بسم الله الرحمن الرحيم في السلك • المهم • ناس مزمل خرخروا • وقالوا نظرهم ضعيف دايرين يقعدوا قدام • وناس الازهر قالوا احنا احسن لنا هنا • موش رايحين قدام • المهم جبنا كراسي قدام قعدنا فيها الخرخارين • القالوا نظرهم ضعيف • وبس • باقي الفنانين جوا • منه شلبي ( طبعا ماعندها علاقه بنميري شلبي ) وبت عجرم (متضامنه) وسميه الخشاب • الخشااااااااب • امسكوا الخشب • انا والوالي وقفنا طوالي ورحبنا بيهن • ضيفاتنا ما نرحب بيهن مالوا • وقعدناهن ورا • الجماعه الجوا قدام قالوا نظرهم ضعيف وقفوا حيلهم وقالوا راجعين ورا نظرهم اتصلح خلاص • اتخيل في استاد الزعيم هيفاء وهبي وشيرين وبت عجرم • تقول لي سكينه العشوائي وحرم بعشوم ودلوكه وشتم • شيرين سمعت شتم قالت لي شتم مين ؟ ويشتموا ليه !استغفر الله يارب • سمعنا انو حايجيبوا شاشات ضخمه للجمهور خارج القلعه عشان يتابع المباراه • دي فكره جيده • ويجب ان توزع الشاشات دي في الميادين والساحات الشعبيه • واحده في ميدان عقرب لناس بحري القديمه • وواحده في الحلفايا لناس بحري شمال • وواحده في ليق الخرطوم لناس الليق • وواحده في استاد الهلال لناس الزريبه وموقف عابدين وامبده شمال • وواحده في سوق ليبيا • شاشه ماغشاشه • الجزائريين قابلوا جمال قعدوا يهتفوا • جمال الوالي رئيس طوالي • المصريين قابلوا جمال قعدوا يهتفوا • يازووول يا زووول جمال الوالي رئيس علي طوووووول • ده حالتوا ماقعدوا معاهو • غايتو لو الجزائريين والمصرييين قعدوا مع جمال السنه الجايه كل ربع ساعه نلعب بتشكيله • الجماعه قالوا بشجعوا الجزائر علي الرغم من وفاق سطيف • وفاق ياخ • وفاق الشردوا منو • وفاااق ياراجل • في كتااار ماعارفين ليه الناس ديك بشجعوا الجزائر • انا بوريكم • السبب كلو انو الحدث العظيم ده بستضيفوا الزعيم • والحساده طبعا بتخلي النفوس تغلي • كيف الزعيم واستاد الزعيم يبقوا حديث العالم • عماد متعب لما جاب القون التاني الجماعه كلهم نطوا مع حارس الجزائر دايرين يمرقوها • طبعا نحن قووون متعب ده عندنا زي الجابو العجب • موش قووون جاب الفضائيات والفنانين وانظار العالم عندنا ؟ • بنحبوا • لؤي مبارك الصفوه قال لي الجمصي ومحمد عبدالماجد وضفاري ديل يقعدوا وين يوم الكوره ؟ • قلت ليهو في شاشات في الساحات الشعبيه والميادين العامه والما هامه • واكيد حايعملوا ليهم شاشه محل بحبوا يقعدوا • سميه الخشاب بتكورك لي عن اذنكم دقيقه 000 • ؟؟؟؟؟؟؟؟؟ • ؟؟؟؟؟؟؟؟؟ • حاضر يا سمسمه انت تأمري • سميه كانت دايراني في خدمه • اها وقفنا وين ! • المهم المصريين لو طاروا ناس الحتانه بختهم • المقصوره كلها جاياهم • المهم اتلفت ليك ورا اشوف ليك امير كيلا ومعاهو واحد سافي سفه قدر ملطم المونه • منه شلبي كانت قايله السفه شكولاته • قربت تقول ليهو اديني • احرجنا • ناديت حسن بسبوسه • قلت ليهو الزول القاعد جمب امير كيلا ده قول ليهو تف السفه دي بره وماتحرجنا مع الضيوف • حسن مشي ليهو وقال ليهوسافي ! انت قايل روحك وين ؟ في زريبه ؟ تف السفه دي بره • امير كيلا قال لحسن حجوب والله لو تفاها بره يقع معاها .. سفه قدر ده ترمي سبعه خليهو زول واحد • المهم يجب ان ترتقي المباراه لمستوي الاستاد الذي يستضيفها • ونغني • كوره بين طيات السحاب • وحدنا 000 انت وانا 000 وحدنا ويا بختنا • والضيوف يقولوا مقطع • بقوا لينا الانجم قرااااااااب • بختنا سااااي • عادل امام ققايل روحو الزعيم • لقي ليك الزعيم الجد جد • آمن • عادل امام سأل • ايه الضلمه الي هناك دي ؟ • قلنا ليهو ده استاد الجماعه • قال , هم قاعدين ليه مايجوا يتفرجوا مع اخواتهم • قلنا ليهو بتفرجوا من هناك • من هناك ازاي ؟ شاهد ماشافش حاجه ! • يا اخواني • دي كوره تاريخيه • البقطع تذكره يحاول الاحتفاظ بها للذكري والتاريخ • ارخوا لانفسكم يرحمكم الله • واحد بحب ضفاري • قال لي ياسلك خلوا ضفاري يدخل الكوره • قلت ليهو لأ • قال لي عليك الله • قلت ليهو خلاص 000 لكن يدخل طابق شاخور • قال لي طابق شاخور ده ضفاري الا يدخلوا بطياره , ياتو بوابه القدر ده ! • قلت ليهو خلاص مايجي بكسر بيبانا • اقول ليهو شيرين • يقول لي بت الخلا • اقول ليهو نانسي • يقول لي بت الخطه الاسكانيه الجديده • انتوا ديل فنانات ولا حافلات مواصلات اساميهن كلها بالسكن ديل • قالوا المصريين عاملين جسر جوي بين القاهرهوالخرطوم • يعني الطيارات حاتشتغل فاضي مليان • هايسات بس • همله والله سلك كهربا علي قدر اهل العزم تأتي العزائم 0000 نعزمكم ! والي لقاء