* صديقي كابو (الصديق وليس الفريق) أسهب في السخرية من الوصايفة بعد العلقة الساخنة التي تلقوها أمام (قول.. ما.. هيا) في الميناء!! * كابو قال: إذا كان المستوى الباهت الذي شاهدناه للهلال أمام قورماهيا الكيني يمثل حصيلة معسكر سوسة بتونس فإننا نطالب لجنة التسيير بمنازلة الوصيف بالرديف! * كابو شكلو ما سمع بما حدث لرديف الوصيف في الميناء! * الصغار سبقوا الكبار! * وبرضو انضربوا في الميناء! * رديف الهلال أقام معسكراً إعدادياً في بورتسودان، وتلقى الهزائم أشكال وألوان! * قبل يومين انهزم من الثغر بهدفين نظيفين! * رديف الهلال من كترة ما انضرب في الشرق.. ناس بورتسودان سموهو (رغيف الهلال)! * أي فريق لاقاهو أكلو! * رغيف.. أقصد رديف خفيف وظريف ولطيف! * من شابه أباه فما ظلم! * الرغيف.. أقصد الرديف ذاتو محتاج مهرجان عدالة يا مأمون! * الكبار رفضوا الصعود إلى المقصورة لاستلام الميداليات الفضية! * والصغار عملوا شمطة مع الحكم!! * يبدو أن مسامير الجوهرة الزرغاء كلها مستوردة من بورتسودان! * قال ليك يا كابو الأقوان الرجع بيها الرغيف.. أقصد الرديف من الميناء احتاجت خمسة مخلصين لشحنها إلى الخرطوم! * الرغيف لعب مع الثغر وانضرب.. ولعيبتو سكوا الحكم! * أي نعم.. سكوا الحكم! * وبرضو من شابه أباه فما ظلم! * الفارق الوحيد بين سكة الكبار وسكة الصغار أن الأولى كانت دولية.. والثانية محلية! * وفي الحالتين المحصلة صفرية! * صفر مستدير.. زي الرغيف البلدي!! * كابو قال يجب على كردنة الذي يشغل نفسه ببناء الجوهرة الزرغاء أن يعمل أولاً على بناء فريق محترم! * يبني كيف بدون سيخ يا كابو؟ * في بناء بتم بدون سيخ؟ * وبدون رئيس؟ * وبدون مدرب؟ * وبدون مساعد مدرب؟ * وبدون مدير كورة؟ * وبدون كورة؟ * قبل فترة كتبت صحيفة المشاهد عن اختفاء سيخ الجوهرة الزرغاء! * أمس جريدة عالم النجوم طلعت بي مينشيت كبير حمل عبارة (سر استقالة الكاردينال في بورتسودان)! * والمدرب قالوا فطومة أفتت بانتهاء صلاحيته!! * وبعد مسمار القور.. أقصد البورت مدير الكورة عاطف (النور) استقال! * الوصيف رجع من بورتسودان قاطع (نور) يا كابو! * ظلام دامس!! * مفروض نجر ليهو (سلك) من الرد كاسل!! * سلك براهو ما أظن يحلهم.. إلا نجر معاهو (فاضلابي)! * خلوا بالكم.. فاضلابي ده بالحجم العائلي.. لو جاكم بكمل رغيفكم!! * وكمان شايف فطومة قالت المدرب الفرنسي (كيسو فاضي) ومفروض يلحق باتريك!! * واستشهدت بالدحيش! * كيسو فاضي كيف.. وكيس الرديف مليان رغيف؟ * الخبر الخطير: كردنة منح كافالي آخر فرصة في مباراتي الهلالين! * يعني لو مسمار قول.. ما.. هيا.. اتكرر مع هلال الجبال الفرنسي حا يوروهو الأكل رغيف الرديف منو! * في البورت.. الفرنسي منع سيدا من توجيه اللاعبين! * سيدا محجم.. وممنوع يتكلم! * أمس كردنة صرح مؤكداً أنه لن يطيح برأس كافالي! * راس كافالي ده شكلو محتاج (كسكتة) يا كردنة!! * رغيف القور طلع بلدي! * الخوف من رغيف الجبال.. قالوا احتمال يطلع (توستي)! * الثابت أن الهلال يمر بظرف (دقيق) للغاية!! * الوصيف أثبت أن الكورة ما براها المدورة! * رغيف البورت ذاتو مدور! * ألحق كابو.. الوصيف طلع أحلى وأشهى وألذ من (مخبازة) بورتسودان! آخر الحقائق * خبر خاص للحبيب سلك: الهلال في بورتسودان (عجنوهو وخبزوهو وأكلوهو)!! * الكينيين فطروا بيهو علي الريق! * رغيف طاااااعم.. ما فيهو أثر لي أي (سوسة)! * نتائج سوسة طلعت فورة (بروميد بوتاسيوم) ساي! * رديف أقصد رغيف الوصيف أصبح أكبر مهدد لصحة الهلالاب! * حقو تشركوا صهيب الثعلب وبشة الصغير مع الفريق الأول عشان الرغيف الكبير يبقى (مخلوط)! * الخوف كلو من عدم صلاحية (الردَّة)! * كردنة قالوا ما كمل مباراة القور، وخرج قبل النهاية! * ألحق يا كابو.. سيد الدقيق طلع قبل ما (العيش) يستوي! * نطالب مجلس الهلال أن يضع قضية خروج كردنة على (طاولة) البحث والتقصي! * زهجة كردنة دي ممكن تبوظ (العجنة) كلها!! * قالوا كافالي وضع الشغيل وأبو عاقلة في خط الدفاع! * الفرنسي لخبط (الخلطة)، وأكل العلقة!! * يا دوب عرفنا ليه الحبيب محمد عبد الماجد سمى عمودو (لت وعجن)! * يتردد أن المحترفين الجدد كلهم طلعوا (عجينة) واحدة! * في ناس خايفين سيدا يبقى (خميرة) عكننة!! * وفاطمة تبقى (عاجنة)! * شفنا صور فطومة والرشيد.. وما شفنا أي أثر لخابز عز الدين! * يبدو أنو سد دي بي طينة.. ودي بي (عجينة)! * عاجل للاعبي الوصيف: لو ما صلحتوا كورتكم التعبانة دي كردنة (يمشيكم على العجين ما تخلبطوهو)! * بي مستواكم ده ما أظنكم تاكلوا (عيش) مع الزعيم!! * الأكيد أن الكينيين ضربوا (الخبز) السياحي!! * وخلوا ليهم عيش الردةّ! * الوصيف في (الردَّة) بأس يتجلى! * نهدي أغنية خلِّي (العيش) حرام ما دام أرى (ألوك) يحين!! * (عجنوني) الليلة جو! * آخر خبر: يا البتي (قور).. الضرب بالدور! * خبر الأمس: الوصيف الخفيف.. انتقل من اللقيمات للرغيف! * خبر مهم: رجعوا شيبوب.. منعاً للطوب!! * آخر خبر: عاجل لحماية المستهلك.. رغيفة الميناء طلع فيها (مسمار) كيني!!