(كان الحكومة دي سقطت الرماد كال حماد لان البديل عنصري متامرك) هكذا قال بعض المحليين السياسين ولكن عشان ما تسقط الناس دايرة اللبن واللبن عند البقرة والبقرة دايرة قش والقش دائر مطر والمطر عايز عدل ..... لقد كانت سنوات اتفاقية نيفاشا رغدة الدرهم والدولار حيث حقق السودان نمو اقتصادي فاق ال6% في اكثر من عام لكننا لم نهنأ بهذا النمو لأنه لم يوجه لقطاع الانتاج والزراعي و الحيواني والصناعي لأننا لم نعمل بفقه حبوبتي بت ود ابو البلة القرش الابيض لليوم الاسود فكان هذا الضنك و شظف العيش. نادى كثير من الاقتصاديين بإعادة العافية لمشروع الجزيرة (حمال الشيل) (ابوالتقيلة) وقبلنا التحدي واستبشرنا خيرا بتعيين ابو النسب الاقتصادي الدكتور المتعافي علي راس مجلس الإدارة عملاً بحمكة ابونا ود بدر رضي الله عنه (حباب النافع ) ولو كانت اعمال شمس النيل التي يملكها احد (النافعين) والذي يقوم باستيراد تقاوي الذرة بدلا عن مؤسسة اكثار البذور التي وئدت مع مؤسسات المشروع العملاق. لكن متعافينا حول المطلوب منه لمعركة القطن المحور وراثيا حتي قبل اسبوع واحد من انطلاقه العروة الصيفية. انطلق مزارعو الجزيرة لقلامة أرضهم لزراعتها بالذرة ففوجئوا بانعدام التقاوي الجيدة فوجدوها في الخرطوم معقولة بس الخرطوم فيها أي شي مثل دولة تشاد التي تصدر الصمغ العربي وليس بها شجرة هشاب واحدة ... سألنا من السماد عند البنك الزراعي فأجاب ممنوع من استيراده بسبب مشكلة الزهرة ولكن جيبوا فاتورة تحت بتمويل مشينا بتاع السماد قال بديكم فاتورة بسعر 175جنية مائة وخمسة وسبعون جنية لجوال السماد لكن ما بضمن تغير السعر حتي الساعة السابعة مساء ناهيك عن اجراءات المراجعة لشراء السماد. اخوانا المصريين مستغربين مننا قالوا السودانيين دول عجيبين يدفنوا علي النيل ويسكنوا الصحراء وعندهم شارع الحرية يودي السجانة. ومالم يقولوه عندهم البنك الزراعي ومقرة المقرن ورئيس مجلس إدارته كان - والي الخرطوم وعندهم بنك الثروة الحيوانية ومقره شارع المطار .. ال نهضة زراعية ال ... انتو دايرين الجد اتحزموا وتلزموا و الفايت الحدود واسوا ... انقلوا مقر البنك الزراعي لمدينة الفاو وبنك الثروة الحيوانية لبارا بالمناسبة هو مش كان اسمه بنك الغرب الإسلامي حرموا عليهم التعامل في السيخ والاسمنت وتجارة السكر وقولوا ليهم كل زول اسمو مهند نقول ليه مريم وقولوا ليهم صيغة المرابحة خلوها اشتغلوا مشاركة عند الزراعة ومضاربة عند الإنتاج . اما ابو النسب نقول ليه نحن ألخاتنك ليها اكبر من القطن المحور وراثيا نحن ألخاتنك للتنمية الزراعة الشاملة بفكر اقتصادي مستند دايرين قرشك وفكرك والحساب ولد. واحدة قالوا ليها زوجك عرس فوقك قالت اتدخرلوا انا مقصورة ليه وليداتي في الزريبة وبقراتي في المدرسة. يبدو ان الدولة هذه الايام مرتبكة مثل هذه المرأة معتقدة ان دولاراتها في المخزن وعيشها في البنك. فتناكم بعافية محمد علي خير السيد / المحامي مزارع راجي السماد تعليقنا: يا مولانا سماد اليوريا متوفر في السوق مقابل 190 جنيه للجوال زنة 50 كلجم وكأني به في سباق مع السُكر مش هو برضو ناصع وابيض وبلوري؟؟؟؟ ياربي السبب الدولار الجمركي أم زيادة المحروقات أم السوق الفالت؟؟؟؟ ahmedalmustafa ibrahim [[email protected]]
