بعد إعلان وفاة ملكة جانسي.. والحزن الذي خيّم على الأسر.. حزنت بدوري لا لموت ملكة جانسي.. ولكن لأنني لم أشاهد حلقات هذا المسلسل الذي سلب لب أبناء شعبي.. من نساء ورجال وشيب وشباب وأطفال.. حتى أنهم أعلنوا حالة الحداد على الملكة المتوفاة.. لدرجة وصلت ذرف الدموع.. حرداب الأكل.. أيها السادة نحن في أزمة حقيقة.. نحن نبحث عن بطل.. إن لم نجده في الواقع.. نركض خلفه في المسلسلات.. أو في برامج المسابقات الغنائية.. مثلا برنامح إم بي سي (ذا فويس).. ظهر لنا المغني السوداني الأصل نايل.. فنصبناه بطلا مرتقبا.. يرد إلينا اعتبارنا ويخرجنا من دوامة هزائمنا.. نصبنا صاحب النعجة الذي رفض أن يبيع النعجة الفي السعودية نصبناهو بطل.. وهيصنا وفرحنا ورقصنا وغنينا ليهو.. شعبا ومسؤولين.. واعتبرناهو بطلا.. لحدي ماهو اتخلع وما بعرفو حسي البقت عليهو شنو من الخلعة؟ والله يستر عليهو من شيل البطارية في القمرا.. وبالأمس تكلمت عن تنصيبنا لعشة أم ضنب بطلة حتى لو كانت بعاتية.. وما زلنا نبحث عن بطل.. وسنظل طالما مطرقة الاحباطات.. تدق منا النافوخ والقنقون.. ارجع لبطلنا (نايل) بعد خروجه من المسابقة.. حزن الشارع السوداني.. لخروجه فأضيف إلى خزينة إحباطاتنا إحباط جديد.. أيضا أحسست بالحزن لأنني لم أسمعه يغني.. ولم أتابع البرنامج الشهير.. قالت إحدى الصحف "هذا وقد عمت حالة من الحزن الكبير كل البلاد مساء أمس بعد إعلان النتيجة).. حزن كبير؟.. ياتو بلاد دي؟.. هي البلاد فيها مساحة للحزن؟.. البلاد متوترة وموتورة من راسها لي كريعها.. راسها موجعها.. وحلقها متلهب وصوتها رايح.. سدرها يخشخش.. بطنها تركركب.. مخاريقها موجعتناها.. وكرعيها ما شايلاتنها.. دي حالة بلاد فايقة لحزن علي مغني خرج من مسابقة غنائية.. ؟ إلا أنه بحثنا المحموم عن بطل فاعتبرناه بطلا يعوضنا حوجتنا إلى بطل.. ويا ريت لو خلونا نفرح ببطلنا المزعوم.. عشان ننكد ومزاجنا يعكر.. طلعت فتوى تحرم التصويت له في محاولة لحرمانه من الفوز وحرماننا من الفرح .. لكن كلو من شيرين.. أنا عاااااارف والله.. شيرين دي ح تجيبها ليهو ضقلها يكركب.. شابكاهو العسل اللسود العسل اللسود لمن سودتها عليهو ومرق من المسابقة.. ويا ريت لو وقفت علي النضم بس.. شفتها في صورة .. متصوره معاهو متشعبطة فيهو شعبطة العدو.. شابطاهو من نصو بايديها الاتنين.. وتعاين لنا وتضحك وتكاوي فينا.. نحن المرا كان دايرة تشعبط في راجلها.. قاعدين يقعو الخلا.. تشعبط زيييييييييين.. حتين يجو راجعين.. ومشيهم في الشارع دا.. يمشو هو قدامها مسافة مترين "المسافة الشرعية". يبرطع يقطع الشارع قبالها.. ولو سمع صوت فرامل عربية قوية.. ولا يقبل يعاين لها يخت ايديهو فوق اضنيهو ويقول: "أممممممممك.. ناشها". تجي انتي يا شيرين تتشعبطي في وليدنا قدام الله وخلقو؟ والله اياهو!! الباب البجيب الريح- صحيفة اليوم التالي