بسم الله الرحمن الرحيم ونسة حرامية (9) ( دعوي قضائية) الفصل الثالث المشهد التاسع والأخير الزمان : : نفس اليوم المكان : قهوة طرطش ( ساحة قهوة طرطش تتحول إلي تجمع رمزي لكافة أبناء الشعب رجالا ونساءا وأطفالا فنراهم يختلطون ببعضهم ويروحون جيئة وذهابا ، بين الإتجاهات الجغرافية الأربع ، في توادد وإنسجام ظاهرين، ، بينما الشيخ بصحبة اللصين ، يجلسون في المنتصف ، يتابعون هذا المنظر الفريد بانشراح ظاهر. مجموعة المسؤولين الجدد لا زالت خارج الخشبة تتابع هذا الحدث بإندهاش). مسؤول 2: ( لزملائه ) إنتو الرجع الناس ديل مع بعضهم تاني شنو؟!. مسؤول1: ( لزميله) يا خوي ديل شكلهم كدا صحصحو....وعرفو أنو نحنا السبب في المصايب دي كلها. مسؤول3: الخوفة.. تقوم تركب في راسم تاني ويمرقو الشارع!!. مسؤول5: ( بقلق واضح) الله يستر..... شكلنا كدا ما حنحصل نستمتع بالاستوزار!!. مسؤول4: ( يندب ) واحسرتاه علي التمكين..خموها العجايز ... وخلو لينا الدلاقين. مسؤول3: ( لزملاءه ) بالله شوفو النحس ديا!... يعني ما تجي غير علينا وينكشف المستور؟!. مسؤول2: والعمل ؟!.... ناسنا الكبارات ديل كبو الزوغة وخلو لينا وزارات كلها مشاكل... وبلدا واقعة في الواطة وهم عارفين إنو ما حنقدر نحلها. مسؤول1: دا كان ما طبزناها كلو كلو. مسؤول5: عندي إحساس إنو ناس الرياسة ديل مقلبونا. مسؤول4: ( لزملاءه) بدون مكابرة...عليكم الله...بنفهم شنو نحنا في الوزارات اللي مسكونا ليها دي ؟. مسؤول 3: ( باستغراب واضح ) معقول!! ... يعني جيبننا نحنا عشان نصلح أخطاء كبراتنا؟!. مسؤول 1 : وبرضو حيدورونا من ورا الستارة. مسؤول4 : ديكور ياخوانا ديكور. مسؤول 2: الله يفك حيرتنا. مسؤول 5: قول الله يفك أسرنا. مسؤول3: إستعبدونا ولاد الهرمة...خلونا زي اللعبة اللي بدور بالرموت . مسؤول 4: نحنا عبيد الحركة والحزب والقبيلة. مسؤول1: ما نحنا برانا ...سجل عندك: نص الشعب برضو عبيد لأولاد الطائفية. مسؤول2: ما هو البلد بقت أصلها جيفة ونحنا الضبان. مسؤول 3: ( لزميله ) وعلي كدا يبقي أسيادنا منو؟ مسؤول 1: طراطيش الماسونية ... وشلة ضلالية...مع حبة دجالين ومشعوذين. مسؤول 5: البلد مدورة بالحيل بالطريقة ديا... وبكرة نشوف. مسؤول 4: معناها شنو يشوتو أولاد قبيلة بعينها فت مرة واحدة؟!!. مسؤول3: الظاهر غيرو القناة ... من مؤامرات سياسية لصراعات قبلية. مسؤول2: ( يسد انفه )وأنا أقول النتانة دي جايا من وين؟!. مسؤول1: عجيب!!... ده عصيان عديل..الرسول يقول : دعوها ....وديل بشتغلو بيها. مسؤول : نحنا ناقصين ياخويا ... ما كفانا قبايل الهامش. مسؤول 2: علي كده نحنا شغالين لحساب عمك طرطش؟. مسؤول3: أسي تلقاهو خالف كراعو وقاعد يسجل ويشيل منهم عوارات وحيل جديدة. مسؤول 4: نحنا العميان الصم. مسؤول1: نحنا خدام من يدفع أكثر. مسؤول2: من بره .... الله الله. مسؤول5: ومن جوه يعلم الله . مسؤول2 : ويقولو لينا إنو نحنا الحزب الرائد...رائد في شنو؟...ما عارف!!. مسؤول4 : سف سف سف. مسؤول 1: لغ لغ لغ. ( فجأة ....المجموعة تسد انوفها من رائحة غير محببة ). مسؤول3: ( لزملاءه ) تاني ...شامين الكعبة الريحة دي؟ مسؤول1: ( مسؤول2) وشايفنها كمان!.... ما نحنا كل ما بنعمل أي حاجة كعبة ...تطلع لينا ريحتا. مسؤول4: ( يعترض علي زميليه ) المفروض إنو نعمل نايمين ....عشان أمورنا تمشي وتسلك. مسؤول 5: كان ما الخوفة الركبانة دي؟ مسؤول 3: يقومو يركبونا طيارة من إياها . مسؤول1: والا يلعبو لينا في اللساتك. مسؤول 2: واللا فرامل العربية. مسؤول4: ديل كان رحمونا ساكت بدخلونا بيت الأشباح الحزبي وتاني اهلنا ما يلمو فينا. مسؤول 3: كان غلبك سدها ووسع قدها . مسؤول1: ( لمسؤول5 ) الإخو تعيين قبلي والا حزبي... والا قرابة ساكت؟ مسؤول5: ( يرد) كفاءة وحاتك.... تفاني في الإخلاص الحزبي. مسؤول4: الحكومة دي عويرة عوارة!!..... لملمت ليهم صعاليك قبيلتنا ومشينا بايعنا الريس .... وبعداك عينوني وزير. مسؤول2: أما أنا ...فقعدت أشتغل ليهم إستوبر واعكلت في كل إجتماعات الحزب... الظاهر زهقو مني .... ودوني أبو كرشوتة تبع الدفاع الحزبي...ضربت لي طلقتين في الهوا وجيت راجع .... قام عينوني وزير. مسؤول1 : ما بطول عليكم ....صلة قرابة كده من بعيد مع الريس ولقيت نفسي معاكم. مسؤول3: المرة دي حقو نثبت شوية وما نخرخر ونقوم نقوعر زي زميلنا الفضيحة داك. مسؤول4 : هم مش دايرنا نتبع أمر كل جبار عنيد ؟..... جدا هو نحنا الخسرانين. المجموعة : ( بصوت واحد منخفض ومرتعش) ما تخفش يا ريس...السر في بير. المجموعة تمسك بحناجرها وترفع عصيها وتهتف بصعوبة وبلا صوت ). مسؤول 5: ( يشير الي الحشود في القهوة) لا شأن لنا بهذا الشعب المنكود. مسؤول4: هم عمال سخرة. مسؤول1: ( ينادي باعلي صوته في الاتجاه الآخر) أيها الأغراب الهائمون بغير هدي...هلم إلينا فبلدنا مباح ومستباح وقد تجاوزنا حد اللمم ألي ورود المرود في المكحل.. مسؤول5:فالتأتونا بأمراضكم وعللكم وخستكم ولتحبطوا بها هذه الرعية. مسؤول3: ولتنعموا بجنسيتنا طالما نحن في سدة الحكم وتكونوا أذرعنا التي تبطش كل من يخرج عن سلطاننا. مسؤول4: فقط قولوا كما نقول : نحن للدين فداء ( من وسط الحشد المتواجد بساحة القهوة تخرج فتاة صغيرة بصحبة طفل أصغر منها ويتقدما ناحية مجموعة المسؤولين ) الطفلة : ( وهي ترمي أمامهم بعبوة فارغة من الغاز المسيل للدموع).. هاكم ..... أمي قالت ليكم ما عافين منكم. الطفل : (يلقي أيضا بظروف طلقات فارغة ) ..... أخوي .... محمد كتلتو في المظاهرة وبت جيرانا إدردقت في دمها جنبو... بكرة لمن أروح المدرسة بشتكيكو لأستاذ التاريخ حقنا . مسؤول3: ( للطفل) إجري ياود بلا غلبة ( للطفلة) وإنتي ياالشافعة اللميضة.... قولي لأمك .... البنبان والرصاص ديا عندنا منو بالكوم...كدا أنتو أمرقو لينا تاني كان ما جبنا خبركو!. ( يسمع صوت تذمر وهمهمة واضحة وسط الحشد . يتقدم الشيخ ليخاطب مجموعة المسؤولين ) الشيخ : كدا بالراحة يا اولادي. مسؤول 5: ( بعجرفة) نحنا ما أولادك..نحنا ناس مسؤولين في البلد ولازم تحترمونا وتهابونا. اللص الأول : ( يتقدم من وسط الجمع ) نحترم منو يا رياسة... إذا كان إتو ما إحترمتو الشعب ذاتو؟.... عجرفة وإستفزاز وكمان معاها زفارة لسان. اللص الثاني : ( يتقدم ايضا )... ولا حتي حبة تواضع؟!. اللص الأول : ولا حتة شفافية؟!. اللص الثاني : ( لزميله متهكما ) هو في زول فاضي يسمع ليك يا عمك ...الشفافية عندهم ....بقت لا مؤاخذة في قمصان النوم بس. اللص الأول : ( لزميله ) يا خوي .....كت وين من زمان ... شابكنا مشروع حضاري وما عارف نهضة شنو وفي النهاية يطلع شغلكو كلو همبتة وهجيص ساي... واسي جاي ...تقلب لينا ف اللحاف وترقد لينا أحمد محل حاج أحمد؟ . اللص الثاني : نحنا بالطريقة دي قصتنا ما حتنتهي!!. اللص الاول: الدولة هي الوطن. اللص الثاني:والوطن هو الشعب. اللص الأول: والشعب بحب العدل. اللص الثاني:والعدل أساس الملك. اللص الأول : وبما إنو مافي عدل.... يبقي مافي ملك . اللص الثاني : وكان مافي حرية ... يبقي مافي حكم . اللص الأول : وكان كل حزب سوي في الهبالة دي... اللص الثاني : يبقي أخير حكم العسكر...النضاف النقاض. اللص الأول : الصاح ....الرأي رأينا والشورة شورتنا. الشيخ : الشوري ما عند الحزب براه... الشوري عند الشعب. اللص الثاني : (يهتف) فالتسقط كل الأبواب المغلقة . اللص الاول : ( يهتف ) ولتسقط كل الأحزاب المنهكة. اللص الثاني : ( يهتف ) وليسقط حكم الحرامية. اللص الأول: ( لزميله) تذكر لما لقيت شيخ الحرامية بتاعنا... ؟ يوماتا قلت ليهو في وشو عديل كده: ياريس ... إت حرامي ، ومرتك حرامية وإخوانك كلهم حرامية... وهاك الأدلة . اللص الثاني: ( يضحك) آي ... بذكر .... حتي بالأمارة جدع الأوراق في وشك وقال ليك : وفيها شنو؟ يعني ماجات الإ علي مرتي وإخواني ؟.... ما البلد كلها حرامية!!. اللص الأول : ( يكمل ) وحاتك ما سكت ليهو... لميت الورق وقلت ليه : الورق ديا برجاك لمن تترجل ، هم مرتك وإخوانك ... كان قعدو في بيتم بغنو ؟... والا إغتنوا من ضهرك؟.... وبرضو لحقنهم. الشيخ : عليك الله ما بخجلو....ديل في حكم الشرع الجد...بكونومقطعي الأوصال.... كان ما إعدام رميا بالقصاص. اللص الأول : ياللا يا لفالح..... طبق لينا الشريعة اللي قاعد تنبح بيها لمن حلقك طرشق. اللص الثاني : الشريعة ما فرضت منظرة ساكت ...قولوها بالواضح كده: يا تمشونا بالشريعة....يتمشونا بحقوق الإنسان. اللص الأول : الفرض الشريعة هو الخلق الإنسان.... إنتهي. اللص الثاني : في فرق بين قول الرجال ولعب العيال. الشيخ : يا أولادي... ما رحمة ربنا واسعة برضو.. والحرامي ممكن يتوب. اللص الأول : والله كان تاب بطريقتو... دي حاجة بينو وبين ربو ... أما التوبة اللي بنعرفا ..إنو يرجع القروش اللي لغفا...ويتحاكم علي عمايلو. اللص الثاني : ياشيخنا البلد قربت تقع كان ما وقعت خلاص والناس ديل مصرين يكنكشو في الكراسي وما في طريقة تصلح الا يفوتو الحرامية. الشيخ : وإتو قايلين اللي بره ، واللا حتي اللي جوه حيصلحو ليكم حاجة؟!... كلهم طينة واحدة ...لاعبين برضو علي الكراسي . ( المجموعة المحتشدة في وسط القهوة تهتف ) الشعب يريد إسقاط النظام ....... الشعب يريد إسقاط النظام. مسؤول2: ( يهدئ الحشد ) يا خوانا روقو شوية .... الكلام ده ما كلامكم...ده كلام معارضة. مسؤول5: والمعارضة دايرة السلطة. مسؤول3: وكان إنهار النظام البلد دي ما بتضيع ساكت. رجل من الحشد : البلد ضاعت وإنتهت. إمرأة من الحشد: حالات البلد زمان ... بناسا بخيرا ...إتو اضيعتوها. الشيخ : ( بصوت عال) لا .... نفوسنا الكعبة وطمعنا هو اضيعا . الحشد : (بصوت واحد) العدل وينو يا ريس .... الدين ما شرحو كويس. لا عمرك كضبت علينا.... ولا عمرك سمعت كلامنا... العدل وينو ياريس؟. من يوم ما جيت بالدبابة ..... ونحنا مسكانا الكترابة العدل وينو ياريس؟. حسناتك عند الضعفا..... أصفار.... جريها حمار. العدل وينو ياريس؟ . مسؤول4: ( للحشد ) لا مؤاخذة ..... طمع الدنيا نسانا العدل. رجل من الحشد : ( لمجموعة المسؤولين ) من عمايلكو...إتعلمنا كل الكعوبية. رجل ثان : بدل ما تعلمونا البر والتقوي ...علموتنا الحقد والحسد. رجل ثالث : أكلنا وشرابنا إتلوث بالحرام ...وكلو بسببكم. إمرأة ثانية : ولايداتنا طاشين ساي... ما عارفين ماشين لوين!!. رجل رابع : مرضوتونا بكل الأمراض اللي في الدنيا..... وحتي الدوا بقيتو تبيعو لينا بيع!!. الحشد : ( بصوت واحد ) نحنا الشعب المكلوم...... نحنا الشعب المعيون. نحنا الشعب المغدور..... نحنا الشعب الكرور. مسؤول1: ما تجو نعمل مصالحة شاملة ؟. الحشد : ( النساء بصوت واحد) كان منكم.... بري بري بري . مسؤول3 : طيب رأيكم شنو في حوار وصلح وتآخي؟. الحسد : ( الرجال بصوت واحد) كان منكم.... الله علي الكضاب والمفتري. مسؤول4 : رأيكم شنو في الينابيع الصافية...كان رجعنا للمودة والتلاقي؟. الحشد : ( بصوت واحد) قديمة .... فالمال عند لصوص ... والحكم عند جبان...مرضتونا .... جوعتونا ..... شردتونا .... جهلتونا ... جهجتونا. الشيخ : ( للحشد) يا خوانا .... إستهدوا بالله .... هو العالم بخائنة الأعين وما تخفي الصدور..... مافي حل غير إنو نغير نفسنا أول. الحشد : بصوت واحد) كيف يا شيخنا ؟!. الشيخ : الله الشافي ( الشيخ يطلب منهم تنظيف المكان وتهيئته ، فنراهم يزيحون مقاعد وطولات القهوة ويزيلون كل ما بها ، ثم ينزلون يافطة المعلم طرطش ويعلقون مكانها يافطة مكتوب عليها ( السودان) . احدهم ينزل الخريطة المشوهة ويعلق الخريطة القديمة المعروفة . النساء يرششن الماء حول المكان وينظفنه. الشيخ يجمع الحشد في شكل حلقة ويبدأ في جلسة علاج جماعي بالرقية الشرعية فنري الحشد يدخل في هستريا ، فمنهم من يتقلب علي الأرض كالممسوس ومنهم من يسقط من الصرع. مجموعة المسؤولين تراقب المشهد وقد ظهر عليها الفزع، إذ يبدو أن الجلسة قد اثرت عليهم أيضا ، فنراهم يفرون مذعوررين . الصراخ والأنين يعلو وسط الحشد لسماع آيات الرقية. الظلام يخيم علي المكان بشكل تدريجي مع تزامن خبو أصوات الحشد حتي يلف المكان ظلام دامس . بعد قليل تعود الإضاءة ، فنري نفس المكان وقد تحول إلي ساحة محكمة خاوية. وراء منصة القضاء نري لافتة كبيرة مكتوب عليها : العدل اساس الملك. (يسمع صوت رخيم من الخارج): قال تعالي ، بسم الله الرحمن الرحيم " إِنَّ اللّهَ يَأْمُرُكُمْ أَن تُؤدُّواْ الأَمَانَاتِ إِلَى أَهْلِهَا وَإِذَا حَكَمْتُم بَيْنَ النَّاسِ أَن تَحْكُمُواْ بِالْعَدْلِ إِنَّ اللّهَ نِعِمَّا يَعِظُكُم بِهِ إِنَّ اللّهَ كَانَ سَمِيعاً بَصِيراً". بعد النظر في القضية المرفوعة من جموع الشعب ضد رئيس الجمهوريه وكل قادة حزبه وحكومته بشأن التهم المنسوبة اليهم وهي : 1- الإستيلاء علي السلطة وحكم البلاد دون وجه حق. 2- تقويض أركان الدولة. 3- تبديد أموال الشعب. 4- إثارة الفتن بين الناس. 5- إشاعة الفحشاء والمنكر والبغي في البلاد. عليه ، يستدعي رئيس الجمهورية وكل قادة حزبه وحكومته أمام هذه المحكمة لسؤالهم عن كل ما نسب إليهم. **** ( إنتهي ) الدمازين في :13/12/2013م. محمد عبد المجيد امين ( عمر براق) [email protected]
