ماسمعتش ياعصام ؟ سمعت ، سمعت إن فيه واحد اسمو إيه ؟ الطاهر هواري اشتكاني أو ح يشتكيني في الجرائم الموجهة ضد الدولة ، طب وح تقدر تنزل السودان بعد اللي حصل ده ؟ آه ح أنزل ، ما أنتش خايف ؟ من إيه؟ يتقبض عليك؟ وأخاف من إيه هو أنا قلت إيه ، ده هم مفروض يشكروني ، على إيه ، ياعم ده أنا كل كلمة قلتها كانت دفاع عن الدكتور جمال الوالي ، وإنت مالك ، مالي إزاي ده جمال ياابني جماااااال عارف يعني إيه جمال ؟ أعرف بس مالكش حق تدخل بينهم هم سودانيين في بعض وإداريين في بعض ، لا لا لا ماتغلطتش أنا برضك سوداني ، عايز أثبت لك أوريلك الجنسية ، جنسية سودانية مية المية ، ألا صحيح يا حضري هي الجنسية السودانية ح تكون معاك لحدي إمتى ؟ مااعرفش ماحدش قالي حاجة ، ومافيش حد ح يقولي حاجة طالما جمال موجود . طب هو إزاي الطاهر هواري والاقطاب اللي يفتحوا فيك بلاغ جرائم موجهة ضد الدولة ، وإنت بتدافع عن جمال فين الدولة ؟ إساله هو بيقول ان أنا أهنت السودان ، إزاي أهين السودان وأنا مبسوط من جمال هو الدكتور جمال مش سوداني . قولي إيه الغلط لما قلت ( عصام الحاج حاقد ويسيء للوالي لكي يشتهر) فين الغلط؟ وده مش غلط؟ ده مش غلط ؟ لا مش غلط ، ثم مين عصام الحاج ده علشان يتكلم عن الدكتور جمال على سن ورمح ؟ إنت عارف هم زعلانين ليه ؟ ليه ياعصام ؟ لأني قلت في البيان بتاعي اللي قلب الدنيا في السودان الآتي : ( أنا مثلا لم أعرف من هو عصام الحاج أو أسمع باسمه إلا عندما بدأ إختلاق المشاكل والتفرغ للتصريحات الإعلامية بدلا من حل المشاكل التي لم نسمع بها الا في وجوده) ، ودي شوية يا حضري في حد محترم يقول كده ، بعدين عصام الحاج ماهواش محتاج لشهادة منك عشان تعرفوا ولا ماتعرفوش ، ده شغلتو إداري وانت شغلتك لاعب ، هو إنت كنت بتعرف حسن حمدي ولا الخطيب وقبليهم صالح سليم ، كنت تقدر تهوب ناحيتهم ، او حتى تخاطبهم ، ده انت كنت لاعب زيك وزي اي لاعب ليك حقوق وعليك واجبات ، وفي النهاية هربت ، مش فاكر إزاي هربت وإيه اللي حصلك من الاهلي وإزاي طاردوك بالقانون لغاية ماخدوا حقهم منك على داير مليم وإنت بتعيط وكل الدنيا شافتك وإنت بتعيط على الفضائيات علشان يسامحوك ، ولاعبروك ولا كأنك موجود ، ده انت عندهم مش ح تقدر تعتب عتبة النادي للأبد ، لغاية ماجيت ولقيت سي جمال او الدكتور جمال هو اللي دفع لك الغرامة ، وخدك على كفوف الراحة وخت فلوس عمرك كله وانت بتلعب كورة ماخدتش ربعها ، والتمن إيه ؟ أهو انت جبت التايهة ، مش لي حق أدافع عنه ، ده حبيبي ،ده يتحط على الجرح يطيب على طول ، وانا خت إيه من عصام الحاج ؟ إنت عايز تاخد إيه أكتر من اللي خدته ، وليهم حق رئيس لجنة التسيير وسكرتير لجنة التسيير ولجنة التسيير كلها ، إنهم يغمزوا لك على طريقة (اسكت يا ولد) ويقولو لك ( اسكت يا حضري .. عيب كده .. مايصحش ) ، ويتنمروا ، ويستعدوا لمواجهة أي حد يقرب منك يا حضري ، ويتهموا الطاهر هواري بإستهدافك ويعتبروه واجبهم بالدفاع عن لاعبهم ، هو إنت عملت حاجة؟ ده انت كنت بتدافع عن جمال . يبقى برافو عليك مع تحية جامدة مش معلنة ، وأسكت يا ولد أقصد أسكت يا حضري عيب كده يا حضري قدام الناس . غدا اكتب عن موقف الطاهر هواري وآخر الرجال المحترمين .. لو كان في العمر بقية.
