مادعاني لإثارة السؤال أعلاه هو ماحملته الأنباء في الأيام الماضية بعودة السيد الحسن الميرغني الى وظيفته بعد غياب دام ستة أشهر (عديييل كده)، وحسب قانون العمل للعام 1997م إنه الغياب لمدة خمسة عشر يوماً يقود الى الفصل، لكن عاد الحكومة دي مابعرف قوانينه !!! طيب خلينا كله ود الميرغني غايب عن العمل ومخصصاته سارية ولا بدون مخصصات ؟؟ كان بدون مخصصات ما نأسالنكم من الغياب الطويل ده لكن كان مدفوع القيمة، اريتو حال السرور يعنى يا اخوانا مخصصاته دي والله كان أجرتو بيها كم عربية وعمال من سوق الله واكبر ده لنقل جبال النفايات هذه التي تسد علينا الأفق في غدونا ورواحنا، إن شاء الله تشيلوا النفايات دي من شارع واحد برضو انجاز الباقي الله كريم. سؤال آخر الضيوف الحضروا فعاليات ختام الحوار الوطني وشنو مابعرفوا داك كانوا بيسلكوا ياتو طرق مع أكوام النفايات دي؟؟!! أهاااا نعود لموضوع ظهور ابن الميرغني بعد كل هذا الغياب، وأقولها صراحة مافي شيء مرجع البلد لي وراء غير المجاملات دي، يعني الحكومة تصالح حزب، ولا حركة مسلحة ويدخلوا معاها في شراكات ووزارات يكونوا ممنوعين من الصرف ممنوع الانتقاد، وأنا لو مكان ود الميرغني بتنحى وبفوت طوالي والله لأن الغياب الطويل ده طالما ماعمل ربكة في ملف ولا أي شيء، يبقى فوق كم يعني ؟؟ يكفي وعد المائة وثمانين يوم الذي وعد به الشعب السوداني قبل كده، ويكفى أن الحزب الاتحادي كان على سدة الحكم، قبل ناس المؤتمر الوطني ديل أها المحصلة شنو يعني هل عودة الحسن الميرغني من ضمن مخرجات الحوار وتشكيل الحكومة الجديدة؟؟ إن كان كذلك كان تستقيل وتعود الآن مع الأحداث الجديدة دي، وكلنا في انتظار الحكومة الجديدة والوجوه الجديدة يعني ياناس المعارضة الخاشين في الحكومة الجديدة ده محك خطير كان ما أصلحتوا عوج الحكومة القديمة تبقوا اتلومتوا واتكومتوا يعني ماتملونا (منضمة) صراحة زهجنا من الثرثره، في سر خطير دايره ابوح ليكم بيه غايتو كان الله حيانا والموت خلانا ح ارشح نفسي في انتخابات العام 2020م بإذن الكريم، ومن هسه بجهز ليكم في الوعود أها كان قدرت نفذتها الحمدلله كان!!! ماقدرت ماضرورى يعنى بقت على أنا؟؟