حوار بطعم الفراق مع مدحت الحلاّق ماذا يعمل الأخ مدحت؟ - أنا شغال حلاّق.. يعني بقُص. حلاّق حي ولاّ محترف؟ -لا لا حي شنو يازول، انا حلاق «رسمي» و«قانوني». يعني في حلاق «قانوني» وحلاق ماقانوني؟ - ايوة في. الفرق شنو بينم؟ - «القانوني» دا ممكن يحلق ويحلق وإقُص ويقُش، دا كلو بسويهو ولمن ناس الكشة يجو يبقى معاهم ، ولمن لجان التخطيط تجي يبقي معاهم، يعني ممكن يدفن دقن مع أي جهة قانونية دا لو ما سووه رئيسم، لأنو قانوني، او على الأقل بلقى زول من ناسو معاهم.. شفت كيف.. هل انتو عندكم تقسيمات داخلية للحلاقين؟ - نعم الحلاقين أنواع في نوع ابكريق والخلاط والبلدوزر والدفّار والمستشار.. قلت المستشار ولاّ المنشار؟ - مافرقت ما كلهم واحد والمستشار دا عندكم خلاص يعني أخد المعاش؟ - ها زول ها انت مانصيح دا بنزل معاش، دا كدا اجدع حلاق بقُش قش نضيف صالونات الحلاقة دي كلها بكسحها، ودا ممكن يحلق ليك ويقطع أضانك، ويشيل مقصو دا يحشرو ليك في بطنك ويخليك تنزف لمن تموت وفي النهاية يقولو ليك دا خطأ إداري بسيط.. «قاطعته» لكن دا ما فعل جنائي واضح ما داير درس عصر؟ - إنت مسكين ولاّ شنو النوع دا حالة استثنائية، ممكن يحلق ليك ويغيّر ليك اسمك كمان وبطريقة قانونية تبدأ من مستشفى الولادة، انت بتلعب ولاّ شنو ...المشكلة «يصمت » .. المشكلة شنو؟ - المشكلة إنو الصحفيين أغبياء ما بفرقو بين الأخطاء الإدارية والأخطاء الجنائية البعاقب عليها القانون.. لوسمحت ادينا أمثلة للأخطاء الإدارية الناجحة؟ - ممكن يجيك زول أو جماعة أو مؤسسة مافرقت، تحلق ليهم كلهم وتدخل إيدك دي عديل كدي في جيوبم وتنشلم عيان بيان، صحيح هوالكلام دا خطأ لكن خطأ إداري. هسع إنت ياتو نوع من الحلاقين؟ - أنا مستشار طبعًا، وأنا تاريخي معروف في الحلاقة دي، بقيت أنتقل من صالون لي صالون ولوسألتو اي زول من «الإخوان» حيقول ليكم حلاقتي «متخرش المية» وبحلق عديل دون اي تردد. أطرف موقف مرّ بيك؟ - مره قصّيت أضان واحد اشتكاني لي ناس الحارة، ناس الحارة شكلو لجنة رئيسها «فردتي» موت وبقية الأعضاء فوضو صاحبي دا ذاتو، وبقى يسوط ليك براهو في اللجنة.. اشخاص لهم فضل في تعليمك الحلاقة والقص؟ - كتيرين وأنا ما داير ادخل في احصاء عشان ما أنسي اي واحد من «الإخوان» لكن أقول بكل صراحة المناخ العام مشجع جدًا للحلاقة. ماذا وجدت من الحلاقة؟ - عداوة الصحفيين. ليه؟ - ديل ياخي مابخلونا علي حالنا، مدحت حلق لي فلان بطريقة فيها مخالفة للعادات مدحت فعل ترك. {}{ إهداءات خاصة من صديق محمد إسماعيل للصادق المهدي إنت سالي جيلك وجيلك ما سلاكا إنت بتتجلى حليك وما بتجلوك حلاكا كيف «الامة» تهوي وتعشق بلاكا يامراهم جروحا ياملكا وملاكا من الصادق المهدي لصديق محمد اسماعيل ريدك باقي ليا نصيب وغيرك ما في ليا حبيب بعيد مني ومعايا قريب ... أشيل ريدك وأضموعلي