بسم الله الرحمن الرحيم في السلك • طريقة لعب جديده ومبتكره • شفناها امس • اتي بها ميشو الشاطر من بنات افكاره • الله يسألكم • شفتوا ليكم فريق بلعب بي اتنين باك يمين • واتنين باك شمال • وثيردباكين • وتلاته مساكين ؟ • حارس مرمي • وواحد قاعد سااااااي • جمب دفاع العدو • شفتوا ليكم طريقه زي دي ؟ • دي احسن طريقه لحماية الشباك • وعلي الرغم من ذلك • اهدر العدو اقوان مطر • في الشوط التاني بس • اتنين رأسيه • وضربة جزاء ماشافه الحكم • وتهديفه قالشه من رقم 21 • وانفراده • ياخ الانفراده الاتلعب باصها بين رجلين مساوي • الانفراده الضيعها بتاع الصفاقسي في الشوط التاني • الكان دخلت كان قرينا انها تسلل واضح • دي طريقه جميله من ميشو • واحد قال لي القال ليك ميشو المدرب منو ؟ • قلت ليهو عاد المدرب منو ؟ • قال لي المدرب الحايم جوه في نص الميدان ده • قلت ليهو وجهة نظر برضو • المهم • ابو الهل لازم يمشي لي قدام • عشان يجيب بطوله لاول مره في حياتو • بعد تمنين سنه • انا ماعارف بغيروا المدرب ليه ؟ • من زمن ريكاردو • ياها نفس الطريقه • واحد حارس • وتسعه حارسين الحارس • وواحد قاعد بعيد • كان جاتو قسمه ونصيب • وكان ما جات ربك اراد • ياناس • لوح الشرف الافريقي ده ناوين تشرفوهوا متين ؟ • نقعد برانا في اللوح ده خمسين سنه ولا شنو ؟ • سمعت تحت تحت قالوا الصفاقسي ناقص اربعه • اتنين بعامل الاصابه • واتعالجوا • واتنين للايقاف • واتفكوا • اسلام في الشوط التاني قالت لي الناس ديل قطعوا ولا شنو ؟ • قلت ليها ولا شنو • قالت لي لكن ماممكن يقعوا كلهم في وكت واحد • قلت ليها يابتي زمااااااااااااااااااااااان قلنا جاز المصافي ما بوصل • وضحكنا • بعد الكوره كان في لقطه جميله • الجماعه كلهم ( جالسين ) اظنهم ماقادرين يقيفوا • ومتماسكين • في منظر رائع • صديقي ميرغني كرار قال لي الحركه دي بعملوها ناس مازيمبي بعد الكوره بقروا فيها تعاويذ • ديل بعملوا في شنو ؟ • قلت ليهو اسي الجاب مازيمبي شنو ؟ • واسي الجاب تعاويذ شنو • ربك رب الخير ارادها كده • ومامعروف هنا القسمه موديانا وين • كلو منو • والي منو • لابد منو • غايتو بالشايفو انا ده • منتصف نوفمبر مواضيع كتييييره حاتتقفل • نقطه وسطر جديد سلك كهربا ننساك كيف والحمام مالي برج المنافسه والي لقاء سلك babikir maki [[email protected]]