الحكومة في غزل ما صريح للشعب .. تشيل وتغمز ليهوووو!!! الحكومة للشعب السوداني :: آيات المنافق الثلاثة طبقناها فيكم .. وعدناكم بسلة غذاء العالم .. وما أوفينا بوعدنا .. وكذبنا عليكم!! عادي يعني شنو لو كذبنا عليكم .. انتو بالمناسبة ما بتستاهلوا ذاااتو .. أئتمنتونا على وحدة السودان وفرطنا فيها وقسمنا السودان إلى دولتين والتالتة في الطريق !!وخنا الأمانة .. الحديث الكذب ده خلو لينا ... من 89 بنكذب عليكم لما نحنا صدقنا... كذبنا وعرسنا مثنى وثلاث ورباع .. وكلهم غلاظ وسمان !! في نهاية القصة طلعنا منافقين !! أنتهينا من حاجة أسمها زراعة في السودان ولحقنا مشروع الجزيرة آماااات طه .. جوعنا الشعب... ودمرنا التعليم .. وأكلنا أموال البلد .. بعد البيع البي الجملة لمؤسسات القطاع العام .. ده غير الأراضي والمشاريع أنسوا بس ياخي نحنا بهدلناكم بهدلة شديدة خلاص.. لكنت انتو ما بتحسوا ذاااتو شككتونا ذااتو . التعليم بالله الطالب يخش المدرسة حمار صغير .. يطلع حمار كبير من الجامعة " الكلام ده حسب منطقهم هم !!! يعني في النهاية حاملين شهادات ساااااااكت وكمان معاكم فصاحة " خريجي جامعات" .. الصحة . عادي جداً في السودان ده أنك تموت يعني ما في معنى أن تحيا في البلد دي كمان دايرين تتبلوا على الحكومة .. عشان كده عادي جرعة زائدة من التخدير تقوم بيها وتسلمك للخالق بعدين الحاجة دي عادية أنتو أصلاً الحيين ليها شنو ، نحنا دايرين المواطن يتكفل بأي شئ حتى " الشاش" ناهيك عن تكاليف العمليات الكبيرة والقصص الميته دي . نحنا ما فاهمين حنك مجانية الصحة القائم فيها الشعب دي شنو .. يعني نحنا أولادنا يقروا من وين لو الصحة التعليم والخدمات الأساسية بقت مجانية، نسوانا ديل يمشوا يلدو " نبي الله الخدر – ولا المهدي المنتظر" في بريطانيا والأردن بأموال منو .. ياخي فكونا من أفكار البعثيين والشيوعيين في الإشتراكية والعدالة الإجتماعية.. بالمناسبة نحنا ذاتوا مصطلح الرأسمالية الطفيلية ده عاجبنا شديد ... " يااااااااااااااي والله لما يقولوا لينا رأسمالي طفيلي" جسمنا ذاتو برتاح .. وراسنا بتوزن .. وتحس بي أنفه كده .. خصوصاً لما كرشك تكون كبيرة يعني بوريك حجم الطفيلية العندك. بعدين حرمنا الشاب من التوظيف والعرس والبنات بقا ما بعرسوا ده كلو قاصدنوا بس كده !! عشان الفساد الأخلاقي يعم المدن، وعندنا خطة نعمموا على القروى والوديان .. علي فكرة بعد ما ننتهدي من البشر حنقبل على الحيوانات ونفسد اخلاقها لانو ممكن الحيوانات تكون ما فاسدة والبشر يكون فاسد عيب علينا ، دائماً نحنا نصنع التميز .. عملنا شارع النيل .. عشان الناس ترفه !! وترفه !! .. وكلو في ميزان حسنات الإنقاذ يعني ما حرمنا الشباب من حاجة متعناهم في دنيتهم .. ده كلو عشان ما يطلعوا ضدنا في المظاهرات ويقعدوا يخشوا الفيس بوك ويشتغلوا ضدنا .. بعدين بدل يقعدوا في الفيس بوك أفضل ليهم يقعدوا مع ستات الشاي على شارع النيل وجو رومانسي وبنات لابسين كيف كيف .. وكل في النهاية لهو يعني أوعا تقولوا يا شباب حارمنكم من حاجة. فصلنا الجنوب ومقبلين على دارفور في النهاية لو بقت لينا توتي ما كعبة هو نحنا البلد دي رفعنا فيها سيف عشان نحافظ على وحدتها .. انشاء الله تحرق ... المهم الكرسي ... ياخي كرسينا ده ما أصلوا ما بنخلي وحنسلموا للمسيح الدجال .. الفساد السياسي والإقتصادي .. نحنا مدورين الشغلة دي وعارفين منو الأشخاص الشغالة في الموضوع ده .. وبنحميها لانها بتقدم خدمات جليلة للتنظيم .. بعدين نحنا مستفيدين جداً في تهديم الخدمة المدينة دهك لو مقصود نحنا مفتحين نكذب عليكم كده ونقول ليكم مفوضية لمحاربة الفساد والثراء الحرام .. دي قصص فارغة ساي نحنا مقتنعين بيها لكن داير الشعب العجيب ده يعرف انو نحنا شغالين .. آخر العامود : نحنا مستغربين لي الشعب ده ما داير يطلع علينا .. ياخي نحنا ما خلينا ليهو صفحة يرقد عليها .. خشينا ليهو في بطنوا ما قال حاجة : زدنا الدواء .. ما قال بغم زدنا المحروقات.. ما قال بغم زدنا الكهرباء .. ما قال بغم زدنا السلعة الغذائية .. ما قال بغم زدنا اللحوم .. ما قال بغم بإختصار شديد زدنا أي شي .. ما قال بغم والله الشعب السوداني ده غريب خلاص .. نعمل شنو أكتر من كده .. نيالا أحتسبت (9) شهداء برضوا ما علموا حاجة .. نحنا ذاتو خفنا قلنا الناس دي تطلع الشارع في قصة نيالا دي لكن حدث ولا حرج .. ياخي ده شعب يحيرك عديل .. والله نحنا ذاتوا كهرنا خلقة الشعب ده ما داير يتخارج بره السودان ولا داير يشيلنا بره الحكم كرهتونا وشكم واحد كده . آخر حاجة دايرين نعمل فحص للشعب السوداني أنو قلبو ده في ولا مافي !!!إحتمال ميت يا ربي .. الله أعلم .. Hatem Elgimabi [[email protected]]
