بسم الله الرحمن الرحيم في السلك جرسه شديده والله شايل الاسم سااااي يا حسن يوسف مسمينك سيد جرسه وسيد الجرسه الاصلي بقولوا عليهو سيد البلد خت سيد بره القوس معقوله البلد تساوي الجرسه ! طبعا لأ رجع جرسه جوه القوس اقسم الناتج علي الوطن البلد علي الوطن فيها الواحد واحد في سيد يساوي سيد زايد جرسه في واحد تساوي جرسه اذن الجواب سيد جرسه وهو المطلوب جزء يقول التحكيم وجزء يقول الاصابات طبعا ناس الاصابات ديل هم الاجبروا ابو الهل علي الانسحاب وعدم مباراه الرد بداعي الاصابه يحكموها اجانب يحكموها ارانب المباراه قائمه قائمه تتموها تزوغوا بدري بدري الكوره لاعبه تتلعب بي حكم بدون حكم لاعبين لاعبين تتذكروا لخويه موش طرتوا الحكم وجبتوا عماد خوجلي يحكمها ؟ جيبوهوا تاني بالمناسبه الجماعه ديل زمان لما كورتنا ضدهم تقرب ولقناعتهم بفارق المهارات الكبير بيننا كانوا قبل شهر من الكوره بكتبوا حاجات معينه كرة القدم لعبة رجال لابد من العنف فيها يلا ياصالح سنار يا قوي لاحظتوا ماقالوا يا لعاب او يا حريف قالوا ياقوي تحريش علي اللعب الغير نظيف كيتا علي الفيفا يحرشوا احمد النور يبيحوا كل اعمال العنف الغير مشروع من اجل ايقاف العجب والطرب والمريخ الجميل الايام دي مع مرض ام سادومبا ده اقتنعوا بانو قدره علي الشلوت مافي قبلوا علي التحكيم وقالوا لعيبتهم مصابين ديل طبعا ناس اعذار الهزيمه المتوقعه والواقعه باذن الله لكن في حقيقه وارقو دور تم دور واتدور ارجاهو يا مرحله من مراحل بدر التمام عشان تديهو التمام ووراقو ( مابندق ) زي ( ود الدوم ) تعضيهو يكسر سنونك تضوقوا مر تخليهو يفلقك بمناسبة وارقو كاريكا جاب قون ؟ طيب نحن موافقين علي حكام اجانب بشرط يكونوا هجين اتوا موافقين علي الهجين ؟ قالوا يوسف محمد في الفندق قاعد يسمع في اغنية وقبضت الريح يا يوسف يا ود محمد طالما ارتضيت تسجل بالموبايل راجع الرصيد في التلفون يمكن حقك حولوهوا ليك رصيد او اسأل مجدي القابلك في الفيس بوك بجنوب افريقيا يمكن حولوا ليك قروشك بعنوانو وهو ماعارف يايوسف انت طرف يمين محترم (برغم ان موسي الزومه مامديك اعتبار ) لكن ما بنقبل ليك الجماعه ديل يعاملوك معاملة الطرف الشمال ( ودالحله , امولادي , امادو ) اختاروا التحكيم والتنجيم البريحكم وتعالوا جيبوا التيم اها كنا بنتونس عن كأس العالم واحد قال لي الدوريات في العالم كلها انتهت الا نحن قلت ليهو نحن زاتنا بننتهي , لكل اجل كتاب قال لي الناس في العالم كلها اتفرغت لتشاهد كاس العالم قلت ليهو ويعني شنو , نحن زاتنا بتفرج معاهم قال لي هم فاضيين دوريهم انتهي لكن نحن قلت ليهو نحن مالنا ؟ قال لي لو في كورة هلال الجبال ضد الميرغني كسلا وفي نفس اليوم والتوقيت في كوره البرازيل والمانيا نحضر ياته ؟ قلت ليهو انت برازيلي ولا الماني ؟ تحضر كورة بلدك وتخليك سوداني شداد داير كده قال لي الناس راجيه تفنيش شداد , وشداد كايس تجديد الاقامه قلت ليهو لو يتعاقد باليوميه قاااااااااااااااااااااااااااااااااااعد في نفس الكوره البطلع منها مع كل شوته قال لي قاعد لي متين ؟ قلت ليهو لمن تنتهي الاسبوعين القالهم صلاح ادريس كان حكمها حاكم الولايه النيجيري (بتاع الحفلات ) انتوا مغلوبين سلك كهربا ننساك كيف وكنا دايرنك يوم عشره ! والي لقاء سلك babikir maki [[email protected]]
