السودان يفرخ الرؤساء ولكن! يقال إن محمد نجيب والسادات لهما أصول في السودان وأخرى تقول: ما بنختا من «طنطاوي» وعلي عبدالله صالح قالوا كان من حي العرب ودكانهم موجود بسوق العناقريب.. وقالوا هيلاسلاسي احتمى بالسودان قبل ان يعود امبراطورًا وحتى حكام تشاد السودان مكنهم من حكم بلادهم وأوى السودان رمز النضال في إفريقيا «مانديلا» ومعظم ثورات التغيير انطلقت من السودان في إفريقيا. لكن آخر تقليعة جابتا الجرائد أمس الأول أن التلفزيون الإسرائيلي كشف أن رئيس الحكومة «بنيامين نتنياهو» ذو أصول سودانية «لا حول ولا قوة إلا بالله العلي العظيم».. وقالت إنه ولد بمدينة حلفا، وأضافت أن اسمه الحقيقي هو عطا الله عبدالرحمن شاؤول «حسبي الله ونعم الوكيل» .. ولديه شهادة ميلاد سودانية.. يا ربي الداية اسمها منو؟ والوقع على الشهادة الشقي ده منو؟ وأضافت أن له أقارب يحملون البشرة السمراء الإفريقية من الدرجة الثانية.. ده يكون لون شنو؟ وأخيراً عرفنا السبب الطرد عائلة نتنياهو من السودان كما ذكرت قناتهم.. قالوا حينما منع نميري تعاطي الكحوليات وإذا عُرف السبب بطل العجب. السودان يفرخ الرؤساء حقاً.. لكين ده كان معشعش كيف؟ مسدار قد القفة الأسعار تواصل للعلالي صعوداً فارقت النزول بي رجعة ما موعودة نضفت الجيوب القفة زايدة قدودا كبرت يا الخضر فاتت زمان لي حدودا
