بشري ساره قالت إحداهن : البعض يبغضني والبعض يكرهني والب عوض يحبني ماعلينا...!المهم في برنامج المحطة الوسطي بقناة الشروق _ مدير عام وزاره الصحة ولاية الخرطوم يصرح: (اكتشفنا بان الباعوض المتواجد بالولاية غير ضار ولا يسبب الملاريا). جيتو لكلامي ..؟ في ذمتكم ما المفروض يلبسوا مسؤولينا ديل بامبرز في خشومهم دي لامن يطلعوا في التلفزيون....لامآخذه؟ اتارينا ظالمين الباعوض كل الزمن ده..؟ وتتطور كيف البلد وفيها كائنات مظلومه.؟ كيف الاقتصاد ينمو والدولار ينخفض ونحنا ظالمين الباعوض وهي تدعو علينا الليل كلو(أزززز)في اضنينا..؟ بعدين بتكافحوا فيها ليه مادام هي ماضاره .؟ولا الرش الشغال ده مكافحه للبشر.؟ اصلو احنا ضارين خالص بمصالحكم.!! غايتو اول مرة اسمع بباعوض خيري .يكون باعوض الخرطوم المابسبب ملاريا ده بيعمل في جمعية الهلال الاحمر.!؟وشغال نقل دم.. والله احتمال.ماكمان مامكن باعوض يعض ساي بلا سبب الا يكون قاعد يقوم ليهو سنون لبن..!! ولكن المشكله ياسيدي وكيل الوزاره ليست في تسبب البعوض في مرض الملاريا او حتي معالجه حوص المصران الأعور. وليس لدي مانع شخصيا ان تنقل لي الباعوضه ملاريا او تنقل مني رصيد سوداني حتي. لكن مادام انتو في صحة الخرطوم علي تواصل مع جمعية البعوض الخيري وعلي علم بمبرارتها في الحكايه دي.. قولوا ليها ماتعضي ياخي..!! بعدين في ذمتك انتو خالين ليها حاجة تمصوا...!؟ ياراجل....؟ اي نعم انتو مابتسببوا ملاريا وفقر دم زي البعوض المذكور لكن بتسببوا فقر عيشه وفقع مرارة وانيميا حادة. عزيزتي الباعوضه رجاء شوفي ليكي شغله تانية انشاء الله تحويل رصيد.. والله تقولي تشربي من دمنا ده تموتي عطش وتلحقي مشروع الجزيرة..! وانا بالشايفو ده حننقل ليكي ملاريا ماحتستحمليهو(انفلونزا المسؤولين) اللهم قد بلغناكي.ولو مامصدقه مصي ساي (انشاء الله تنشرقي)مادام مابتجيبي ملاريا.! النايمين ليها شنو..! الكاتب الساخر : لؤي شرفي