في مباريات الهلال خارج العاصمة بنقعد ندخل ونطلع ونقيف في خشم الباب ..زي الرائحة لينا حاجة. ..ونعاين في الساعة يحسب للكوكي انه عاد في الشوط التاني ..شوط المدربين ..وتقدم الهلال بعد تأخره في كأس السودان كان فريق الامل ايضا قد تقدم على الهلال بهدف وجاء الهلال وسجل مرتين في شباك الامل للمدير الفني للهلال نبيل الكوكي نصيب الاسد من هذا التميز وان عبنا عليه التأخر · نحن ما زلنا نعاني من (فوبيا) مباريات الولايات ..وما زالت المباريات خارج العاصمة تشكل لنا هاجسا. · وهي الى وقتنا هذا تمارس (حرقا) للاعصاب. · ونقعد ندخل ونطلع ونقيف في خشم الباب ..زي الرائحة لينا حاجة. ..ونعاين في الساعة. · كمان جابت ليها معاينة في الساعات ..افو ..دا شنو البتعملوا فيه دا يا هلالاب؟. · نحن وقت نصوم ما بنعاين للساعة. · لكن مباريات الهلال التى يلعبها خارج العاصمة ..بنحرس الساعة. · المباراة فات منها كم؟. · وبقى فيها شنو؟. · والهلال وقت يكون مغلوب ..الزمن يجري ليك زي (خليفة عمر). · ووقت الهلال يكون غالب ..الزمن بمشي ليك على راحتو. · مباراة الهلال امس الامل عشنا فيها لحظات صعيبة. · هي ليست لحظات فقط..بل عشنا (شوط كامل) على اعصابنا. · خاصة ان التشكيلة التى بدأ بها المدير الفني للهلال التونسي نبيل الكوكي ..تمنحك احساس ان الهلال ما جاد في المباراة. · وان الجهاز الفني تعامل مع المباراة باستهتار واسترخاء. · والمباراة في عطبرة ما بتستحمل الكلام البعمل فيه الكوكي ..ولا عاوزة ليها (تنظير). · لكن يحسب للكوكي انه عاد في الشوط التاني ..شوط المدربين ..وتقدم الهلال بعد تأخره. · منذ سنوات بعيدة ..لم يستطع الهلال ان يتأخر في عطبرة ثم يعود في الشوط الثاني ويتقدم. · سيناريو هذه المباراة ..الهلال رسمه ايضا امام الميرغني الكسلاوي ..حيث تقدم الميرغني على الهلال وعاد الهلال وتقدم بثلاثة اهداف. · لكن الفارق بين عطبرة وكسلا كبير. · والفارق كذلك كبير بين الامل والميرغني. · لذلك ..كنا نحسب ان الهلال في هذه المباراة لو تعادل …لكفاه من عطبرة (نقطة). · لابد من القول ان فريق الامل عطبرة يمتلك فريق قويا ..ومحترم ..وعنده من الخبرات ما يجعله يحسن التعامل مع مباراة متقدم فيها. · الغريب في الامر ان فريق الامل عطبرة لم يستفيد من مباراة كأس السودان التى لعبها امام الهلال في ام درمان. · في كأس السودان كان فريق الامل ايضا قد تقدم على الهلال بهدف وجاء الهلال وسجل مرتين في شباك الامل. · كان يفترض ان يستفيد الامل من مباراة كأس السودان ..خاصة انه يلعب هذه المرة في عطبرة. · سيناريو المباراة الاولى في كأس السودان ..جعلنا مخاوفنا تكبر ..قلنا لا بد من ان الامل سوف لن يلدغ من الجحر مرتين. · يعني ما معقول يتقدم في كأس السودان بهدف ويأتي ويخسر نتيجة المباراة. · اعاد الامل تفاصيل المباراة الاولى في كأس السودان. · وان كان هذا قصور من الامل عطبرة فلا بد من ان نقول ان هذا الامر (تميز) من الهلال ..وهو ما يجعل ثقتنا في الهلال تكبر وتعظم. · ان تلعب امام فريق قويا مثل الامل وان تفوز عليه في المباراتين بعد ان كنت متأخرا – هذا شيء يحسب للهلال. · ويؤكد قوته. · للمدير الفني للهلال نبيل الكوكي نصيب الاسد من هذا التميز وان عبنا عليه التأخر. · على العموم نتمنى ألا يدخلنا الهلال في سيناريو مشابه لتلك السيناريوهات. · نحن لم نعد نقبل ان نرى الهلال مهزوما حتى لو كان ذلك في الشوط الاول فقط. · ما قصدنا ان نقوله ان معطيات المباراة كلها كانت مخيفة ..خاصة ان الهلال عندما يلعب مباراة خارجية بتميز يأتي ويتراجع بعدها في المباراة المحلية. · كانت تلك العوامل تشكل هواجس لنا ونحن نتابع المباراة – ولا بد من انها كانت تشكل ضغط نفسي ايضا على لاعبي الهلال. · بينما تمنح لاعبي الامل الدافع ..والحافز. · خاصة وان الشوط الاول انتهى بتقدم فريق الامل ليمنح فريق الامل فضل التقدم وهو يلعب في ارضه ووسط جمهوره. · لكن الهلال عاد بحمد الله وانتصر لتكون فرحتنا نحن اعلى ..بعد ان جاء الانتصار في الشوط الثاني. · من حسن حظ الهلال انه حسم نتيجة المباراة في (4) دقائق لو لم يتقدم الهلال في اول (10) دقائق من عمر الشوط الثاني لاصبح تقدم الهلال على فريق الامل غاية في الصعوبة. · سيناريو المباراة ..والخروج بالنقاط الثلاث بعد مباراة عصيبة يجعلنا نقول ان الهلال باذن الله وفضله حسم امر الممتاز بصورة كبيرة. · الهلال تجاوز وتخطي كل مبارياته الصعبة ..فهو لعب في شندي امام الاهلي شندي ولعب امام الامل في عطبرة ولعب امام مريخ الفاشر في الفاشر ولعب امام هلال الابيض في الابيض. · كل هذه المباريات التى لعبها الهلال خارج العاصمة كانت تمثل المباريات الاصعب للهلال في الولايات. · تبقى للهلال مباريات في الولايات هي اسهل (نسبيا) من تلك المباريات التى لعبها الهلال حتى الان. · المريخ ينتظره مريخ الفاشر الذي كان قد انتصر على المريخ في ملعبه وبين جماهيره. · وينتظر المريخ ايضا فريق الامل في عطبرة ..بعد احداث عاصفة شهدتها المباراة الاولى التى قررت لجنة الاستئنافات اعادتها. · هذا الامر يجعل الامل يدخل بحافز اكبر لمباراة عطبرة وان جاء وخسر مباراة ام درمان مرة ثانية بعد اعادتها. · المريخ معرض لخسائر اكثر في الممتاز ..هذا ان وضعنا في الاعتبار ان مباريات المريخ في الجزائر في البطولة الافريقية سوف تجعله اكثر (تكبلا) وقد تنعكس نتائج مبارياته الافريقية على المريخ محليا. · الهلال حتى في البطولة الافريقية تجاوز اخطر محطاته الخارجية امام مازمبي بتعادل مشرف. · فقط مطلوب من الهلال التركيز بصورة أعلى في الممتاز ..والتخلي عن الاستهتار والاسترخاء الذي اصبح يغلب على الهلال في مبارياته المحلية. · مباراة الهلال القادمة سوف تكون امام الخرطوم الوطني وهي مباراة صعبة ايضا..ان تجاوزها الهلال باذن الله سوف يكون قطع شوطا بعيدا نحو الاحتفاظ بلقبه. · لا خوف على الهلال في مباراته القادمة امام الخرطوم الوطني باعتبار ان الهلال هذه الايام في افضل حالاته. · كما ان جماهير الهلال بعد الاداء الاخير سوف تشكل سندا ودافعا قويا للهلال امام الخرطوم الوطني. · نحن ننتظر عرض (يجنن العالم) للهلال امام الخرطوم الوطني. · ونحسب ان فريق الخرطوم الوطني الذي يعتبر الآن الفريق الافضل في الممتاز بعد الهلال والمريخ سوء حظه وضعه امام الهلال في هذه الايام. · علينا جميعا ..ان نهتم بمباراة الممتاز وان نمنحها من القدر ما تستحق. · خاصة وان بطولة الممتاز تمثل البطولة المحببة للهلال. · ونحن لا نريد اكثر من ان يحتفظ الهلال بلقب بطولة يفوز بها في الغالب. · ………. · ملحوظة : ما في ملحوظة ..بشاشة مستعجل. · هوامش · كيبي امس سجل مرتين. · مرة اتعادل..مع الامل وعادل النتيجة. · ومرة اتقدم. · يعني مع العطش دا اسكتي (كيبي). · كيبي الشاي والقهوة في السحور. · الهلال يملك عناصر اكثر من ممتازة لو وجدت الفرصة سوف تفعل الكثير. · كيبي مهاجم خطير. · بس يتحرك شوية. · ويتحرر من بعض الكسل. · الكوكي مطلوب منه ان يولي الممتاز اهتمام اكبر. · ومجلس الادارة ذاتو مفروض يقول ليهو الممتاز نحن عندنا خط احمر. · جماعتنا ديل لسه ما سافروا الجزائر. · الايامات دي ح نرتاح من دوشتهم شوية. · انشغلوا بالجزائر. · بقوا في رقبتهم. · احلى حاجة – العيد ذاتو ما معانا. · يعني البلد بقت خالصة للهلال. · الهلال ح يلعب مع الخرطوم الوطني محليا. · سوف يلعب امام سموحة افريقيا. · يعني الايامات دي حقتنا. · خلاص بقينا نحن العيد. · عندنا برمجة خاصة. · غدا ان شاءالله نلتقى في (من الغلاف للغلاف) بعد ظرف منعنا من التواصل. · لكن ناس قوون صلحوا الحكاية ..وطلعوني من المطب. · بكرة نلتقى ان شاءالله. · بس عشان تكونوا عارفين بكرة ما في (باسطة). · الباسطة كترت شوية. · بكرة يوم (الطحنية). · ………… · عاجل : يا الله فريق المريخ بي حالتو دي يلاقينا الخميس القادم – عشان نفرتكو ليكم.
