أدينى خاطرك والسلام.. ما لي معاك أبداً كلام أنا كنتا شايلك للظروف.. ووهبتك الحب والغرام كم بي وراك شفتا العذاب.. وكم مرة جافاني المنام وبقول عليك إنتا الفريد.. والبينا أحلام واحترام لكن مع الأسف الشديد.. ما كنتا قدر الالتزام فارقتا درب المتقين.. باريت براك درب الحرام ***** علمتك الحب الحلال.. وريتك الود والوفا لوّنتا ليك الأمنيات.. خليتا خضرا ووارفة ورسمتا ليك عش السرور.. فى صورة زاهية ومترّفة والليلة تظلمني وتجور.. على ريدة صادقة ومنصِفة؟ أنا ما بقول إنتا القسيت.. ولاّ النسيت زمن الصفا لكن براي.. خليت هواي.. صدّق عيونك ووالفا ما كنتا قايلك يوم تخون.. وكل المواعيد تخلفا أديني خاطرك والسلام.. أديني خاطرك بس.. كفى **** سكتنا صبحت سكتين.. ما أظن نعود يوم ننسجم أديني خاطرك والسلام.. أديني خاطرك وابتسم مبروك عليك دنيا الجحود.. على قدر ما جواي ألم كمّلتا فيك كل الكلام.. والليلة جد كِمل العشم ما داير أتوسد أساي.. ولا أستبيح دمع الندم ولا داير أحكي لكل زول عن ريد كبير فجأة انهزم وأملأ المساحات بالحنين.. وأملأ البراحات بالسأم أنا داير أعيش واقع وفاي.. ما داير أكون باريت وهم أديني خاطرك ويلا فوت... أنسى الدلالات والقيم ما داير أشوفك من جديد.. ولا حتى أحلم بيك حلم تلويح: تديني خاطرك لي شنو؟.. الذي كان رادك منو؟