داول عدد من روّاد التواصل الإجتماعي بإعجاب مقال للمدونة “آلاء جمال الدين” صورت فيه الواقع الحقيقي في السودان والمفارقات، طالبة من المغتربيين بعدم إنخداعهم بما يُنشر بالأسافير التي تضخم من حجم كآبة حياة الناس. وكتبت “آلاء” بالدارجة تحت عنوان: الفيس بوك وتضخيم الكآبة، بحسب ما نقل محرر “كوش نيوز” وقد وجهت خطابها للسودانيين بالمهجر قائلة : تعرفوا ليه المغتربين تعبانين نفسياً ؟ تعرفوا ليه نحن في الفيس مناضلين ؟ تعرفوا ليه لما ادخل الفيس بفكر في الانتحار ؟ ببساطة لانو الفيس بديك جرعة زيادة من الواقع ، لو زول ماقعد في السودان وشاف الفيس السوداني، بقول هم عايشين ؟؟! حقيقي، البجي هنا ويمر بالصالات ، المنتزهات ، الاعراس، ملاعب الخماسيات، جنبات الشيشة ، ستات الشاي، شارع النيل، المولات، بقوم يقول ياربي في شنو ديل مش ناس الفيس ؟ ولا دا شعب تاني ؟ انا لي فترة ماطلعت ومعتمدة علي الفيس الليلة طلعت ولقيت الشارع ملان ، الصالات الخماسيات الجبنات ستات الشاي .. الخ ،،، وعليه بالنسبة للناس البره السودان، يا اما تقفل فيسك وتهيص وتستمتع بي غربتك للرمق الاخير، ولا تحظر من طرف، كلنا كذابين انا ذاتي كذابة، جيت من صف العيش نشطت قيقا للشهر وفتحت المكيف وشغلت سماعتي الاصلية وبسمع في بت عجاج، بكرة معزومة حفلة في صالة حاقشر وامشي، يلا البحلل ليك الواقع دا كذاب المحلل الاقتصادي كذاب ياخ لما اقرا تحليلات المستقبل بقول القيامة بكرة والوضع دا جوع، القى ليك الناس دي هايصة ! اي نعم الوضع مزري، الوضع بطال، الوضع صعب، بس ابداً ماوقف الناس من شىء ، وابداً مابشبه الزخم الفيسبوكي دا انا بالنسبة لي حا أنسى اي شي وابدا استمتع ، في الصف حاقرا لي مقال حلو، اسمع، اكتب، ياخ حاحفظ لي 10 كلمات انجليزي، كدا ما اكون طوعت الوقت لحين فرصة ؟؟؟! نصيحة مني اعملو زيي وتعالو نبطل الطلس والفارغة وضياع الزمن والتباكي الكاذب والنفاق ، ودي مابلد ثورات، وماشعب ثورات ، وما امخاخ تدير بلد بعد ثورة، وماعقول تقدر تقود حراك، نحن ناس ساي، اي زول يشتغل في روحو ويأهلها، شئنا ام ابينا نحن كعبين، لو سألتك عندك كم لغة تقول شنو، الحكومة مجرمة ، الحكومة دي كوم براهو من الاجرام، لكن نحن اكعب وازفت. يا الناس المغتربين، الناس ديل حاليا رابنها في الجنبات، عايز تساعد رسل عقودات لي ناسك البهموك، والا عيش حياتك يا اخوي، هنا الامور باسطة.
