بعد استيعاب صدمة الزلزال الذي حدث، دعا الرئيس المصري المخلوع -وفي قول آخر المتنحي وثالث المتخلي- حسني مبارك، كبار أفراد الأسرة إلى اجتماع عاجل في حديقة القصر المنيف الذي يتواجد فيه بمنتجع شرم الشيخ، وذلك لدراسة «الوضع الراهن والدقيق» للعائلة. وتحت أشعة الشمس الساطعة التي بثت دفئها في أوصال الجالسين، توسط مبارك الجلسة وعلى يمينه السيدة الأولى سابقا سوزان مبارك، وعلى يساره نجله جمال، وفي الأمام علاء. نظر مبارك إلى مياه البحر الأحمر التي تحولت بفعل أشعة الشمس إلى حبات من اللؤلؤ، وقال: «ياه البحر النهارده حلو قوى، والهوا يرد الروح، مقعدتش في المنظر ده من يوم ما قابلت هنا نتنياهو.. الله يخرب بيته كان وشه وحش عليّا.. من ساعة المقابلة وحصل اللي حصل.. ثم استدار إلى الأسرة وبدأ النقاش.. مبارك في سخرية ومرارة: إزيك يا جمال.. إزيك يا جهبذ.. إزيك يا بتاع الفكر الجديد.. مبسوط دلوقت.. انت السبب في كل اللي حصل.. جمال مقاطعا: ما تزلعش نفسك يا بابا.. أنا كنت بس عاوز أخدم.. وبعدين قدّر ولطف.. مبارك ثائرا: قدّر ولطف!! كنت عاوز يحصل إيه أكتر من كده.. من يوم ما فكرت إنك تورث «الكرسي» والمصايب نزلت علينا.. أشوف فيك يوم.. سوزان تتدخل: بسّ بقى يا ريّس.. ما تزّعلش «جيمي».. مش كفاية يا حبيبي مش هيبقى رئيس.. هوّ يعني كان عارف إن ده كله هيحصل.. وبعدين الشعب هو اللي غلطان لأنه مش عارف يقدر مواهب «جيمي».. والله خسارة فيهم.. علاء: أهو دلعك فيه ده يا ماما هو اللي خسّره وخلاه مغرور.. وعشان كده الناس كرهته وكرهتنا معاه.. وبعدين مش حرام إنكم تميزوه عني في موضوع «التوريث»مع إن أنا الكبير.. جمال ينظر شزرا إلى علاء، وقبل أن يهم بالرد عليه تدخلت سوزان: خلاص يا «لولو».. ما تقولش على أخوك كده.. وبعدين مش انت اللي قلت أنا ما ليش في السياسة.. واتفقنا إن جمال هو اللي «يورث» السياسة والحكم.. وانت «تورث» البزنس والاقتصاد.. وأنا فوق الجميع.. قصدي مصر فوق الجميع.. علاء: ده صحيح.. لكن «جيمي» يا ماما طمع في كل حاجة.. سيطر على السلطة والبزنس وكل شيء في البلد.. ده حتى الكورة اتدخل فيها وكان بيحضر الماتشات عشان يكسب شعبية.. مبارك: وطيّّ صوتك انت وهوّ وهيّ.. انتو نسيتوا وجودي.. بمناسبة الكورة يا «لولو» إيه أخبار عصام الحضري.. عقوبته من «الفيفا» خلصت ولا لسه.. بصراحة الولد ده له فضل كبير علينا كلنا.. فاكرين يوم ما صد ضربة الجزاء من «دروجبا» في ماتش كوت ديفوار وخدنا كأس أفريقيا.. يومها كلنا كنا هناك في الإستاد وظهرنا في الصورة وسط الجماهير الفرحانة وكأننا أصحاب الانتصار.. وحتى سوزان مسكت علم مصر وشجعت المنتخب وده طبعا عمل وطني عظيم.. علاء متمتما في سره: يعني كنت عاوزها تمسك علم كوت ديفوار.. مبارك: لأ صحيح إيه أخبار الحضري.. وكمان أبوتريكة لأنه بفضل تعليماتي طبعا جاب إجوان كتير نفعتنا وتغفر له الحركة «النص كم» يوم ما كتب على ال «تي شيرت» شعار «تضامنا مع غزة».. جمال: بصراحة يا بابا الحضري جدع.. هو كان في السودان وقت الأحداث لأنه زي ما سيادتك عارف مش لاقي نادي يلعب فيه بمصر فراح الخرطوم يلعب في «المريخ».. ولو كان في القاهرة أكيد كان خرج في مظاهرات تأييدك مع كل الشرفاء زى حسن شحاته وحسام وإبراهيم حسن وزينة وسماح أنور اللي طالبت بحرق المتظاهرين بجاز.. لكن أبوتريكة طلع من «القلة المندسة» وراح ميدان التحرير مع «عملاء إيران وقطر والجزيرة وحزب الله وحماس وتركيا» وساند اللي بيقولوا عليها ثورة.. مبارك: الولد ده طول عمري مش مستريحله وباين عليه من «الإخوان».. علاء: بصراحة يا بابا جمال السبب في كل البلاوي دي هوّ وصاحبه الفاسد أحمد عز.. ده حتى يوم ما الناس اتعاطفت شوية معانا بعد خطاب الاستعطاف وإن سيادتك مش هترشح نفسك.. قام جمال وعزّ وكل أصحابهم وبوّظوا الدنيا يوم ما نظموا مظاهرات تأييدك ولموّا ناس ما بتعرفش تقرا ولا تكتب ورفعوا لافتات مكتوب فيها كلام غلط زي «نؤيد موبارك» و «سوذان موبارك وقانون الأسرة» و «لا للبراعدي» يقصدوا البرادعي.. شفتوا الفضايح واللي انتهت بمهزلة غزو ميدان التحرير بالخيول والجمال والبغال.. جمال: يعني أنا كنت كفرت.. زي ما قلت أنا كنت عاوز أخدم بابا.. علاء: انت لسه لك وش تتكلم.. وبصراحة يا بابا، ماما كمان غلطت كتير.. سوزان: نعم يا «لولو»..غلطت في إيه بقى.. علاء: طبعا يا ماما غلطتي.. كفاية إنك كنتي بتتدخلي في تشكيل الحكومات وبتفرضي أسماء معينة زي أنس الفقي اللي خلّى سمعة الإعلام المصري في الأرض.. وبعدين إيه حكاية مجالس المرأة و «كوتة» المرأة في مجلس الشعب اللي صممتي عليها؟ سوزان: كنت بس عاوزة أزود عدد اللي يصقفوا ل «جيمي».. غلطانة يعني.. وبعدين يا حسني لازم توقف «لولو» عند حده.. مبارك: حسني كده من غير ريّس.. باين عليكي من الجماعة بتوع المعارضة.. وفيه حد قالي إنهم شافوكي في ميدان التحرير مع المتظاهرين.. سوزان: لأ لحد كده وكفاية.. ومقبلش حد يشكك في وطنيتي.. أنا صحيح رحت الميدان بس عشان أعرف إيه اللي بيجري.. مبارك:وإيه اللي جرى.. سوزان:كانوا بيقولوا الشعب يريد إسقاط النظام.. مبارك:الحمد لله مش اسمي النظام.. سوزان: وكانوا بيقولوا كمان «ارحل».. مبارك: برضه مش اسمي «إرحل».. سوزان: طيب إيه رأيك إنهم قالوا «يسقط يسقط حسني مبارك».. مبارك: معقوله تشابه الأسماء!!.. وبعدين سيبكم من الكلام الفارغ ده.. قولي يا جمال إيه أخبار الشعارات اللي كنت رافعها على الحزب الوطني زي «مصر بتتقدم بينا».. و «من أجلك أنت».. و «عشان خاطر أولادك».. جمال: ليه بس يا بابا فكّرتني بالذي مضى.. بصراحة كانت شعارات حلوة.. لكن ولاد الحرام حرقوها في المظاهرات.. مبارك: المهم يا فالح هنعمل إيه دلوقتي عشان مستقبلنا.. جمال: أنا رأيي يا بابا ال70 مليار دولار اللي سيادتك خرجت بيهم من البلد.. نعمل منهم مشروعات.. يعني مثلا نشترى جزيرة مهجورة ونعلن فيها دولة مستقلة ب «آل مبارك» ونوّرث فيها الحكم ونطبق الفكر الجديد براحتنا..وفوق كده كام صفقة بزنس والأمور هتبقى زي الفل
