ولكن سأعود لفيتا غداً إن شاء الله عودة حميدة ولكن اليوم احدثكم عن اعترافات احد الاهلة الشرفاء اعترف بما يجيش بخاطر كل الاهلة ولكن فقط تنقصهم الشجاعة في الافشاء عما بدواخلهم جهراً برغم ان احد كتابهم صرح بما بداخله جهراً مرقت منو غصباً عنو المهم الاعلام الهلالي يشن من الحرب اعتاها ضد جمال تارة يتحدثون عن الوطن وتارة يتحدثون عن البرلمان وتارة يسألون من اين لجمال بهذا وكل ذلك سببه الاساسي الغيرة من المريخ فهم يعلمون جيداً ويقتنعون بان جمال مكشب اداري كبير على الاقل في توفير الأموال التي يحتاجها النادي فوراً ففي عهد جمال لم نسمع بالمريخ متهماً عند الفيفا ولكن في عهد جمال كلو يوم نسمع بالهلال مدعى عليه عند الفيفا يوم في مؤخر صداق ويوم في نفقة متعة اللاعب يشتكي والمدرب يشتكي والتسويات التي تمت بين الهلال وخصومه امام الفيفا تفوق في عددها التسويات التي يجريها ناس المرور في سنة كاملة فمخالفات المرور معظمها تحل بالتسويات الاهلة زمن صلاح ادريس كانوا لو دايرين موز والموز متوفر في الطبالي جمب باب الاستاد فالمنطقة التي يقع فيها الاستاد عبارة عن سوق شعبي باعة متجولون آخرون يفترشون الارض برغم كل ذلك ينتظر الاهلة عودة بابا صلاح من السعودية عشان يجيب الموز ولسان حالهم يدندن ماما جيه جيه بعد شويه جيه وجايبة معاها لعب وحاجات ومديونيات الهلال الداخلية تفوق مديونية حكومة السودان كل ذلك ولم نسمع ان المريخ يجابه تلك المشكلات المادية ولذا فشفاش الاهلة داير يتحرق من وجود جمال على رأس دفة قيادة المريخ وغيرة كده بقوا يشنوا الحرب عليه تارة وعلى المريخ تارة وزي ما عارفين المقولة الشهيرة لاحد كتابهم واشدهم عداوة ضد جمال عندما قابل جمال صدفة وقال له والله يا ريس مشكلة معاك ما عندنا، بس تسيب المريخ ده المهم امس قابلت احد الاهلة في مناسبة اسمه عبدالعزيز احمد خليل قال عبدالعزيز بالحرف الواحد ادونا جمال والله نغلب برشلونة والريال الراجل انفعل فاعترف جمال يمثل شخصية ما ليها مثال في مجتمع الهلال لذا يتمنوهوا او يحاربوهوا ليترك المريخ ايها الناس ادارة الاندية قسمان جلب الاموال للتسيير وادارة تلك الاموال اثناء التسيير على الاقل نتفق جميعاً في اداء جمال للاولى بنسبة الامتياز قفل المجموع وان كنا نختلف على الثانية منا من يرى ان جمال نجح فيها الى حد ما ومنا من يرى ان جمال قد فشل فيها الى حد ما ومنا من يرى ان الرجل فشل فشلاً ذريعاً فيها ومنا من لا يرى نجاحاً لجمال في الاولى والثانية ومنا من يرى ان جمال قد نجح في الاتنين نجاحاً منقطع النظير منا دي راجعة لينا نحنا المريخاب نادينا ونقيم ناسو بي طريقتنا ولكن الراي عندي ان حرب الاهلة على جمال دليل نجاح للرجل فيا اهل المريخ عدلوا ولا تبدلوا تعديل يناسب دونما تطبيل افضل من تبديل يريح الخصوم المهم راجين الراي في تسجيلات المريخ الاخيرة وراجين تقييم للمجلس فيما يتعلق بالتسجيلات الاخيرة وراجين تصفية النية صفوا النية نعود للهوية والبطولات الجوية وتبقى نجمتنا كما عهدناها قوية براقة وندية اها نجي لي شمارات والي الخرتوم كان شفت يا والينا زماااااان عندنا حبوبة لينا رحمة الله عليها وعلينا تلقانا بنتكلم عن موضوع بانفعال شديد تقوم تقول لينا شنو هو ؟؟ نقول ليها كذا لما تعرف الحاصل تقول إس إس استخفافاً منها بالموضوع يعني الموضع فارغ و ما بسوى نقاش قدر ده يا والينا نحنا بقينا زيها يا والينا اي خبر نقول إس يا والينا اجتماع فوق العادة للوزراء إس الحكومة تجتمع لمناقشة اسعار السكر إس الحوار وما ادراك ما الحوار إس اكتشاف بحيرة بترول إس تغيير الزي المدرسي القديم بزي جيد إس اعادة الزي المدرسي القديم والغاء الجديد إس عائدات الذهب مليارات من الجنيهات إس الاحزاب تقرر وتقرر وتقرر إس و إس و إس نحنا ذاتنا إس يا والينا سلك كهربا ننساك كيف وكلنا بقينا إس والى لقاء سلك
