بسم الله الرحمن الرحيم في السلك [email protected] *فيكم زول شاهد فيلم هندي ؟؟؟؟ *مافيلم هندي بتاع اليومين دي المدبلج *البقولوا فيهو راميش اعطيت المصاري لأخي !!! *فيلم هندي بتاع زمان التقيل السمح داك *الفيلم الزي بيت العرس الفيهو اربعه وعشرين غنيه *والغريبه المطره ما بتصب الا لما البطل يقابل البطله *ويغنوا تحت المطره *يتساككوا ورا الشجره *وما بتسترهم الشجره *تبلوا جنس بله *الغريبه نزله والتهاب ما بجيهم *لي آخر الفيلم ينططوا زي حملان الخريف *ولما يجوا قريب لي بعض *البرق يبرق *برقرق *يقوموا تاني يجروا ويغنوا *فيكم زول شاف فيلم هندي زي ده !!! *طيب فيكم زول سمع بي فيلم هندي زي ده !!! *طيب فيكم زول بعرف ليهو زول شاف فيلم هندي زي ده *طيب فيكم زول عندو قريبو شاف فيلم هندي زي ده !!!! *المهم *آخر فيلم هندي من النوع السمح ده حضرتوا كان فيلم زي الفيلم *في الفيلم في بوليس هندي شنبو زي الساعه تلاته الا ربع *والكرش توريك حال الشرطه في الهند في الوكت داك *شرطة تبلع بدون رحمه *بتاعين مخارجه *البسيطه بتخارجك منهم *ماهنود عاد *المهم *في الفيلم البوليس جا سايق الجيب بتاعهم داك *لقي ليك زول كابيها صاح *يقول للجمل بس *وقف الجيب ورجع خلف *نزل للزول *قال ليهو باجا قانون تم نهي مسكرات *يعني القانون بمنع تناول الكحول *الزول قال ليهو قانون ماد كهيه *يعني القانون مجنون *قانون تم انتراس اين ماي لايف *يعني القانون البدخلو شنو في حياتي *الشرطي قال ليهو تم جريمه باجا بريزون جك *يعني الجرميه دي بتوديك السجن جوه الجك *باجا تم ليره ليت يو قووو *يعني فكفك نفسك *السكران قام اتلايق *شبكو ليك وحياة امي بالهندي *وانت طالبتي حليفه بالهندي *الشرطي كرفس ليك الزول ووداهو النقطه *فتحوا ليهو البلاغ ورموهوا ليك جوه زي الكلب *الهنود ما زينا بجيبوا ناس الحراسات الصباح للقاضي *بخلوهم ليك اظن شهر *الهم مرقوا ليك صاحبنا وجابوهوا للمحكمه *ندهوا الشاكي *كابور اب شلخه *صاحبنا جا خاشي *القاضي قال ليهو تل مي تم باجا ؟ *يعني كلمني اخونا ده مالو ؟ *العسكري قال ليهو *سومينج استريت آي فاوند هيم مسكرات شراب فل تنك *يعني قابلتو في الشارع العام محتسي خمر مليان فل *القاضي قال ليهو *دليل نهي تم لت باجا قووو *يعني لو ماعندك دليل بفكو اسي *الشرطي قال ليهو دليل تم *يعني هذا هو الدليل *وقدم له صورة للمتهم عند القبض عليه *تم شرطي نبيه سير *انا شرطي نبيه يا سيدي *القاضي عاين للصوره وقال ليهو *تم بكجا بجا ايز نوت دليل قانون كهيه *هذه الصورة ليست دليلا قانونيا *بكوز باجا تم نهي تراترات *لانو الاخ ده ماشايفو بتترتح في الصوره *وشطب البلاغ *فيلم كان جميل خلاس *هو في زول بتترتح في صورة !!!!! *المهم *امس تعادلنا مع وادي دجله بهدف لكل *التجربه حسب المعلومات كانت مفيده *والهدف الذي ولج مرمانا كان نتيجة استهتار امير كمال *وزمان قلت ليكم امير لو بطل الثقه الزائده دي مافي زول احسن منو *المهم ان شاء الله يستفيد *والحكم طرد بكري ومدافع من وادي دجله *دي شكوي واضحه يا عمده *اجري الكاف والفيفا *قول ليهم بكري طردوهو ومفروض يرجع للهلال حسب القانون *قانون كهيه *ومفروض يصححوا مسارو *يقيف سنه *سنه يا انا !!!! *بالمناسبه *في مجلات كتيره بتلقي صوره *التعليق عليها بكون * القاتل والمقتول في آخر صورة تذكاريه *يعني الصورة ما بتوري الجوه الناس شنو *الجواك بطل *المهم *بمناسبة القانون دي *تصدقوا في لاعب موقوف من قبل الاتحاد *موقوف لمدة سنتين *قضي سنه *بقدرة قادر لعب الدورة التنشيطيه بتاعت السله *العقوبه رفعوها كيف ومتين وليه *قانون تم نهي كهيه *وسنعود بالتفصيل للموضوع ده *العقوبات بقت زي الاسعار *بترتفع براها *واترفعي *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *بنتونس واحد قال لي الموت بعنيك شنو يا اخينا *قلت ليهو يعني ماشايفني *قال لي اعتبر روحك حي فينا *الموت بعني ليك شنو يا اخينا *قلت ليهو الموت كواريك و كواريك *كواريك في البيت من ناس عزاز لدينا *وكواريك في المقابر بيها يدفنونا سلك كهربا ننساك كيف والكواريك ضربت خلاس والي لقاء
