دروب .. ! هناء ابراهيم الدرب مرات يجيبك\ وإنت ما قاصد تجينا ثمة دروب لم تكن على البال، القدر ودانا بيها ... دروب مشيناها صدفة، ما اتخيلنا نمر بيها. يحدث أن تأخذ القلم لترسم لوحة، ودرب خيالك يمشي بيك حتة تانية. درب بوديك إنت بس ودرب بودي كل الناس. درب بخصك أنت براك ودرب بخص زول معاك. (ودربك معاي سكة سفر). مرات أنت ماشي لفرح محتمل، الدرب بسوقك نحو حزن مفاجئ. في الشارع ممكن تلاقيك مشكلة أنت ما قاصد تجيها لكن جابك الدرب. تتفق مع درب أنك حا تمشي بيهو المسرح مثلاً، نفس الدرب بوديك السينما. بتقرر ما تمشي بالدرب دا، بس غصباً عنك بتمشي بيهو. الدرب المتعود تمشي بي ممكن مرة يكون مغلقاً أو مخيفاً أو مافي. دروب بتودي.. دروب بتجيب.. والدرب البودي بجيب مرات. درب بوديك مكان أنت ماشي لكن بغشى بيك درب تاني يعني لو ماشي الصين الدرب ممكن يوديك قطر أولاً . درب أبيض، أسود، رمادي ودروب ملونة. درب بقرأ ملامحك وبعرفك ودرب بكذب على أحلامك وبغشك. درب بتحمل مزاجك الحلو ودرب حافظ مواقيت أحزانك كلها. ممكن تتعود على الطريق والطريق ممكن يتعود عليك أو على حاجة في الطريق. الدرب المرات بجيبك وأنت ما قاصد تجينا، قد يكون جميل لينا وليك وقد يكون لا جميل لا حاجة. الدرب ممكن يجيبك أكتر من مرة. وممكن يقطع إشارة وصولك. و...... ما أحلى درباً يقود القلب إليك يا عظيم يا رب بالمصطفى بلغ مقاصدنا وأغفر لنا ما مضى يا واسع الكرم .. مولاي صل وسلم دائماً أبدا على حبيبك خير الخلق كلهم .. اللهم صلِّ وسلم وبارك على نبينا محمد بلا عدد وإلى الأبد .
