مثل إنقاذي "جوع كلبك يتبعك!! " حكمة اليوم: اللهم أعطنا القوه لندرك أن الخائفين لايصنعون الحريه والضعفاء لايخلقون الكرامه والمترددين لن تقوى أيديه المرتعشه على البناء. "جمال عبد الناصر" (1) «50» جنيهاً لأسطوانة الغاز وجوال السكر يصل «300»جنيه، ارتفاع غير مسبوق لأسعار السلع بمحلية نهر عطبرة بحلفا الجديدة!! الغاز ده غاز شنو يا أخوانا ابو 50 جنيه ده " غاز أعصاب" ولا بمبان الغريبة أنو البمبان بي 5 دولار تقريباً.. والسكر ياهو الواحد ده البشربو مع الشاي والقهوة والذي منو ولا سكر حاجة تانية .. مش قلتا ليكم قبل كده الولايات دي حالتا صعبة جداً.. الناس دي على حافة الهاوية ومافي زول جايب خبر .. ده غير شوال الدقيق البي 130 جنيها ،وجالون البنزين «30» جنيها ، ورطل الزيت «8»جنيه!! (2) أقر وزير الصحة الاتحادية بحر ادريس ابو قردة بعدم وجود توازن في المؤسسات الصحية في البلاد، مؤكداً ان كل المؤسسات الصحية المهمة موجودة في العاصمة "ما يوضح بجلاء عدم التوازن في التنمية في كل المجالات" غايتو يا عمك مافي داعي تفضح نفسك وحكومتك العينتك دي ونحنا عارفين الكلام ده يا أخوي ما دام في طبيب بنسى المقص داخل بطن مريض.. في عدم توازن واضح في اي شئ الكلام ده مفهوم بالنسبة لينا بالنسبة ليكم مفروض ما تصرحوا وتتجرسوا بالشكل ده المفروض تكوسوا ليكم حلول لان التاريخ والشعب لا يرحمكم. (3) توقع جزارون ان تتراوح اسعار خراف الاضحية ما بين (1.5 الف جنيه و 2 الف جنيه). أتوقعوا ساي ... هو متين عيد الفطر أنتهى.. أنتو كيزان ولا شنو . دايرين توهموا الناس بالضحية من اسي، هو في زول قال داير يضحي خلو الجماعة ابان كروش يضحوا بدلنا ما نحنا كل سنة بنضحي، وده خروووووف شنو البي 2 مليون .. عندو كم لغة .. وبسمع لي أليسا ولا نانسي عجرم، ولا عندو تلفون " آي فون" بكون قاعد يمشي شارع النيل الخروف ده مية مية .. 2 مليون ما كتير في خروف قاعد يقعد جمب برج الإتصالات .. يعني شنو تدفع 2 مليون في خروف مثقف .. ما دام مثقفننا ما بسوى عند الحكومة 2 جنيه خلي مليون .. (4) تمكنت شرطة مكافحة المخدرات بولاية شمال كردفان من ضبط 19 ألفا و670 رأسا من الحشيش على متن خمسة جمال بمنطقة عيال بخيت تقدر قيمتها ب 2 مليون وخمسمائة ألف جنيه . لا حول ولا قوة إلا بالله دي ماشا وين .. عاد الكلام ده ما شين في حق البلد دي .. ويقولوا ليك برضو شريعة !! هي أنا ما نسيت الغريبة في تصريح لي وزير الداخلية قالوا أنو البنقو ما من المواد المخدرة!! .. بعد شوية حنلقى البنقو بتباع في الشارع عادي . تجي لي بتاع الطبلية تقول ليهو حول لي رصيد بي 5 جنيه واديني بنقو بي 5 وتقعد تتجادل معاهو ياخي عليك الله ما تزيدو شوية اسي ده بعمل لي شنو ياخي ما تبقى جبار ياخي !! وبعدين ربنا ما قال أوفوا الكيل والميزان ياخي .. ولا عشان ده بنقو ربنا بحاسبك ..!! وبعد شوية تسمع تصريحات لوزير المالية .. برفع الدعم عن سلعة البنقو غايتو جنس بلاوي على البلد دي .. ياخي محل ما أنقذتونا رجعونا!! يخرب بيتكم . (5) نائب الرئيس :ندعم كافة جهود تعزيز السلام بافريقيا!! ينطبق عليك المثل البقول " خائبة في بيتا وفالحة في بين الجيران" ياخي أنتو عليكم جنس فلهمة .. ومن غير اي فهم .. ياخي أنتو بترفعوا الدعم عن السلع الاساسية وبتدعموا جهود السلام دي كيف !! اسي عليكم الله بتدعموها بشنو تجارب نموذجية ما عندكم .. إلا تمشوا تقسموا البلدان الفيها حرب دي .. زي تجربة جنوب السودان. (6) استقرار مناسيب النيل ومخاوف من المفاجآت!!! كدي خلو المفأجات دي أنتو جاهزين ولا ما جاهزين .. كرهتونا ذاااتو كل مرة فأجئنا الخريف، نفسي أعرف يعني مفروض الخريف ده يعمل ليكم مسكول ولا يرسل مسج ولا يضرب ليكم عديل عشان أنتو تجهزووا.. جنكم محركة زي المرأة تقعد 6 ساعات عشان تطلع من بيتا .. غايتو أنتو الشغلة دي غلبتكم عديل وما قادرين تقولوا غلبتنا عشان كده .. بتهدوا في الموقف والناس شائفة بي عينا أنو الموضوع مستحمي .. (7) الجرائد شغال تسابيح عرسوها .. تسابيح طلقوها .. تسابيح حامل . تسابيح سافرت بره السودان .. لكن مع إحترامي الشديد للصحافة ولكن ده ما موضوع ليها .. ياخي خلو المرأة في حالها.. غايتو أنتو لا عاجبكم العجب ولا الصيام في رجب !! بمناسبة الصيام ده .. اها الستوت كيف !! ثمن عامود : الذي يرى أطفال المدارس محملين بالكتب المدرسية .. يصاب بالزهول نوعاً ما والصرعة والقرحة ووجع النواطيت فحقيبتهم تذكرنا دوماً بالمغتربين زمن المغتربين مغتربين بجوا شائلين حتى الهبهان في حقائبهم.. اسي مغتربي الزمن ده بجي يشتري الحاجات من عفراء مول سابقاً .. بالمناسبة عفراء مول ده لسا ما فتحوا .. غايتو حالتكم تحنن يا أطفال المدارس .. حيجيكم وجع ضهر وحتعيشوا طول عمركم مدنقرين لي تحت .. وبدل " إلى العلى" حنقول إلى " تحت أنظر" .. الله يجازي المدرسة الشاملة .. الخوزقت أودلانا .. آخر العامود: أنصار السنة يطالبون الحكومة بمراجعة أخطائها!! نفسي الناس دي تخلي شغل المليس ده !! كلام ناعم ورقيق !! يراجعوها كيف عاد يا اهل الله هم ما فاضين للحركات دي .. وبعدين هم أخطأوا في شنو الناس دي .. يا دوب كده فصلوا الجنوب .. وأكلوا أموال الشعب .. وشغالين حرب في دارفور .. وباعوا البلد .. وكلو بإسم الدين والدين براءة. مافي اي أخطاء انا اسي كنت هناك وشفت اي حاجة وبعدين لا سمعتا لا جابوا لي !! Hatem Elgimabi [[email protected]]
