معظم الذين تسرق موبايلاتهم يعبرون عن سخطهم وغضبهم قائلين: يا أخ الموبايل يطير في السما.. أنا مشكلتي في الأرقام الجواهو.. دي يلمو فيها كيف؟ وظاهرة سرقة الموبايلات خاصة في مناسبات عقد القران في المساجد الكبيرة مثل مسجد سيدة سنهوري ومسجد الشهيد ومسجد النور وغيرها.. تستحق النظر. أذكر في عقد قران كريمة الدكتور الفاتح عز الدين بلغ عدد الموبايلات التي نشلت في مسجد الشهيد بعد صلاة الجمعة عشرة موبايلات بالتمام والكمال لأنها كانت تامة وكاملة وكائنة في جيوب أصحابها، فإذا بها تتم وتكمل زينتها وكينونتها عند جيوب النشالين. وعندما نشل موبايلي لم أجد إلا أن أنشد قائلاً: السرق موبايلي بس يكمل رصيدو تضربو صاقعة وسط الناس تصيدو قولوا آميين. وفاجأني صديقي وتلميذي الأخ الشاعر الحلمنتيشي محمد عبد الرحمن الشيخ «مستكاوي» من مقر إقامته بالمملكة العربية السعودية بقصيدة عصماء أراحتني ولا بد أنها ستريح الكثيرين يقول فيها: عندي موبايل فقدتو فيهو أرقامي الكتيرة الحنان كلو افتقدتو فيهو ناس روعة وأميرة *** فيهو انتر نت أساسي فيهو شلة من الجكاسي كل زول بي نغمة راسي كان خليجي وكان خماسي *** شوقو حرك لي حنيني لا مقلد لا هو صيني كت بواصل بيهو أهلي حتى اكسسوارو أصلي *** جودة بي صدق وأمانة ما حصل خش الصيانة ما حصل كهربتو كملت ما حصل مسجاتو هملت *** البلوتوث فيهو صائب يلقط الفوق السحائب ياما ورانا العجائب خبرة في نقل المصائب *** في الأدب ماسك حدودو ما بيشيل حاجات قبيحة هسة ما هاميني عودو بس أسامي ألفي الشريحة *** ربي وري اللص صوابو واعدم الخير من طريقو يتلفظ من كل صحابو ربي بالقضروف تعيقو *** ربي يا كاتب النهاية وجه اللص للهداية يرجع التلفون سلامة عافي ليه يوم القيامة *** داير أوصي الناس وصية اللفاهو يجيبو ليه بلغو اللص الحرامي وأوع من مسح الأسامي وبما أن الشيء بالشيء يذكر، فقد تذكرت قصيدة كتبها الشاعر الفنان الملحن صلاح ابن البادية وهو يسأل الله أن يقتص له من حرامي سرقه بليل بعنوان: «السراق السرق البيت» والحمد لله إنها جات في البيت ولم يسرق منه السراق أغنية أو مدحة مثلاً: السراق السرق بيتي ومرق بالراحة ما يضوق السرور في الدنيا يلقى الراحة تجيهو الطعنة وآلاماً علاجا جراحة والقلق الشديد، تضيق بيهو الوسيعة براحا السراق الحقير شبه البينبح غادي دخل البيت سرق تلفزيون مسجل ورادي سألت الله وندهت الصالحين وبنادي تجيهو الخوفة والمرض الخطير ويعادي ولا أراكم الله مكروهاً في موبايل لديكم.