خسرنا من الشريف هذه المرة بشرف واظن ان اللياقة البدنية والذهنية هي سبب الخسارة وتدهور اللياقة دليل على علوق الشدة والإعداد الخاطئ فالاعتماد على الحظ لا يصنع منتخب البطولات المهم المغرب خافت من الايبولا علي مواطنيها وكالعادة دقينا صدرنا على الرغم من اننا مفروض نخاف على مواطنينا اكتر من خوف المغرب فنحن شعب سنامو تعبان ما بنستحمل اي «اسهالات» لو «بصقنا» ساي بنفقد سوائل يبقى مافي داعي يا حكومتنا تدخلينا في نفق مظلم وكفن ابيض وبالذات هذه الحكومة فارسة ما بتجر واطي اصلو ما بتعترف باي وباء في البلد ولو كمل البلد جت عليه وحفاظاً على المواطن السوداني الفضل اقصد المواطن السوداني البطل نرجو ونلتمس ونخصم الحيكومة بي الله تبعدنا بس من تنظيم بطولة الايبولا دي ايبولا لأ واذا الاتحاد الافريقي لم يقدر الحتة دي يبقى الاتحاد الافريقي دايرنا ننقرض بس ياخ نحنا الملاريا ما قادرين عليها النزلة دي اذا عالجناها بتاخد اسبوع واذا خليناها بتفوت في سبعة يوم سنامنا فاااااااضي ونفس نبكي بيهو ما فينا تروح بطولة ولا تقرضنا ايبولا وحسنا فعلت جمعية حماية المستهلك ببيانها الوجيه وادبها الجم في مخاطبة السلطات وخوفها النبيل من أجل مواطن نبيل أيها الناس حكموا العقول والضمائر وقصة ما بتجينا حاجة دي خلوها نعم الجاتنا في مالنا سامحتنا لكن البتجينا في ام رويحاتنا دي اكيد ما بتسامحنا ايبولا لأ أيها الناس هي وينا الكورة الدايرة تجيب لينا إيبولا إن تنصروا الله ينصركم اها نجي لي شمارات والي الخرتوم كان شفت يا والينا كان فتحتوا الباب لي ايبولا ما بتخلينا بتقرضنا وتقرض اهالينا كفاية العلينا يا والينا تعرف يا والينا ايبولا دي بتخلينا ننز دم من كل مسامة فينا هو وينو الدم يا والينا هو فضل فينا دم يا معالينا الباعوضة ما خلت نقطة فينا يبقى ايبولا لو جاتنا حا ننز الروح باي مسامة فينا سلك كهربا ننساك كيف وووووب علينا الايبولا جاية علينا والى لقاء
