بسم الله الرحمن الرحيم في السلك • لجنة البرمجه دي جايبه الكلام للاتحاد • وعشان نطلع من الحته دي • تعالوا نجنس ميشو • واذا الجنسيه هنا اتصعبت • ودوهوا اهلي شندي • زي حكاية رخصة القياده • كان اتصعبت عليك هنا وقست • واستحال النجاح في امتحان الخلف بالاتوز داخل الحوش الضيق • وما قدرت علي رسوم الاكاديميه • الاكاديميه البتعلم الناس السواقه شفهيا • وبالشئ الفلاني • اذا قست عليك الرخصه بتعمل شنو ؟ • تمشي الولايات طوالي • وماتكلم زول • حتي لو ماعندك اهل في الولايات • تضرب لي زول معرفه هناك • يقابلك في محطة البص • تطلع رخصتك • لا اكاديميه • ولا اجراءات روتينيه • ولا معاكسات لي طالب الخدمه • وترجع بي بصك الجابك • تلقي دفعتك في الاكاديميه يا دوب في الحصه الاولي • وديل طبعا القدروا يدفعوا الرسوم • المهم نطلع لي ميشو الجنسيه من اهلي شندي • ونعينو لجنة برمجه في الاتحاد العام • ميشو براهو اللجنه • عشان يصحي من الصباح يسأل • هيثوميسكي كورافيسكو دايرومشكي معاناشوف منوسيسكي الليله بوف • يعني • ياهيثم الكوره دايرنها مع منو الليله • وهيثم ليهو الخيارات • يبدل كورة هلال الشرق بي كورة طلال حلفا (مع حبي واحترامي للاستاذ الرائع طلال حلفا ) • زي ما اتبدلت كورة نيل الحصاحيصا بي كورة اهلي الخرطوم المسكين • والخيارات المتوفره لهيثم كتيره • منها ان يطلب النقاط بدون لعب • علي كيفو • المهم الاتحاد اضانو تبرد من لجنة البرمجه • بدل كل مره الناس تسأل ميشو • ميشو يقرر براهو • بدون سؤال • طالما نحن نعمل من اجل الوطن • ومصلحة الوطن اصبحت محصوره في فوز الهلال بالبطوله الجعرانيه سابقا • ومن اجلها يضرب بكل الثوابت عرض الحائط • لابد وان يعمل اي زول ليهو علاقه بالرياضه والوطن من اجل فوز الهلال • تحكيم • تنجيم • برمجه • بقية الفرق • الناس كلها لازم تعمل من اجل مصلحة الوطن العليا المتمثله في فوز الهلال • اهلي الخرطوم يقعد في الممتاز ولا ينزل الاولي ( لاقدر الله ) الوطن بستفيد شنو ! • وقبل كده المريخ في معسكر بالمانيا ايام المشاركه في مانديلا • الاتحاد برضو غلب مصلحة الوطن • تخيلوا عمل شنو الاتحاد ؟ • الاتحاد يا ساده اجبر المريخ للعب دوريا ضد المورده بتشكيله فيها خمسه اشبال • ناس ابراهومه • مصلحة الوطن في الوقت داك كانت في اجبار المريخ علي الالتزام بالبرمجه • ولم تك مصلحة الوطن في فوز المريخ بالبطوله القاطعه قلب الناس لي اسي • شفتوا الوطن ده مصالحوا بتتعارض كيف ! • المهم • ميشو لوحده لجنة برمجه • الاتحاد يتفرغ لمخاطبة الاتحاد الافريقي لحماية الهلال من التحكيم الافريقي المرتشي • الاتحاد لازم يعمل لمصلحة السودان • موش اسمو الاتحاد السوداني ! • ايها الوطن الغالي • دايرين مصلحتك • وشرفناك بالجويات • وقدرت يا وطن ما قمنا به • فتشرفنا بتكريمك لنا • بوسام الانجاز والاعجاز • داخل القصر الجمهوري • شرفناك ياوطن وشرفتنا • بس بدون اي دعومات وقتها تحت ستار مصلحة الوطن • ياناس • الذين يتحدثون عن مصلحة الوطن اليوم لم يعترفوا بمانديلا الذي شرف الوطن • بل قللوا من شأن الانجاز • وسموا البطوله باسماء لاتشرف الوطن • عبروا وقتها عن مدي حقدهم حتي ولو كان سبب الحقد انجاز للوطن • قوموا بره لمه • الوطن وطنا • وشرفناهوا بدري • كنتوا وين ؟ • ايها الوطن • شد حيلك • الموسم القادم جايبين ليك كاس جديييييييييييييييييييييد • جووووووووووووووووووووووووووووووي • المره دي بي صن اير • سودانير كفاها فترت من نقل كاساتنا • انا حا اسجل كورة الحصاحيصا • الا ما تتلفزوها • اخير تعتزروا عن النقل • عشان اي شئ بيظهر • ياناس • تمنياتنا للرائع العجب بالشفاء • ابو ماسوره ده دور تاني ولا شنو ! • وفيات و التهابات • الله يستر علي راجم عبدالعاطي • قالوا صبحية كورة الخرطوم في ناس شافوا تلاته بصات مليانه ماشه علي مايرنو • ان الله لايصلح عمل المفسدين • الوقت مناسب لينقلب السحر علي الساحر • العصير برد • والميدان اترشه سلك كهربا ننساااااااااااااااااااااااااااااااااااك ! كييف يا فرده والي لقاء سلك babikir maki [[email protected]]