شهد الأسبوع المنصرم جدلاً كثيفًا أثارته تصريحات صحافية، وأخرى تلفزيونية لوزير الخارجية علي كرتي، والتي قال فيها إن أمريكا دولة منافقة، وإنو هو كوزير خارجية كان آخر من يعلم بالسفن الإيرانية اللي وصلت البحر الأحمر!!! وجات عليها تاني حكاية أن كرتي رفض مقابلة سفراء غربيين تعاملوا بالمثل، القصة دي يبدو أنها والله أعلم عجبت دكتور نافع شديد، وعلي أي حال، أنا لم أستبعد أن يكون دكتور نافع اتصل بكرتي وقال ليهو: هيييع عفيت منك، هاآآآآ ما جنا، ولم أستبعد كمان حسب السيناريو الفي راسي أن يكون نافع أنشد أبياتًا من الدوبيت عبر الهاتف وهو يهاتف كرتي يقول فيها: اللييييل، الجنا المن الأمريكان ما همّا خَلَفْ ساقو في قناة النيل وطَبَقْ النّمَّة قلبي معاك، ضُراعي معاك بي كُلْ همّة إيدك معاي يلاك نَطُرْد الرِّمّة هيييينع، عفيت منّكْ آآالكلس ... دا الكلام المفروض تقولو من أول يوم مسكتا فيهو الخارجية، عندما فرحنا وقلنا جاها فحل مشالخ وماصع ما بطلع منو إلا الهَدِرْ الما خمج.. نحنا قبيل شن قلنا، ما قلنا أمريكا دي دولة منافقة، ومفترية، افتراء وقلة أدب كمان، أنا الكلام دا لمن زمان قلتو قعدتو تسووا ليْ دبلوماسية ومرونة، ولغة المصالح، الناس ديل ما بنفع معاهم إلا الدرش الزي دا، هسي من زمان لو خليتوني «قرايشون» دا قرشتا ليكم إضنينو الزي رفارف التركتر ديل، ولاّ كان قرشتا ليكم نخرتو الزي الكدوس دي كان الناس دي استعدلت معانا كويس، لاكين إنتو في الخارجية رقدتو ليهم صلتة من أول يوم ودا كلو ما نفع معاهم... علي أي حال يا أبو علوة الآن أنا مبسوط منك، أكتر من الشريف بس ما تمشي تسوي حكاية الشكروهو رقد نام، تاني طوالي اقطعو معاهم كدي بس ناشف، ما تمش تمْبرمْ ولاّ تهرش ما داير أقول ليك تنبطح تفتكر المتصل بيك الطيب مصطفى... يله مع السلامة يا أبو علو يارائع...