أمدح معاي قول يا لطيف *** ناس تندرش ناس تنكرش ناسا ملس .. ناس تجري لامن تندرش ناس تنجمع ناس تنطرح ناسا رزق بس بالهبش تلفون هلو والحظ يهش ناس فاتحة للتموين عرش دكان عديل حدو العرش قول يا لطيف *** قول يا لطيف .. للشافع الدابو اتولد اتأخرت ليه بس يا ولد؟ الناس وراك خلوها قد ارجع خلاص شوف ليك بلد *** قول يا لطيف قول يا مدد لي كل زولا إنزرد للإنشحط مكتول كمد واقف علي ذاك الرصيف مربوط علي نفس الوتد مستني حافلات الجريف شاف العنب اخضر نضيف تفاح مرصرص فوق طبق قلبو الرهيف قرب يقيف ماهيتو ما بتجيب رغيف ما الحاجة رامية عيال صفق بس لو يكون أحرف حريف ماهيتو ما بتجيب نبق (عوض الله) يا الفكرك نضيف ورينا دي بحلوها كيف قول يا لطيف *** قول يا لطيف للمادح المضروب شمش من السخانة عمي وطرش نافوخو أصبح زي برش يمدح يقول ومديحو غش مو كاتلو حبا في الرسول إلا السبب عدم القرش عدم القرش ده حلجلو بلف كدي إنت بس أجدعلو شي وأرميلو خلف .. شوف كان يقيف قول يا لطيف *** يا زول اقيف .. يلاكا نتواضع سوا ونركب علي سرج الهوى وننزل هناك في بلاد كرد سكانا بايتين القوي ديل منهم حتي المرض داخ وانكوي وقاعد يفتش في دوا قول يا لطيف يا من علي العرش استوي لقبيلة حمامهم ترع لي زول كرب لامن ترع أهو دا النجح أهو دا الزرع قول يا لطيف للما بضوقوا طعم قرع إلا ف سماية ويوم عرس ضاربين كجيك ماكلين مرس ما بقوموا تب شابكين ترس من حالتهم قول يا لطيف *** قول يا لطيف لي ناس دوام تحلم تلوك الشحدة باقيالهم سلوك لي زول كرف ريحة السجوك مصروانو عوووووووووووك صحا الكلاكلات واب كدوك والناس في حلفاية الملوك قاموا الصلاة !!. ***