غافل كفنك د. عزالدين هلالي أحَّيْ أحَّيْ أحَّيْ وأحَّيْ أحَّيَّ عليهو الموت الدخل اللحم الحيْ نادر ! معقول !؟ معقول نادر !؟ الفي الأفراح ديمة ببادر يصدح مرتاح يسقينا الحزن دا كلوُّ كدا !؟ أتراح أتراح نادر ! معقول ؟ البسمتو كانت في لسانو من قبل يقول الضحكتو كانت عنوانو الحكمتو كانت ميزانو نادر ! معقول ؟ مهلك يا موت هدفك نادر برَّاحة شويْ اتجرع مُرَّ الدنيا كؤوس أنا كان من موتك أرحم ليْ نادر ! مهلك برّاحة شويْ شايل أهلك كيفن تهلك !؟ نادر مهلك برّاحة شويْ تاوق بي فوق بي فوق للموت غافل كفنك شوف السودان بيحبك كيف بيحبك موت أولاد وبنات نسوان ورجال حيشان وبيوت جايين دافرين أجناس أجناس حاكم ومرؤوس جايين دافرين كايسين الناس الماتوا جماعة ومتماسكين يا نادر ما هذا الاخلاص !؟ لو حتى الموت اخترت تموتو مع العازفين ! مابتستفرد بي حاجة براك دايماً لامين حتى وفي الموت بتموتوا جماعة وملمومين يا نادر ما هذا الاخلاص؟ مهلك نادر يا سيد الناس يا تاج الراس برَّاحة شويْ تاوق بي فوق بي فوق للموت غافل كفنك شوف الأيتام الكنت أبوهم والأرحام مالين الشارع راجنَّك حفلات الخير راجياك لسّه والمحرومين منتظرنّك يا الكنت ملاذم والأحلام يا الكنت دوام جادع قدام غافل كفنك تاوق بي فوق بي فوق للموت شوف السودان بيحبك كيف وأرجع واصل مشوار الموت يا نادر في الأخلاق والصوت يا الكنت دوام سابق زمنك