بسم الله الرحمن الرحيم قال تعالى: ( هَذَا بَلاغٌ لِلْنَّاس وَلِيُنْذَرُوْا بِه وَلِيَعْلَمُوَا أَنَّمَا هُو إِلَهٌ وَاحِد وَلِيَذَّكَّر أُوْلُو الألْبَابْ) ..الآية هذا بلاغ للناس بقلم: أبوبكر يوسف إبراهيم* توطئة: أخونا د. عبداللطيف محروق حشاه فيما يختص بالمياه والزراعة وله الحق، كل الحق فيما ذهب إليه ولكن حرقته هذه ساقت مخيالي لإجراء حوار افتراضي معه، عسى أن يطفئ كل هذا الحريق المشتعل غيرةً في دواخله على الوطن ومقدراته ولأنهما من أهم عناصر اقتصادنا إن لم يكن الأهم على الإطلاق. حقيقة أن هناك كثير من المشاهد التي تشعل حرائق في الحشا والجوف وهو ما لا تستطيع إطفائية نيويورك التي أطفأت حرائق برجي التجارة في 11 سبتمبر أن تطفئها!! المتن كيفك يا د. البوني ، مالك يا زول شادي البطان كده؟! يعني إنت بتفهم أكتر من الحيكومة واللآ إنت أصدق منها ، نحن من يوم ما تبينا في الدنيا الفانية دي، الكُبار قالو لينا الحيكومة ما بتكضب وكلاما دايماً صاح؟! ü يا أخوي الظاهر الصورة عندك ما مكتملا، عاوزك تفهم إنو التوصيف الصحيح للسودان إنو دولة ( ممر) وليس (مصب)، والزول الما عارف هو واقف وين أحسن ليهو يراجع نفسو، ويتلفت عشان يعرف وكان غلبتو الحيلة يسأل أهل الذكر!! يا زول سيب اللخبتة وما تدخلّنا الدرب في الموية ، يعني إنت بتفهم أكتر من الحيكومة، ويعني إنت وبروفسيرك قريش ده عاوزين تقنعونا أنو نحن ما محتاجين للخمستاشر مليار متر موية مكعب اللآت عبود ونخليها تمشي في ستين داهية مثلاً ، وكلامك معناه إنو نحن برضو دولة منبع وعندنا برانا كده (50) مليار قدر حصة مصر، كان كلامك دا صحيح لي شنو كردفان ناسا والشرق وناسو بموتوا من العطش؟! واللآ مالنا ما قادرين نسقي مشروع الجزيرة من مياه النيل؟! والله يا زول المتعافي قال لينا المشكلة ما مشكلة موية.. كان على الموية، الموية راقده.. المشكلة إننا لآزم نعرف منو وراء الكلام الفارغ ده..( أحسب) إنت واحد منهم؟! ü طيب يا الفهيم أكان المشكلة ما مشكلة ري ومياه ، تبقى المشكلة مشكلة شنو؟! الناس زراعتم خلاص لحقت أمات حسن ونحن بنتكلم هسه في (الاتفاقية الاطارية) قمت دخلتا لينا في كردفان وبورسودان والعطش، يا أخي أنا خايف على مشروع الجزيرة البعتمد على الري من مياه النيل.. فاهم قصدي واللآ لسه؟! والله يا دكتور ماعارفك جاهل للدرجة دي... الظاهر إنت ما بتسمع قنوات الدش السودانية... والله كمان ما عارف إنت كيفن دكتور والمصيبة كمان صحفي والظاهر إنك ما قاعد تتابع كلام وزير الزراعة د. المتعافي (المتعافي)، تراهو دكتور زيك... وكمان أضيف لي كلامو كلام وزير السدود وهم كل يوم شغالين ( تنوير!!) للمشاهد، يا أخي إنت سديت نفسنا والله .. أتاريك قاعد تكتب ساي من مخك.. يا أخي أوضح حاجة مشروع الجزيرة دا نحنا لما استلمناهو من الانجليز كان ملخبت جنس لخبتة الله يعلم بيها... والله الحاجة الكويسة الوحيدة الخلّوها لينا الانجليز هي (الموريس ماينر) بس .. سامعبو واللا ولدوك بعدو؟!! ، أزيدك من الشعر بيت .. تصور بعد سودنتو بقينا نظبط عليهو الساعة زي إكسبريس البخار زمان، وكمان يا أخي الناس ديل جابو آلات تنظف الترع بي مليار جنيه .. أها قول لي دي كمان ما سمعت بيها؟! .. بالله أنكر دي كمان، د. المتعافي يومداك قال قاعين هسه نصرف منها سااااااااكت!! ü الله يهديك يا أخ أبوبكر نحنا هسي قاعدين بنتكلم عن (الاتفاقية الإطارية) ولآزم نشوف مصلحتنا وين ونمشي وراها ... والحمد لله عندنا خبرا في المجال دا ممكن نستعين بخبراتم وعلمهم... الموضوع ما موضوع تنسيق عمياني مع أي دولة، يا أخي نحنا لآزم نشوف مصلحتنا وين ونخلينا من التحالفات (السالبة)!! قلت شنو؟! .. الله يهديني؟! يعني أنا مجنون واللآ بتكلم كلام ساكت كده؟! معليش يا دكتور مضطر أقول ليك الجهل مصيبة وما حأعاتبك ولا مؤاخذة السفيه نبّذ الباشا!!... يا دكتور لآزم تقول النصيحة وخليك من الكلام المغرض ده ، أمانة في ذمتك الحيكومة ما سوت لينا هسه حصاد مياه؟! .. والله الحيكومة دي جابت لينا حاجات ما كنا قبل كده بنسمع بيها، زمان ما كنا بنسمع بكلمة حصاد دي إلا في الزراعة، زي حصاد المقد .. حصاد القطن.. حصاد الفتريتة .. حصاد المُقُد .. وحصاد السمسم.. والقمح.. والفول.. ولما الحيكومة الرشيدة شافت أنو في علاقة (تزاوجية) بين الموية والزراعة فكرت ودبرت وعملت لينا حصاد مياه.. أها إنت الغيرة كاتلاك مالا؟!..أها قلت (تزوجية ما تمشي تقولني كلام ما قلتو أنا ياناس أشهدوا ما قلت (جنسية) القال العبارة دي حمودة حلاّق الجامعة!! ، ü يا أخ أبوبكر الموضوع ما موضوع غيرة كاتلاني، إنت الظاهر الصورة عندك ما مكتملة، الموضوع قلنا طويل وشائك ولازم نبحث جذور المشكلة أولاً لنحدد العلاج الناجع وبعد ما نحددا نضع ليها الحلول العلمية السليمة.. أنحنا قصدنا مصلحة البلد الله يهديك!! تاني برضو الله يهديك يا أخي شايفني مربوط في الشكينيبة؟! .. والله الواحد فينا عشان يقوليكم الحقيقة لا بداً من يخت قرجتو جنبو!!.. خبارك يا زول إنت ما سمعت بحاجة اسمها (الاستراتيجية ربع القرنية) و(النهضة الزراعية) البدت من يوم ما قامت الانقاذ واللآ إنت أطرش؟! والله صحي زي ما قالوا جدودنا(القلم ما بزيل بلم) والله يا زول أنا كنت متوسم فيك الخير لكين طلعت فشوش ساي.. بعدين سموها ربع قرنية لي شنو؟! .. خليني كدي اللفهِمَك - ومعليش الظاهر أنت فهمك تقيل- .. بالعربي البسيط كده يا العلامة والبحر الفهامة يعني يا المتعلم إن نتائجها حتظهر بعد ربع قرن وربع القرن لسه ما اكِمِلْ!! .. فاهم واللآ أفهمك كمان وأبسّط ليك الموضوع لأنو الظاهر الموضوع ده تقيل على فهمك!!.. ثم ثانياً إنتا ما شايف فاتورة القمح انخفضت؟!.. وما تقول لي انخفضت براها كده.. طبعاً عشان الحيكومة نجحت في النهضة الزراعية وكمان السبب أنهاوفرت كل(المطلوبات والمعينات) ( جزاها الله خير)!! الحاشية: ü يا أخ أبوبكر إنتا طلعت بره الموضوع نحنا بنتكلم عن(الاتفاقية الإطارية) وانتا بتتكلم عن (الاستراتيجية ربع القرنية والنهضة الزراعية)، أنا بتكلم عن التوصيف الفني والقانوني للمشكلة عشان نحفظ حقوقنا ونصيبنا في مياه النيل؟! أها يا أخوانا ما قلت ليكم الزول دا بِيش شاي وما أظنو بسمع تلفزيون ولا حتى راديو وكمان المصيبة ما بقرا الجرايد البكتب فيها، يا أخي إنتا لخبتا الأوراق موضوع (الاتفاقية الاطارية) ده موضوع أمني تم الاتفاق عليهو قريب دا مع د. نافع في أديس أبابا وما ليهو علاقة بمياه النيل، كمان يا أخي بروفسيرك دا ما قال عندنا ( 50) مليار يعنى كده الموضوع ما حيضرنا في حاجة، عشان نحنا عندنا أعالي ستيت والقاش واالاتبراوي والدندر خليهم يغوروا بي خمستاشر بليونم دي مامحتاجين ليها ويخلونا في حالنا.. وانتوا كمان سيبوا النضمي الكثير الما منو فايدة وخلوا الناس تشتغل... وقلنا ليك مليون مرة إنو دي (استراتيجية ربع قرنية )؟!! يا أخوانا دي نفهما للزول دا كيف؟ ü يا أخ أبوبكر يبدو إنك ما فأهمني وما فاهم الموضوع أساساً... بالله كده أرجع لحلقة الطاهر التوم في برنامج ( حتى تكتمل الصورة) وأسمع كلام الخبراء ومداخلات أهل العلم في الموضوع يمكن تقتنع!! يا أخوانا تاني الزول ده قام يتهمنا بعدم الفهم صحي والله الجمل ما بشوف رقبتو عوجا.. لكن معليش أنا عازرو والله صحي القلم ما بزيل بلم.. وطبعاً هو بتهرب عشان جُجّتو ضعيفة، الزول ده نسى إنو الحيكومة ووزيرها (المتعافي) – عفيت منو والله يديهو العافية كمان وكمان – وقلم ود البوني دا وأصحابو ألقمم (المتعافي) حجر في حلقهم البلعلع بدون فايدة ... والله الوزير منضمة وقال كلام كبير في التلفزيون كلام كلو علم حتى أنا المفتح ده ما فهمت منو حاجة.. والله أنا ذاتي ما فهمتو.. قال كلام كبير خلاس والله خلى البوني وجماعتو الدرب يروح ليهم في الموية!!.. شيتاً تقاوي وبذور محسنة ( جينياً) وشيتاً (أسمدة ماركة مضروبة) وطبعاً البوني وجماعتو قايلين (مضروبة) يعني بايظة وهم ما عارفين ده إسم الماركة الألمانية بالألماني زي شركة (باير) قالوا دا سماد باير عندهم استغفلونا وباعوه لينا وطبعاً دي كلمة(باير) كلمة ألمانية صادف نطقها معنى تاني بالعربي وبس نوعك دا يا دكتور. كنكش في الكلمة وبدا يشوه صورة (النهضة الزراعية) وتوفير (المعينات) ليها .. والله صحي الجهل مصيبة!! ، تصوروا البوني العامل لينا فيها دكتور ما عارف حتى (جيني) يعني شنو؟! بالله مش حاجة مُضحِكة!!.. لكين معليش عشان خاطركم حأشرحا ليهو زكاةً عن علمي!! .. يا سيد يا جيد (الجيني) مشتقة من (الجن) .. وزي ما هناك جن صالح، هناك آخر طالح زي البني آدمين تماماً، ولكن الجن له قدرات خارقة تفوق قدرات البشر فهم أسرع ولهم قوة أكبر، لذا استعان(د. المتعافي) ونفر من الانس بنفرٍ من الجن (الصالح) لمضاعفة محصول الذرة بأنواعها والقمح بالذات حتى ( نأكل مما نزرع) وبالنسبة للقطن حتى( نلبس مما نصنع) وكمان مع وجود نوع من الناس زيك لما نسمع كلامم ونقرا كتابتهم نقول( نضحك مما نسمع)!! ü بالله يا أخ أبوبكر حاول .. حاول تفهم نحنا بنتكلم في شنو ، الظاهر تشابهت عليك عيون البقر!! أها شفتو الزول ده بقي ديماجوجي افريزي انبهالي استحواري اعتواري كيف؟!.. أها بدا لينا بالإرهاب الفكري، هسه الدخّل البقر شنو في الموضوع ، طبعاً عاوز يهرب من موضوع الزراعة والمياه وعاوز يسحب رجلي عشان أتكلم في موضوع إدخال البقر أي الحيوان في الدورة الزراعية... وهو عارف كويس جداً إنو إدخال البقر الفريزيان في الدورة الزراعية كان عامل مهم في خفض أسعار الأبان والأجبان.. وعارف إنو إدخال الجداد البطري الانجليزي التخين السمين كان سبب في خفض أسعار اللحوم البيضاء والبيض، وإدخال المزارع السمكية رمى أسعار السمك في الواطة .. يعني المستفيد المواطن المستهلك الغلبان واللآ انتو عاوزين التجار تمص دم المواطن الضعيف الغلبان؟! .. الحقيقة إنتو طابور خامس والحيكومة واعية ليكم كويس عشان كده أدخلت في الدورة الزراعية ما بنفع الناس أما كلامكم كلو كالزبد يذهب جفاءً!! ü يا أخ أبوبكر أنا أصلاً ما اتطرقت لدورة حيوانية ولا مزارع سمكية ولا سماد مضروب أنا بتكلم عن موضوع (الاتفاقية الاطارية) فحاول تفهم فالظاهر أنت في وادي وأنا في وادي؟! الهامش: أها ما قت ليكم الزول ده لخبات ساكت، تاني رجع لاتفاقية نافع وبدا اتجاهل كل الانجازات (المقدرة) الشرحتها ليهو لكين والله صحي وزي ما قالو: القلم ما بزيل بلم، الزول ده، يا في واحد محرشوا واللا يكون جاهل ساي.. لكين معليش مهمة الناس - المثقفة بالمعلومات من الزيّنا ديل- مسئوليتم يفهموا النوع الزيّو حتى تكتمل الصورة عندو هوّه وصاحبو بتاع البرلامج!! قصاصة: مع حبي وتقديري واعتذاري للدكتور البوني والأخ الاعلامي الطاهر التوم لكني برضو حأقول لدكتور البوني والله لن تكتمل الصورة عندك ولا عند صاحبك وزي ما قلت في عمودك: ( لي يوم يبعثون!!) بس نصيحتي ليكم تمشوا قهوة ود الفكي وتسألوا عن عمنا مختار وهو مشهور عنه أنه أحرف لاعب( دومينو) يعني ممكن يفهمكم نظرية الدومينو والانهيار المتوالي، الزول دا شغال خفير في الاشغال لكنه علامة وبحر فهامة في المسائل الملعبكة امكن.. بقول امكن يعلمكم كيف تكتمل صورتكم الناقصة.. معيش أمشو جربوا .. جربوا تعلموا الحلاقة في رؤوس اليتامى .. الزول ده ما ساهل يا أخوانا والتحقربو يكُتلك!! نهاية أسبوع سعيدة.. عوافي!!
