طبعاً التفاعل مع كأس العالم والانفعال مع مبارياته يزداد يومياً كولومبيا ناس البحر مشوا البرازيل من البحر وفتحوا خيال لي بهناك تسعة نقاط من تسعة نقاط والخوف يفتحوا خيال زيادة المنتخبات الكبيرة اتضح انها ما خطيرة تنقطعتا فارغة ساي طاروا كلهم في الحتانة وربنا انقذ ملكة بريطانيا الحمد لله ايطاليا اتغلبت لو ايطاليا غلبت وجاب القون بالوتولي الملكة كان كرهت اليوم العملوا فيهو بريطانيا عظمى كان فرح الشعب الانجليزي بالتأهل ولكن تدفع التمن الملكة براها ويا ريت لو كل الرؤساء والملوك في الدنيا تتهنا شعوبهم ويدفعوا التمن هم لاننا اعتدنا في الدنيا دي على ان يتهنا الملوك والرؤساء وتدفع التمن الشعوب المهم الملكة ربنا مرقها امها داعية ليها ولكن برغم متعة كأس العالم برغم التفاعل معه الا اني اتمنى ان ينتهي اليوم قبال باكر داير كأس العالم ينتهي بي سرعة عشان دوري المجموعات يدور عشان الهلال يمشي الكنغو وداك عاد يوم نصاح للمطار نقدم الهلال الرجال يهزو ويرزو النسوان يزغردن الشفع يصفقوا عاد الهلال هين ولا لين الهلال ماشي الكنغو سفرية طوووووويلة الكنغو كونيكشن يصل الكنغو ويركب من هناك الطيارة الجد جد طيارة الحتانة عشان كده إن شاء الله كاس العالم ينتهي سريع إن شاء الله الخواجات ديل الله يهديهم ويلغوا باقي كاس العالم لي رمضان المهم كاس العالم ينتهي عشان تبتدي حاجات كتيرة وتنتهي ومطار الحتانة الدولي بستقبل اكبر عدد من السفريات في اليوم بس الطيارة تقوم المهم شفت لي صورة للمريخ في دنقلا جوار البص ماشاء الله كمية من الاشبال مع البعثة ده الكلام ودي الخطوة التمام وده دربنا بتاع الجويات الزمان قليل من وقفة الشفوت مع الصغار يبقى الصغار شفوت بين يوم وليلة ونشوفهم على منصات التتويج الافريقية مثل اخوة سبقوهم قبل ذلك ايها الناس رمضان على الابواب ولكن هل يجوز صوم الزول بدون فطور وبدون سحور وبدون حق الفطرة !!!!!!! بالفطرة كده بجوز ؟؟؟؟ اها نجي لي شمارات والي الخرتوم كان شفت يا والينا لما قلت إن شاء الله كاس العالم ينتهي واحد قال لي إن شاء الله العالم ذاتو ينتهي قلت ليهو لما ولماذا و ليييييييييييييه تدعي علينا؟ قال لي دايرين نشوف حساباً هناك لدينا التمن الدفعناهو في دنيتنا الجميلة دي في ناس مفروض هناك يردوهوا لينا قلت ليهو يا والينا كان كدي ربك رب الخير نهاية الدنيا يعجلها لينا سلك كهربا ننساك كيف والناس تغني مع القلع إن شاء الله القيامة تقوم والى لقاء
