سودارس : القيادي ب«دينكا نقوك» في حوار الراهن حول

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

القيادي ب«دينكا نقوك» في حوار الراهن حول « أبيي»

عيسى جديد نشر في آخر لحظة يوم 24 - 12 - 2012

اكد زكريا أتيم نائب رئيس مجلس تشريعي إدارية أبيي السابق وأحد قيادات دينكا نقوك أهمية تمسك الرئيس البشير، ووفده المفاوض ببروتوكول أبيي، والرفض القاطع لأية محاولة للالتفاف عليه. وقال زكريا أتيم إن دينق ألور ولوكا بيونق ينطلقان من أجندة حكومة الجنوب وليس من مصالح أهلهم دينكا نقوك الذين يفضلون التعايش السلمي مع المسيرية. وقطع أتيم بعدم تبعية أبيي في أي عهد من العهود لجنوب السودان مشيراً إلى تراضي قبيلة المسيرية لإستضافة دينكا نقوك 1905م ،حيث تتبع المنطقة لإقليم كردفان آنذاك، ولفت الإنتباه إلى أحقية قبائل المسيرية للتصويت في الاستفتاء المقبل حول تقرير مصير أبيي !! باعتبارهم مواطنين أصليين بالمنطقة.
حدثنا عن موقفكم كقيادات في المنطقة من ما يجري فيها من أحداث ؟؟
نحن كقيادات في أبيي سوف نحل المشكلة بدون قوة أوسلاح «لانه دا ما صح» وهو اتفرض علينا بجر المنطقة الى مشاكل تانية عشان كدا نحن بنطالب بحل سلمي وتعايش سلمي يعني بالحوار البرضي الجميع من دينكا نقوك ومسيرية والقوة ما بتحل المشكلة ! واذكر حديث الرئيس البشير حول أبيي وتمسكه ببرتوكول أبيي، ورفضه الالتفاف حوله، ودا كلام كويس الرئيس البشير ونائبه علي عثمان طوالي بردد فيهو، عشان كدا نحن كمان نقول للحركة الشعبية( إنوا دا حل بتاع اتفاقية سلام، ومش لازم الإلتفاف حوله ..وكما لو حدث استفتاء نحن مع تصويت المسيرية، لانهم جزء من المنطقة، ودا كلام بتاع تاريخ مش كلام بتاعي انا أومغالطات بتاع حركة شعبية، مفروض يخليها فنحن متعايشين مع مسيرية من «جدود جدودنا» والقصة هذه كل الناس عارفنها .....
مقاطعاً ...لكن هنالك تحرك من أبنائكم من دينكا نقوك ومن قيادات الحركة الشعبية لتدويل قضية أبيي؟؟؟
دا صحيح !! ونحن ما راضين ! ولا موافقين بالبعلموا فيهو دا وهم دينق ألور ولوكا بيونق، لانهم متحركين بين الخواجات عشان تدويل للقضية، ودا فكرة بتاع الحركة الشعبية وأقول إن الناس في أبيي ما كلهم حركة شعبية فنحن في أبيي ومن قبيلة دينكا نقوك ايضاً ولدينا راي سياسي واضح بان (أبيي منطقة تعايش سلمي) كما قال التاريخ وعلى حكومة الجنوب ان تعترف بذلك وأن التاريخ كان بيقول اننا عشنا فترة تعايش دون حروب وأجدادنا كانوا يدفعون «الطلب» في كردفان و«الطلب» زي الضرائب وحتى زعيمنا دينق مجوك حتى وفاته كان بدفعها لكردفان، ودا تاريخ ما مزور، وحقيقي نحن عشناها ..عشان كدا ما دايرين تدخل أجنبي وتدويل للقضية ..
هل تقصد أنكم راضون بالحل الافريقي لقضية أبيي ؟؟؟
نعم الحل الافريقى أقرب لنا من الاوربي لاننا في افريقيا لدينا أيضاً المفكرين والسياسيين !! و«القضية لما تطلع بره بكون في أجندة تانية ومصالح تانية ما معروفة» وأنا بقول على حكومة السودان وحكومة جنوب السودان يعملوا لينا حساب ويسألونا وياخدوا رأينا نحن «كقبيلتين» وحتى الإتحاد الإفريقي كمان ودا شيء مهم ، لأننا نحن من نعيش على الأرض، ونعاني مما يحصل، ونحن كقيادات وزعماء قبائل من القلبيتين لدينا حوارات للتعايش السلمي وليس كل الناس مع رؤية الحركة الشعبية !! وأنا كنت في إدارية أبيي سابقاً، وأعرف ماذا يريد الناس ..الناس تعبت من الحرب، وعايزه تعيش بسلام، ودي رسالتنا لكل الناس في حكومات بتاع شمال أو جنوب سودان، أو مجتمع دولي أو إتحاد افريقي كمان ..عشان كدا نؤيد الحل داخل البيت الافريقي وباجتماع الجميع على راى واحد دون محاباة أو تحيز ..
الآن الإستعدادت تجري لإعلان إدارية أبيي، وأنت كنت عضواً سابقاً في المجلس التشريعي لأبيي كيف ترى ذلك ؟
تعيين الإدارية مهم عشان نعمل تنظيم لحياة بتاع الناس، وحفظ حقوقهم بالمشاركة بتاع أمم متحدة، من قوات اثيوبية للنظام والأمن وأنا بقول إننا من جانبنا كدينكا نقوك نريد ان تكون مشاركتنا مناصفة مع المسيرية في حكومة إدارية أبيي من حيث الأعضاء يعني لو عينوا عشرة أعضاء المسيرية خمسة، ونحن دينكا نقوك خمسة واقصد نحن دنكا نقوك قيادات أبيي غير التابعين للحركة الشعبية، واتحدث هنا كقيادي سياسي ومشرف من المؤتمر الوطني بمنطقة أبيي أما ناس الحركة الشعبية، فهم يمثلون على طريقتهم في الإدارية ! لكن المهم تشكيلها بسرعة ! حتى يتم الإستقرار وتكتمل التنمية، ويكون التعايش السلمي والاستقرار بين الناس ..فالناس تعبت من الإنتظاروالحروب..
رسالة أخيرة منكم كقيادات لها رؤيتها ؟؟؟
أنا بكرر إنو ما كل دينكا نقوك حركة شعبية ناس أبيي عايزين سلام وتعايش سلمي، أتركونا نختار طريقة حياتنا بدون حرب، ومافي داعي حركة شعبية في جنوب السودان «تودي مشكلة الى ناس بره زي لاهاى تاني أو محكمة دولية ...نحن قادرين نحل مشكلتنا، وكمان حكومة بتاعنا في السودان لازم تستعين بنا عشان عملية بتاع سلام دا كبير، ومحتاج لكل الناس ..

انقر هنا لقراءة الخبر من مصدره.