خايف علي من زول .. أمين .. رقيق .. فنان؟! حارمني من حنك .. من ريده بالألوان ليه فيك يسوء ظنك.. وأنا فيك لقيت الراح والراجي ليَّا زمان؟! اسقيني من دنك .. مشواري ليكا طويل ووصلت ليك عطشان.. ياراقي زي فنك .. علمني إحساسك .. أسمو وأكون إنسان عارف معاني الريد .. ينضح جمال وحنان خليني بس جنبك .. وأنا واثق إنو هواك عامر وكلو أمان وأنا قلت ليك إنك .. جددت فيني الحب خليتني بيك فرحان شلت الكلام منك .. رسلتو ليك إحساس رجعتو لي ألحان أرجوك بعد إذنك.. أنا بيك بقيت مغرم وداير اغسل الأحزان وأنا عندي ليك أحلام .. مليانة بالتحنان مزادنه شوق وهيام وأنغام كمان .. وكمان { تلويح: إلى كل الصادقين المخلصين في نوايا الحب، والذين يخشون على المحبوب من حظهم العاثر وظروفهم القاهرة، إليهم أوكد أن الحياة أقصر من أن نمضيها في عذاب الضمير لدرجة قد تؤدي للحرمان من كل جماليات الحياة التي لاتنتظر طويلاً، (فلاتخافوا) من الغد قبل أن يأتي، فربما لا يأتي وتكون السعادة قد تبددت في قلق مؤلم!