يا واقفة بين آهة فقير وصُراخ منصات الخُطب يا نازلة من عرق البيكدح مطره فوق أرض النُخب يا عايشة بين حلم الزنوج ومطامع أولاد العرب ياضايعة بينات الحروب والساسه وأسياد القُبب لامتين ح تمرقي يا بلد من قسوة الحال الصعب بي غضبة الأرض التفك من روحة كيمان التُرب وتلفُظ براكين السلام زلزال من الماس والدهب من جوفه يطلع كم شجر بدل المدافع واللهب أبنوس بقالد في الهشاب أشجار نخيل يلد الرُطب لالوب بقالد في التبلدي الدوم نكايةً في العنب يصبح مع الصمغ القبيل صادر يعوضنا التعب من قمنا ما شفالنا خير كل البيحكمنا اترفع فوق رأسنا بي زيف الوعود ضيّق نفس حيلنا ووقع نفس الندفنو بقوم سريع من تاني مسنود بالطمع يطلع يسبّنا نكتشف فوق رأسنا نفس الفات رجع لافين وسط دايرة خداع قُبالنا كم جيل إنخدع لا نحنا فادتنا الدروس ختّينا بصمة جيل طلع من جوف معاناة القديم بشعورنا والشوف والسمع لا نحنا شالتنا الرياح في وشيها والعشم إنقطع لا نحنا خابرين الدروب لا وتد معاناتنا إنقلع لا نحنا قادرين بالصبر بنسكّت أطفال الوجع ونحنا البنرفع كل شبر في بلدنا قدامنا انجدع ونلمو زي لحم الجرح لي بعضو ياريت لو نفع قبال ما يبرأ بيتفتح من لمة في عافية إتمنع واتفتّحت فينا الجروح لكن حماسنا ولا خضع غير لله خالق المعجزات وجه المبادئ ولا ركع .. في كل زول ضاق الحٌكم بالفطرة مقطوع العشم فوق كل قائد في حزب قصر الثقة العالي إتهدم صوت الغلابة بكون دوام طالع من الوجع إنكتم قبال ما يصل النُخبة فوق يرجع مستّف بالألم يا وجعة الشعب الشبع بالمغصة لي حد الورم قسوة زيادات في السلع نقصان حقوق حد العدم يا خوفة الشعب الكفر بالجاي في طي العدم مليان مستّف بالزمان غمر المساحات بالندم يا وجعة الكايس جديد في فكرة الشعب إنصدم وياقسوة المليان أمل في باكر الواقف صنم السكة واحدة على العلاج والخُطة تحتاج القسم والذاد عزيمة زول بمش بي عقلو قُبال القدم والغاية قوة زول نبيل في ضهرو ينطعن السهم شان خاطر الجايين صغار ينزف من الإعماق نغم ويغني نحنا فداء الوطن نحنا العبيد نحنا الخدم ..
