أسمح لي عزيزي القارئ ألا أبارح محطة الإعلان الكارثة لأعقب في هذا المقال عما صرحت به وزيرة تنمية الموارد البشرية إشراقة سيد محمود في مؤتمرها الصحفي الذي عقدته بعد أن (وقع الفاس في الراس) في محاولة منها للقول بأن (الإعلان ده لا شفتو ولا بعرفو) إذ إتهمت مدير الشؤون المالية والإدارية والوكيل المقال وأربعة من أعضاء النقابة الفرعية، اتهمتهم بالوقوف وراء إعلان الوظائف النسائية المثير للجدل العبدلله لم يكن يتوقع من الوزيرة أن (تتلزم ووتتحزم) وتقول ده غلطي وأنا المسئولة عنو .. لانو نحنا خلال 24 سنة (ثانوية عامة) مفيش حد من المسئولين الذين على قمة المسئولية سمعناهو قال الغلط ده مسئوليتي وذلك على الرغم من الكوارث والنوازل والخطوب والعطوب والجيوب ! حتى الشريف ود بدر والذي كان على قمة سودانير وقت أن بيع خط هيثرو قال في إفادته المشهورة أنه غير مسئول عن ضياع الخط وما (عارف) عنو حاجةً !! وهكذا يصبح شعارنا (الحضاري) في هذه الحقبة المتوضئة هو (المسئول غير مسئول) !! لأن المسئول غير مسئول دعونا نتجاوز مسألة إعلان (تصدير الإناث) المقزز لندلف إلى كارثة أكبر فجرتها السيده الوزيرة بدم بارد إذ صرحت قائلة (إن نتيجة التحقيق مع مدير الشؤون المالية والإدارية بالوزارة كشفت أنه لا علاقة له بالخدمة المدنية وأنه قام بتزوير خطاب انتداب وحصل على ترقيات في ظل غياب دور ديوان شؤون الخدمة حتى بلغ الدرجة الثانية وأنه يصرف لنفسه حافزاً شهرياً من أموال الوزارة يبلغ (26) ألف جنيه غير الرواتب والمخصصات الأخرى، إلى جانب مخالفات فساد مالي وإداري بلغت 14 مخالفة.!! ) !! عليكم الله جنس الكلام ده حصل قابلكم ؟ أو ممكن يحصل في أي مكان في العالم؟ ووين ؟ في الوزارة التي يتبع لها ديوان شؤون الخدمة (يعني ديوان الست الوزيرة القالت إنو غائب) والذي من مهامه إعداد البيانات والمعلومات والإحصاءات الخاصة بجميع العاملين والاحتفاظ بسجلات خدمة تجتوي على بيانات ومعلومات كل العاملين بالخدمة المدنية القومية .. !! لا وأيه السيدة الوزيرة مناط بديوان شئون الخدمة التابع لوزارتها مراقبة تطبيق سياسات ونظم وقوانين ولوائح وإجراءات الخدمة المدنية القومية على المستوى القومي .. (يقوم يتعين فيها زول بخطاب مزور) !!. طيب فين اللوائح التي تنظم الإعارة أو الإنتداب ؟ زول لا علاقة له بالخدمة المدنية يعني إسمو ما موجود في أي حته حكومية .. يعني جاي من الشارع .. يقوم يزور خطاب إنتداب .. طوالي تقولو ليهو إتفضل ده مكتبك؟ أين المشارورات والتصديقات والمكاتبات التي تسبق قرار الإعارة أو الإنتداب بين الجهة التي أعارته وبين الوزارة؟ (لاحظ إنو الوظيفة من الوظائف العليا يعني ما كشا مشا) .. طيب مدير شئون الموظفين بالوزارة ما طالب الجهة الأعارتو بالملف بتاعو؟ وإذا ما جاب (خلو طرف) من الجهة الكان فيها طيب إشتغل إزاي؟ خلونا من ده كوووولو، الزول ده صرف مرتبو(كيفن) وعلى أي أساس وإسمو مش موجود عند الحكومة ومش عندو شهادة آخر صرفيه؟ لا ومش كده قال أيه .. إترقي كم ترقية ووصل (المجموعة التانية) طيب الترقية دي بيختوها ليهو وين؟ بيلصقوها في باب المكتب ولا بيختوها ليهو في ملفو (الما موجود) ؟ والمصيبة كما صرحت الست الوزيرة بإنو (فضل ليهو سنتين) ويترقى (وكيل) .. وكيل وزاااارة يا حضرات القضاة والمستشارين ... وكيل وزااااارة معندووووش (ملف) ! كسرة : وديني الحوادث يا ولد !! أسئلة الجمهور : 1- الزول ده صرف أول مرتب ليهو كيف؟ 2- الزول ده إترقى كيف؟ 3- الزول ده ليه ما إنكشف طوالى؟ 4- هل يمكن لإبليس أن يقوم بالعملية دي؟ 5- الوزيرة كانت ساكته ليه؟ الجائزة : - علبة لبن بدرة مشع - فرخة من الفراخ (المحمية من فوق) - زيارة لقبر (المرحوم هيثرو) - مقطع جلابية من (الأقطان) - شوال (تقاوي) - برميل (مبيدات) - كرتونة (أدوية) - فرصة (للحج والعمرة) ولو ده كوووووولو ما عجبك خلاس أسكت (وخليها مستورة) !! كسرة ثابتة (قديمة) : أخبار ملف خط هيثرو العند النائب العام شنو(وووو وووو وووو وووو)؟ كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو؟ [email protected]
