اي زول عندو حافلة دايره تغطي معاهو يشتغل ليبيا بالهوى طبعا لو كتبت كلمة وشفتها جوه المرايا بتلقاها معكوسه الا ليبيا خت ليبيا وعاين ليها بره المرايا تلقاها ليبيا خت ليبيا وعاين ليها جوه المرايا تلقاها برضو ليبيا ليبيا دي فيها شيطان خلي بالك جوه المرايا وبره المرايا ليبيا معايا معايا!! دي ليبية شنو دي ايها الناس يعجبني الاهلة لما يفقدوا المنطق ولكن تعجبني هضربة رمضان شديد خرج الهلال من الدور الاول افريقيا فخرج علينا رمضان وجوهرته بمانشيت يقول دوري الأبطال يخسر الهلال دي مسابقة يا رمضان؟ قصدك نرتب الجملة في المانشيت اعلاه ترتيباً صحيحاً لانها وردت مبعثرة مبعثرة في كل شيء في معناها وفي منطقها وفي ترتيب كلماتها على كل انا برتبها ليك صاح الهلال يخسر بالأبطال بالدور الاول دي الحقيقة الخجلان يقولها رمضان اكتب ليبيا في ورقة يا رمضان كتبتها؟ سمح اقراها قريتا؟ ختها قصاد مرايا واقراها لو طلعت ليك ليبيا جوه المرايا مختلفة عن ليبيا بره المرايا يبقى دوري الأبطال يخسر الهلال ولو طلعت ليك ليبيا جوه المرايا وليبيا بره المرايا بتشابهن وزي بعض يبقي الهلال يخسر الأبطال ويقعد ساااااي يا عمك المهم تخيلت كركبة بالليل في بيت كردنة قام كردنة فتح الشباك برااااحه ما شاف شيء اتوكل على الدائم وفتح الباب ومرق على الحوش سمع ليهو صوت رجلين جاريات برطعك برطعك اوردلوب كردنة صائحاً من أنتم؟ صوت يرد من بين الظلام من انتم انتوا ديل من انتم والمحترفين الجبتوهم مواسير من انتم وفي شهرين مغيرين تلاته مدربين مواسير وكمان تتبجحوا من انتم والكشافات صينية ماسورة من انتم وشماعتكم في الاخفاق هي الايدي الخفية والمؤامرات وبعض اللاعبين من انتم انتوا ديل؟!! من انتم والناطقة قالوا احتمال تجيب جماهير من الصين عشان تتخلصوا مننا كلنا وتملوا الاستاد صينيين لا بقولوا ليه ولا بقولوا لماذا تشجيعهم كلو كن تن ترن بن تن تنكلن يوم الكورة صوت الجماهير يبقى زي صوت الكارو الشايل خردة قزاز من انتم انتوا ديل ياخ ويخرج صاحب الصوت من الظلام واثق الخطوات متوجهاً نحو كردنة كردنة يقوم… .. الحته دي ما ركزت عليها في الخيال غايتو يا يقوم جاري يا يقوم سداري لكن كان خت ليبيا جمب المرايا بعرف حاجة ايها الناس ركض قلم روشا اكتر من اللاعبين داخل الملعب فكان موعد الجماهير مع المقلب فطومة اختي لا ترى عيباً ولو بسيطاً في كردنة فكان موعد الجماهير مع ليبيا بره المرايا وليبيا جوه المرايا اسباب ازايا وكسير التلج في الشمس الحارة دي جاب الالتهاب من انتم؟ سؤال حاير في عقول الاهلة؟ جونا من وين الناس ديل؟ بركة القالوها بالدارجي جونا من وين لأنو لو قالوها بالفصيح ما كان كتبتها الفصاحة في الحاجات دي ما حبابها وتبقى حقيقة واحدة الهلال يخسر ويودع الأبطال من الدور الأول المهم الطار طار لي نفسو يا عمك نركز مع الما طاروا بكري ببالغ في نيجيريا لعب باص القون وفي ام درمان لعب باص البلنت وجاب البلنت ده بكري شنو ده الخوف نخت بكري بره المرايا جوه المرايا تظهر ليبيا بكري ده ما مضمون ولو تعاون تراوري مع بكري بجدية صدقوني نعتلي منصات البطولات الإفريقية من جديد وكلميني يا مرايا المهم في التكميلية هبشة صغيرة ونكمل الكشف الا أولي يا روشا بمناسبة التكميلية قلت لي شيبوب حايجيكم متين؟ في التكميلية؟ يكمل معاكم سفر الولايات؟ شيبوب ياخ لعب في الموردة نزلها سقناهو الكنغو قاعد بره طرنا قونو في اتحاد الجزائر ما اتحسب ناس روشا قالوا ليهو ارجانا في التكميلية هم زاتهم بقوا كايسين البقول ليهم ارجوني في التكميلية واتكملي المهم الكمونية يا بت ليبيا اسي الجاب ليبيا هنا شنو؟ ليبيا دي يظهر ما حاتفك مننا خلي الكمونية يا بت جيبي أم فتفت المهم سألنا من محمد عبد الماجد قالوا ما احتجب قالوا في العمرة عمرة بالجينز يا حمادة امال رحلة كيف؟ يا تقعد للحج يا حمادة يا تقع الحقيبة بتطول وتاخد مدة ايها الناس ان تنصروا الله ينصركم اها نجي لي شمارات والي الخرتوم كان شفت يا والينا امتحانات الشهادة مدورة فينا فلذات الأكباد يا والينا بنات وبنينا توفيقهم فرحة لينا لعيون حزينة لكن امتحان العربي ابو لهب ما بحلو يا والينا ان شاء الله في التصحيح يراعوا للحتة دي ولي فرحة عينينا سلك كهربا ننساك كيف والكلب لما شاف امتحان العربي قال ده حالتو المقرر عربي جوبا؟ وإلى لقاء سلك بابكر سلك – (في السلك – صحيفة الإنتباهة)