هل هنالك جهة تدرس وتحلل ظاهرة هجرة الكفاءآت السودانية لخارج البلد؟ ومدي تأثير هذه الهجرة على مستوي الأداء المحلي في كافة المهن والقطاعات ؟ العبد لله لا يظن ذلك ويعتقد ان المسالة (عايره ساااكت) ولا رقيب عليها ومن الممكن ان نلتفت يوماً فلا نجد طبيبا أو مهندسا او صيدليا أو أستاذا جامعيا واحدا . وعلى الرغم من إنو القصة واااضحة وما عاوزة ليها دليل لكن تعالوا معي لنرى مشهداً من مشاهد (محاولات المخارجة) هذه . قبل شهر او اقل طرحت إحدى وكالات العمل فرص للتقديم لوظائف في وزارة الصحه السعوديه وذلك لحاملي درجه البكلاريوس ومافوقها في علم الصيدلة ولأن الغرقان قالو بتعلق بالقشه والناس كووووولها عاوزة تتخارج من بلد (المشروع الحضاري) فقد قام عدد لا يستهان به بالتقديم .. جرت المعاينات يوم 24 من الشهر الجاري .. ولأنو عدد المتقدمين كبير قرر المسؤولون عن التقديم عمل إمتحان للتصفية والذي تم عقده بمعرض الخرطوم الدولي الصلاه رقم (2) .. طيب ايه اللي حصل؟ الحصل بيدي الزول إحساس إنو مافيش زول عاوز يقعد في البلد دي .. المنظر محير بالفعل .. وما ممكن زول يتخيلو .. حوالى الف وستميه صيدلي من الجنسين ومن جميع الاعمار ومن القطاعين العام والخاص .. ناس حمله بكالريوس وناس حملة ماجستير وناس خبرات شغالين بالسنين .. قيامة قايمة .. أخواننا السعوديين اتخلعو ...وناس الوكالات يتجاروا يمين وشمال لانو شكلو كده العدد فاق كل تصوراتهم وتقديراتهم . .الكراسي ماكفت الناس الجات متاخره وما عرفت تعمل شمو؟ ... .. الناس المنظمين للقصة إتفاجأوا (بالأمة دي) وما عرفوا يتصرفوا كيف؟ وكل مرة يقيفوا قدام المايكرفون ويقولوا كلام : - يا جماعة الاولويه لناس الماجستير والبنقصح نتموا من ناس البكالريوس (وبعد شوية) : - يا جماعة امتحان ناس الماجستير براه يقعدوا بي جاي وناس البكالريوس براهم يقعدو بي جاي وهنا من جديد اختلط الحابل بالنابل وبينما الناس بتنقل في كراسيها وتفرز في عيشتها يجيهم صوت تاااني - يا جماعة خلاس خلاس الامتحان واحد بس ناس الماجستير يكتبو ماجستير علي الورقه ..!! وبعد كل هذه الفوضى والتخبط تم الإمتحان (الجماعي) وخرج الجميع وكل زول حاضن (موبايلو) ومنتظر أن يتم إستدعائه للمعاينات والحصل أنو تم إستدعاء 36 صيدلي من حملة الماجستير وخبره اقلها سنتين دخل منهم اتنين للمعيانات. ..المؤسف انو المرتب القدموهو ( كلو علي بعضو) اربعه الف ونص ريال سعودي وهو مرتب حسب علمي ضئيل (يا ربي يكون شافوا العدد كبير طمعوا؟) وبالطبع اللوم لا يقع أخواننا السعوديين ولا أصحاب الوكالات لأنو ده (شغل تجاري) ولكن ما حدث يوضح إلى أي مدي وصلت بنا الحالة المزرية ولأي مدي أصبحت البلد (طاردة) والكل عاوز يتخارج منها . والله شئ حزين ومؤسف هجرة الكفاءآت للخارج بهذا الكم ولو المسألة دي إستمرت كده ح نلتفت يوم نلاقى البلد خرابة ينعق فيها البوم و(الجماعة) بس .. كسرة : الما بخلي الناس تفكر تتخارج شنو؟ تحويل مواقف المواصلات براهو كره الناس العيشة خليك من الباقي ؟ كسرة ثابتة (قديمة) : أخبار ملف خط هيثرو العند النائب العام شنو(وووو وووو وووو وووو)+(و)+(و)+(و) كسرة ثابتة (جديدة) : أخبار تنفيذ توجيهات السيد الرئيس بخصوص ملف خط هيثرو شنو(و)+(و)+(و)؟
