كشفت الإعلامية والشاعرة السودانية الشابة وئام كمال الدين عن كل ما دار في الحلقة السادسة عشر من برنامج المقالب “عليك واحد” والتي كانت بطلتها. وكانت وئام قد خرجت من طورها وانفعلت بشدة في وجه صاحب فكرة الربنامج ومقدمه مازن تامر وانتقدته على أساليبه التي ظل يتبعها مع النجوم. وقالت مقدمة البرامج المعروفة وفقاً لما نقل منها محرر موقع النيلين: ” أرجوا أن يتسع صدركم لقراءة المنشور كاملا كل الناس التابعت حلقة عليك واحد إن شاء الله يكونوا انتبهوا الجزو البقول فيو أنت طلعتني بمنظر الزول ال ما بيقبل الهزار القصة و مافيها إنّو بعيدا عن موقفي الشخصي المعلوم لي تيّم برنامج عليك واحد (إنّو أنا مقاطعة النوع ده من الكوميديا السادية في نظري ومقاطعة النكات العنصرية و السالبة)أنا انتقدت البرنامج ده في كنداكيز قبل كدة و استضفت كابوس كجزو من البرنامج و كان رايي إنو ما ممكن تجيبو مثلا أ سوسن و تضحكوا على انها بكت في رأيي إنت كدة بتضحك علي ما معاي بتضحك ع إحساسي و أنو لو فعلا منطقك إنّو تظهر وش تاني من النجوم فأنت منو أداك الحق تختار الوش الأنا أظهر بيو وتابعت حديثها الذي رصده محرر موقع النيلين: كونو مازن يجيبني في برنامجو فدة ما سبب يخليني أتراجع عن قناعتي وأتنازل عن فكرة لأنو استضافني الحلقة مقطوع منها كتير الناس ديل فتحو عربيتي دي عربية بت أنت عارف ممكن تلقى فيها شنو الناس ديل جرحوني بالكلبشات في يدي طيب إذا مصر على النوع ده من الهزار أضبط حبكتك بدون ما تأذيني بدون ما تتعدى ع خصوصيتي بعيدا عن ده كلو الناس التقول قبلت أذيع لي البرنامج أنا وافقت ع إذاعة الحلقة بشرط يجيبو كلامي كامل و هم وعدوا بكدة ومع ذلك الحلقة ما نزلت كاملة اتخذت القرار ده و كان يبدوا لي الأصوب تحت الضغط داك لأنو ببساطة لو زول صورني طالعة البوكس و مكلبشة و نزلت في السوشال ميديا مع اَي تهمة مافي زول من العاتبوني حيقدر يدافع عني ولأنو ده رايي و أنا ما خجلانة منو وفي ختام تدوينتها شكرت وئام الجميع وقالت: شكرًا لكل الناس الاتفهمت موقفي و الوقفت معاي واحترمت رأيي كسرة ؛ الناس البتقول إني وافقت عشان يدوني قروش ما شلت ولا قرش ولا ممكن ياخ”. محمد عثمان _ الخرطوم
