والتلفاز يمارس حالة من التواصل اللذيذ والممل أحياناً.. «ألو.. يا شيخنا عندي مشكلة.. زوجي كلامو كتير.. طول اليوم يتكلم لدرجة مزعجة.. هو بالجد ما مقصر معاي بس كلامو دا مزهجني شديد.. أها رأي الشرع شنو؟».. «استغفري يا شريفة وشوفي حال النسوان المات عندهم رجالهم أو الطشوا خلوهن.. اتمسكي بيهو ما دام ما مقصر واتحملي كلاموا وادعي ربنا يخفف عنه..».. «ألو يا شيخ أنا من قبيل بحاول الاتصال.. عندي مشكلة عويصة.. خاطبني قريبي.. أها على حس الخطوبة دي كان بيصرف علينا وعلى أخواني لكن اكتشفت بعد عشرة سنين خطوبة إنو ما الزول المناسب لي.. خاصة بعد ما درست كلية مرموقة وهو حدو الثانوي العام.. أها رأي الشرع شنو في حالتي؟».. «يا بنات حواء.. الله يهديكن.. والعشرة سنين دي تروح ساي.. اتقي الله في حق هذا الرجل الذي أعطى وما بخل ولا حول ولا قوة إلا بالله..».. «ألو.. ألو يا شيخنا أنا فرحانة شديد الخط جا معاي أخيراً.. والله بالجد أنا معجبة بالبرنامج وبيك أنت شديد.. شديد.. خاصة لمن تكون لابس استايل وعامل..» تن تن الخط قطع «عفواً المشاهدين الكرام.. نواصل».. «ألو يا مولانا أنا متظلمة جداً من زوجي.. احنا متزوجين لينا أربعين سنة.. ولدنا أحمد ومحمد وجادين وجار النبي وعبد الرسول.. و.. و.. أها يا شيخنا بعد ما الله فتحها علينا ورحلنا من بيت الجالوص من الأطراف.. قام أبو العيال عرس علي بنية أصغر من وليداته.. وبالجد جاتني حالة صعبة.. أها رحلني أنا والأولاد في بيت إيجار وسكَّن العروس الجديدة في العمارة الجديدة.. أها يا شيخنا الشيطان لعب برأسي.. قمت مشيت لشيخ.. فكي مشهور عشان يعمل ليهو عمل يجيب راسو -الراجل ترطشتو العروس دي.. أها يا شيخنا ربنا بيرضى مني ولا بحاسبني على العمل العملتو ليهو وشربتو ليهو في القهوة..».. «استغفري الله يا حاجة.. الصبر.. الأصل التعدد.. لكن لابد أن يراعي الزوج العدالة وعدم الظلم..».. «ألو.. ألو.. ياي.. هاي شيخو.. أنا ننوسة.. بسألك بصراحة بصراحة.. الحب حلال ولاَّ حرام؟.. يعني دايرة أعرف لو طلعت مع (موني) ومشينا أكلنا ايسكريم وبيتزا وشوية (دليفري) كده.. وقعدنا اخوان اخوان في شقتو حلال ولاَّ حرام؟».. «يا بنيتي خليك متماسكة شوية وما تنبرشي كده مع (موني).. واوع من الشقة لأن فيها خلوة والخلوة بتجيب الشيطان.. والشيطان بيلعب بعقل الإنسان.. لكن الايسكريم والدليفري أكان قدام الناس ما في مشكلة والله ورسوله أعلم».. «ألو.. ألو يا شيخنا ما حكم التهادي بين الحبيبة والعشاق.. يعني لو الجكس جاب لي هدية قيمة.. أشيلها منو ولاَّ أخليها؟».. «والله الدين دين محبة وتهادوا تحابوا.. لكن حبكم دا محيرني شديد..» آخر الكلام: وصوت خشن يقطع تسلسل أصوات النواعم.. «ألو.. ألو شيخ خلاص البلاد دي ما فيها مشكلة إلا الراجل ومرتو.. والحبيب وحبيبته.. وين فتاوي الغلاء وجشع التجار وضيق الحال.. أها يا شيخنا في ظروف زي دي بحل لينا نصرف ولا ننهب ولا نداهن ولا نمرق على الشارع..» ودمتم سياج - آخر لحظة - 18/1/2011 [email protected]
