الأمومة حلم يداعب مخيلة كل أنثى... وأن يظهر في العائلة مولود جديد هذه فرحة تهم جميع العائلة، ويزداد الاهتمام به منذ أن كان في رحم أمه إلى أن يخرج ويصبح مولودًا صغيرًا يوضع في أيادي الكبار ل (اللولاي)، ويشرع أفراد العائلة في تحديد مستقبله في الدراسة والعمل وحتى الزواج، ويتمتَّع الصغير بفترة تحفُّها كلُّ الأشياء الجميلة كما قالت امرأة: (ما برحِّل بتي إلا تتحدث براها) والمقصود أن تتكلم مع مولودها عن طريق (اللولاي) . لولاي بت الفكي الحاجة هديَّة بت الفكي نور الدائم تتمتَّع بالكلام المعسول البطيِّب الخاطر وتقابلك بكلمة (حبابك انت... وجدك مرق الرجال من سنة ستة) وإذا قلت لها صباح الخير يا حاجة ترد: (تصبح مع عروسك والخير إحوشك).. تحب الدندنة والشكر والوصف للميت، ولكن أكثر ما تتميَّز به (لولاي) الصغار، وكل أطفال العائلة تمدحهم وب(لولاي)... كانت لنا معها جلسة صغيرة عن (اللولاي)... أخذت حفيدها (أحمد) ووضعته بين يديها وبدأت (تلولي) بصوتها الجميل وكلماتها الحنينة والحزينة التي أثَّرت في قلوبنا. بتقش مني الدرين (برية لول لولك انت ببالك... وفي عطبرة خالك... برية لولك عشمانك ما صدى.. برية لولك وحبوبتك منى في جدة... برية لولك حويتك شيخ الشوتلاب.. برية لول لولك وجدك الطيب ما كضاب... برية لولك وخالتك منى بتعرف العتاب... برية لولك وديوانك فيه الأصحاب... برية لولك يا هجاجي حويتك في أبو غرة برية لولك وبتحل لي الصرة... برية لولك سيد البقرة أم غرة... الحبيب فيك الظن ما بخيب ونظامك بالترتيب... برية لولك دقيت لعروسك الخروس... وخالتك بت ابو الروس... برية لول لولك بتدي ما بتراري.. برية لولك وبيتك فيه الدخاري... برية لول وخالتك بتدي ما بتراري.. برية لولك وجدك ود تواري... برية لولك حويتك سيد بغارة... برية لولك وجدك عباس الحتالة... برية لولك حويتك راجل القلعات... برية لولك وبتدي المسكين الفات... برية لولك بتسند العوجات... برية لولك وبتجي في بيتي ما بتهاب... وأهلك في العجباب... برية لولك حويتك راجل السبيل... برية لولك وخالتك إعرِّسة مدير... برية لولك صرفت الماهية وحبوبتك غاية ورية... وبتدي المسكين خالتك الهدية... برية لولك امك بتعرف قدري ومرة خالك البدري... برية لولك ود الصحفين وبنيت البيت مرين... برية لولك ما بتعرف الدقلش وجدك ود عباس ومنه الحد خلاص... برية لولك. من برة بجيب وفيك الظن ما بخيب حويتك شيخ أمين وحبوبتك عابدة في الجعلين... برية لولك وبتقش منى الدرين... وحبوبتك آمال في الكاملين... ياب سرار وسيد البقرة أم عقال... برية لولك حويتك راجل السبيل... وخالك الفنان قنديل... برية لولك بتصلح البنكسر برية لولك وبتقرأ في مصر وامك لي بتنعصر... برية لولك حويتك راجل الصية... وحبوبتك السرة مابتدي الشوية... وبتنعصر عليه برية لولك... حويتك راجل الصي برية لولك.. وخلانك مهند ولؤي برية لولك. حويتك خالتك أم شباك اللول لولك... وجدك حاج الجاك... وجيتك من هناك... برية لولك من برة بجيب يا الفيك الظن ما بخيب... برية اللول لولك... وبتعرف حظ النسيب... برية لولك ابواتك في المسور وتطلع دكتور... برية لولك يا عشاي وحلبولك لبن الشول... امك حسينة وبوك قدمو بجينا لولك ياعشاي. البس الكرفتة سادة واركب العربية لادة ومن اللولاي أيضًا ماتردده معجبة بابنها، تقول: بكرة تكبر بالزيادة... وتبقى دكتور في العيادة... تلبس الكرفتة سادة... وتركب العربية لادة... دة جناي والله عالم اكبر... وابق حاكم وابقى قاضى في المحاكم... ياربي فيه الشقة والرجالة... ودي ترباية امو الحارة... وحبوبتو مابترضى الحقارة... ياحمادة اقرأ المدرسة... جيب الطب والهندسة... وابني لي عمارة مكندشة... وليلى علوي برة مقرَّشة. نحن صغار إيه ذنبنا وهنالك لولاي آخر وهو دوحة (يا دوحة بير زم زم قدوها والحجاج شربوها... بابا سافر مكة... وجاب لي قطعة كعكة... والكعكة في الصندوق والصندوق... عايز مفتاح... والمفتاح عند النجار... والنجار عايز قروش... والقروش عند السلطان... والسلطان عايز عروس... والعروس عايزة المنديل... والمنديل عند الأطفال... والأطفال عايزين لبن... واللبن عند البقر... والبقر عايز الحشيش... والحشيش فوق الجبل... والجبل عايز المطر... والمطر عند ربنا... ونحن صغار إيه ذنبنا... النوم تعال لينا... قش دموع عينينا. شال الشهادة وفتح العيادة ويختلف اللولاي من شخص إلى آخر والكل له طريقته الخاصة في التعبير عن الإعجاب بأطفالهم، فمثلاً العمَّة زهرة تنادي حفيدها سليمان والده بالخارج وتقول له (التنقر قام... وسكن الدمام... التنقر كبر وزاد... وسكن الرياض... أما إنصاف فتقول: النوم النوم بكريك بالدوم... النوم تعال وسكِّت الجُهال... بكريك بريال)، وهنالك يختلف على حسب المرحلة فيدعون له: ابقى لي دكتور وسمح القول ويبقى لي هدي ورضي ابقى سفير ووزير ابقى لي مهمة وارفعني في الملمّة.. أما هادية فتنادي طفلها حمتو حمتو ركب عجلتو... وروَّح مدرستو وجابة هندستو... البيها ونَّستوا بيها وحدثتو... حمادة السكر زيادة شال الشهادة... وفتح العيادة... حلاتو حمادة... ومكتبو في القيادة. لولاي الفشخرة ومن الطبقات الراقية: التنبشوها... وفي القاهرة قرُّوها.. ولي فقران وعدمان ما بدوها... وحجز السايق دور أبوها يا جدو اقرا المدرسة اقرا الطب وجيب الهندسة وابني لي عمارة مكندشة وليلى علوي برة مكندشة... حلاته تمبشوها ولي عريسة برة سفَّروها وخدمه في المطار اتلقّوها... ولي القصر ودّوها... والأميرات استقبلوها... حلاته رهف... وخُتَّابة واقفين صفّ. (تمبشوها) من تمْبش تَمْبوش وتَمْبُوشة هي كلمة تمليح للولد والبنت الصغيرين وقد تطلق علماً على الأنثى تَمبُوشة. قال الحردلو: وا حرقة حشى أمّه إن كِتِل تمبوش. من العين يا عين يا عنية يا كافرة يا نصرانية... إن جيتي الصباح وإن جيتي العشية.. وعين الحسود فيها عود.. وعين الفتى تقد الواطة... وخمسة وخميسة... والله أكبر... اهرشك... النوم النوم بكريك بالدوم... النوم تعال سكِّت الجُهال... وتقول آمال: طلع القمر أخوك يا ثمر... وجاء الصباح أخوك يا سماح... ولدي شات الكورة... وخالتو نورة... ولدى العسُّولي بريَّة ودهب الوقيّة. بري وما بديها العسكري وتقاطعها الأستاذة روضة: بتي وزيرة وسفيرة وأميرة... بري هي ما بتفتري.. بتي جاها مدير ورفضنا واديناها سفير... وهي حنينة وهي كنينة ما بديها عرب القطينة... وعريسة ما قريب لينا... السمح ولدي ولدي الرزانة والدخري... بتعليمو هزّ بحري... السمح ولدي... بقضي لي غرضي... حبيبي الغالي بستر حالي... وعزيز عليه زي عينيّ حبيبي التن... شجر البن... حبيبي ليه اكبر اترسل ليه وادفع لي من عيالو بنية ولدوها في الراهبات وحبت في البلاط... ولادة العز ورضعة بز. السريرة لقلبي بتسُري... مسَّختي البنات من الجزيرة لمداين بري... وتقول أخرى لطفلها الذي تخاف عليه من العين: حسن البواسي الخاتي والمقصود بحسن الشيخ حسن ود حسونة.