وينك.. فقدتك.. مسجل غياب؟! وسايب قلوبنا وراك للعذاب.. نسوق ذكرياتنا ونباري الرهاب نفتش طريقك برغم الضباب ونسأل عليك البعاد والقراب متين ياحبيبنا.. متين الإياب؟ (2) يا زول خرافي ومختلف ما قادر اكتب فيك حرف أنا ياخي كاتلني الولف وانا جد بحبك ومعترف وداير أقول للما عرف قصة هوانا من الألف (3) الريد جوه قلبي معجون بالأسى... والزول البريدو من تبيت.. قِسا.. إتجاهل هوانا وللأحلام نسى... نام صبح التمني في حضن المسا (4) أنا ذاتي ما جاياك.. جابنى الدرب بالريد.. جدد علي ذكراك شفتك صباح اليوم.. في حوش أخوي بهناك نفس المكان الكان.. أنا فيهو بستناك في الحيطه ديك حرفين.. ناحتنهم يوم داك والصوره حتى الآن.. في خاطر الإدراك مع إني قلتا أكيد.. يومين وحا أنساك لكن لقيت الشوق.. جواي بيتحداك وتلقاني رغم البين.. يوماتي بتمناك ساسقتا بين حوشين.. كان مره بس ألقاك واتجاهل الإحساس.. واعملني ما شايفاك وكان قلتا جابك ايه ؟؟! أنا ذاتي ما جاياك (5) الدنيا دار ما بتستحق.. بيبانا فاتحا غرب شرق.. كل زول دخل فيها ومرق... جاري ويكابس في الخلق.. وجبينو يتصبب عرق... وما خلى ذكرى سوى ورق.. { تلويح: هي رسائل قصيره.. أتمنى أن تورق معانيها البسيطه بقلوبكم.. والسبت.. أخضر