلة وكان يتوقع أن توفر له إدارة البعثة حجزا مريحا إلى كالولو لكنه فوجيء بالتأخير المرهق ، وأعلن أنه لن يلحق بالبعثة ، وتم تكليف مدير الكرة محمد موسى والزميل عبدالباقي شيخ إدريس بالبقاء مع الحضري الذي يتوقع أن يلحق بالبعثة عن طريق البر صباح اليوم ) انتهى .. وماجبتش حاجة من عندي الخبر إتنشر في صحيفة محترمة ومحسوبة في نفس الوقت على المريخ ، يعني حتى من مدينة لمدينة في دولة أنغولا ، الحضري باشا بيحتج وبيرفض السفر وبيفرض عقوبة على البعثة الإدارية لأنها ماراعتش قد إيه هو (تعباااااان) ومش قادر يوقف على طوله ، ليه؟ لأنه ياولداه مسافر ساعات طيران من القاهرة ومش حا يقدر ينتظر كمان ست ساعات في المطار لغاية ماتخلص الإجراءات . ومش كده وبس الأخطر من ده إنه راح واستقر في السفارة المصرية ، وإحنا عارفين معناه إيه لما يلجأ مواطن لسفارة بلده في الخارج ، دي إهانة للسودان والسودانيين لو عملها ولجأ لسفارة بلده في السودان ، مابالك وهو في بلد تانية وبيمثل فريق سوداني يبقي إيه؟ إهانة لاتغتفر . النكتة البايخة أوي أوي أوي بقى ، إني وقبل ما أكمل خبر (الصدى) ، جاني خبر شايلو النسيم بيقول إن الحضري باشا سافر (باللوفتهانزا) ، على فين؟ على مصر ، ومين اللي سفره ؟ سفارة بلده في إنغولا ، طيب ومباراة اليوم مين اللي حايلعبها ؟ أكرم موجود ، طيب إذا المريخ إتهزم مين ح يكون المسؤول؟ أكيد مش الحضري وغالبا أكرم ح يكون السبب ، وممكن نقول الكوكي أصلا مغضوب عليه ، أو محمد موسي وعبدالباقي لأنهم ماخدوش من الحضري جواز سفره ، إيه يابيه مالك في إيه ليه بتسأل أسئلة مش هي ، ماإنت عارف وأنا عارف إن الحضري غلطاته عندنا مغفورة ، إنت نسيت ؟ خليك مصحصح معايا . مش الحضري اللي يتحاسب ، إحنا اللي نضرب بالجزمة وجزمة قديمة كمان ، إحنا اللي ناخد على قفانا ، إحنا اللي يتمسح بينا البلاط ، إحنا اللي نتبهدل ونتمرمط ونترمي في الزبالة ، عارف ليه لأننا عند سي الباشا الحضري زباااااااااالة ، سعادة الباشا اللي إتمرمط وافترش أرض المطارات الأفريقية مع ناديه السابق الأهلي والمنتخب عشرات المرات ، واللي هاجمت صحافة بلده المعاملة السيئة والحرب النفسية اللي بتتعرض لها في القارة ، ماكانش يقدر يفتح (بقه) بكلمة يلعب حتى لو على نقالة ، ولا يقدر حتى يفكر مجرد تفكير يسيب البعثة ويرجع لأنه مرهق ولا تعبااااان ، ده الراجل كان بيتلطع في مطارات القارة السمراء إطناشر وتلطاشر ساعة وبعد مايصل يتدرب ويلعب زيو وزي أي لاعب . طب إيه اللي حصل وبدله بالشكل ده ، هو ماإتبدلش هو أصلا كده بس الفرق عندهم إدارات بتحترم نفسها ، وفي المريخ إدارة بتهين نفسها . وتحت أمرك ياباشا أي خدمة غلطاتك عندنا مغفورة ، عايز أضحك أكتبها كيف؟
