بسم الله الرحمن الرحيم في السلك *في شوط المدربين *بدأ الفارق واضحا بين الفكر التدريبي والتكتيكي للرابطه *وبين امكانيات الجهاز الفني المريخي *من خلال الاداء كانت الرابطه هي الاحق بالفوز *والرباطه تتفوق علينا في الشوط التاني بالذات في الخانه التي يوجد بها بخيت خميس *والجهاز الفني لم يفكر لذلك حتي لحظة كتابة هذه الكلمات *المدعو مامادو تراوري *لا اصدق ان بالكنبة مهاجمين اردأ من هذا التراوري *الفرق الكبيره تملك مهاجمين جادين لماحين يقدرون المسؤليه *من انصاف الفرص يحققون الهدف *ويحسمون المباراه *هذا التراوري وجد فرصا للحسم منذ الشوط الاول *ولكن الدلع الذي يلعب به ادي لضياع نقاط هامه جدا *وفي ناس حايقولوا ليك همل العليهو لكن ماكاان في يوميو *يومو متين ؟؟ *يومو متين وهو يلعب بهذه الانانيه وهذا الاستهتار *امكاناته الفنيه الكبيره *اذا لم يسخرها لاجل المجموعه *واذا لم يستفيد منها بالجديه في الاداء *تبقي امكانيات ما بتخصنا *تبقي لي نفسو *والمحيرني هل عقد هذا التراوري برضو فيهو شرط يلعب اي كورة ؟؟؟ *يا محسن ويا برهان *العشم كان كبير *لكن الشايفنوا ده *قطع العشم *كيف تشركا لاعب شبل في ظروف الفريق خسران فيها والضغط الجماهيري كبير *المعنويات تعبانه والمباراه في ارض الخصم *ده تدريب شنو ده ؟؟ *منذ البدايه وضح الضعف في الضغط علي الخصم في وسط الملعب *ولكن محسن وبرهان الفرجه كانت ماخداهم *اما المدعو مجدي ده *يا اشتغلوا معاهو يقوي شويه ويزيد سرعتو *يا ختوهوا في الكنبه جمب عنكبه *اي مدرب في فريق رابطه بعرف انو لعب الحبل بزيد السرعه يا محسن *اما زغبير *فاثبت لنا ان جمال سالم هو من اكسبنا سيكافا *جبنا حارس بطولات *فضل لينا مهاجم بطولات يلعب بهمه ويلعب مع الناس *السيد تراوري وجد الكرة لقمه مملحه في الشوط التاني *روي والمدافع دخلا في بعض *السيد تراوري معاهو اتنين زملانو *القون فاضي *لعبها في اضيق زاويه *في الحته الوحيده الفيها احتمال تضيع *لانو اناني *وضامن المشاركه في كل الظروف *هدف الرابطه الاول *الكوره اتهكست من اليمين ومن الشمال *والسيد زغبير واقف في مكانو *دي الكور البشيلها جمال بدون ان نشعر بي خطورتها *اما الهدف التاني للرابطه *فيجعلنا نسأل *زغبير ده اعاره ولا تسجيل ؟؟؟؟؟ *المهم *كوستي تستحق التهنئه علي فريقها *وعلي مدربها *وعلي جمهورها المحب لفريقه *برغم ان من بينه جمهور محب لخسارة المريخ *ليس لاجل كوستي *ولكن لاجل ناس تانيين *حضرت الجماهير المريخيه من كل البقاع *ومن الخرطوم *فلم يجدوا مريخهم *كتبوا بالفحم *الاخ محسن حضرنا ولم نجدك يا باشا *ايها الناس *نقبل لبتعادل ونتقبل الهزيمه بروح رياضيه مثلما نفرح بالنصر *ولكن بعد نعمل العلينا *ولا شنو يا برهان !!!!! *المهم *لان المنافس ضعيف *ضعيف ومحظوظ *لم يتغير الوضع بتعادلنا في كوستي *الجماعه برضو اتعادلوا *برغم انو الحكم ابو شنب *ونادر الطيب رفض البطان *كان شببببببببببطك *والدوري انتهي *قصة تسعه في الخلف *واتنين يجروا دي ماخطه *دي لخبطه *ايها الناس *في الشوط التاني *استخلص لاعب شندي الكورة من بكري المدينه *واذا ببكري المدييينه *يأتي تصرف همجي وعدائي وعشوائي *طار لي فوق *وانقشط *ربنا ستر لاعب شندي ساي *كان تصرف قبيح *والاقبح منو سكوت الفاضل ابو شنب علي الحاله *دي عذرك فيها شنو يا ابو شنب *خجلتنا والله *نحنا لسه ما نسينا طردتك للاعب بورتسودان *وصهينتك عن شلوت سادومبا علي نفس اللاعب *لانو كورة الهلال البعدها كانت ضد المريخ *وطرد سادومبا سيأتي بالهلال مهزوما قبل البدايه *وما نسينا يا ابو شنب *كورة مصعب المتجهه نحو مرمي الهلال *والمعز يمسك بها خارج المنطقه *وتنجبر سعادتك لاحتساب المخالفه *وتصهين عن الطرد *لسه ما نسينا *والاشياء الزي دي كترت *ننسي شنو ونخلي شنو *ايها الناس *استغرب من قول الذين يصفون الفاضل بانه افضل حكم سوداني *كان كدي *الله يرحم التحكيم السوداني *ده غير الصهينه عن مخالفات كتيره *في كورة امس دي *الشغيل تدخل بعنف ضد لاعب شندي *الكورة مشت *الفاضل سكت *وفي نفس المنطقه *وتدخل عادي من لاعب شندي *اب شنب صفر *مخالفه للمعشوق *المهم *بطان كان مضمون *كفاية بطان استاد الخرطوم *يا بكري المدينه *الكورة الشلتها في الشوط التاني وانت تتركب مخالفه برفع قدمك في رأس المدتفع *ومشت معاك *ودفرت المدافع التاني *وبرضو الحكم خلاك *شتها في السما قاصد ولا انت قاصد القون ؟؟؟ *كان قاصد القون تلاته مليارنا بقت اتنين بس *وكان قاصد تطفشها *تلاته مليارنا زادت اتنين تاني *لكن لما تجينا لعب زي ده مابنفع معانا *بشه *نغير رأينا يا اخوي *ولا دي خطه منك !!! *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *الضحيه السنه دي ما علينا *وحقتنا برضو ما عليكم يا والينا *ضحوا وضبحوا لي روحكم يا ناسينا *ونحنا املحين اقرنين انضبح واحد فيهن زمان لينا *صلي الله عليك يا شفيعنا يوم نشكي وتسمع لينا سلك كهربا ننساك كيف والخروف كان قال بااااع نقول ليهو شوف الباع منو !!! هو سيد البيت منو !!! والي لقاء سلك [email protected]
