قبل أكثر من 2500 عاماً إستدعى الفيلسوف الصيني (كونفوشيوس ) أحد تلامذته الذي قضى معه سنين طويلة ينهل من علمه إستدعاه ليعرف إن كان قد إستفاد من حكمته أم لا ، ولما وقف التلميذ بين يديه قام بسؤاله : - قل لي ماذا تفعل إذا ضربك أحداً بيده - أشكره - لماذا؟ - لأنه لم يضربني بعصا - وإن ضربك بعصا؟ - أشكره .. لأنه لم يضربني بسيف - وإن ضربك بسيف؟ - أشكره لأنه لم يقتلني ..(وهنا أدرك الحكيم أن الشاب قد تعلم) لا أعتقد أننا كشعب نعرف (كونفوشيوس) جيداً (هو أنحنا فاضين) ، لكن يبدو أننا لحكمة يعلمها الله نسير على ذات النهج (الكونفوشيوسي) لدرجة أن العبدلله بدأ يشك في أن لهذا الكونفوشيوس) جذور سودانية فكل الأشياء عندنا جميلة وعال العال طالما (كان من الممكن) أن يحدث أسوأ منها مما جعلنا كأمة نسجل أدني معدلات النهضة والرقي نسبة لتعامينا عن قصد عما يحدث لنا واضعين حيزاً (معتبراً) لفعل أسوأ (لم يحدث) واهمين أنفسنا بأنه كان من الممكن حدوثه (بس جات سليمة) ! مما يعزز هذا المنحى تلك الأقوال والأمثال المهببة التي قامت بتأطير هذه المسألة كذلك المثل الذي يقول ( الجاتك في مالك سامحتك) والمثل الآخر بتاع (قدر أخف من قدر) والحاجات الزي دي ! حتي صار تأثير تلك المقولات على حياتنا وسلوكنا واضحاً وما عايز ليهو دليل وهاكم الأمثلة دي : (1) – بالله معقول البنزين ده يكون غالي كده ونحنا بنصدرو؟ - ياخي أحمد الله إنو أهو متوفر وموجود! (2) - عليك الله دي حالة؟ الماهية تخلص من يوم 5 في الشهر؟ - مش كويس الهو في ماهية من أساسو ؟ (3) - معقولة بس تنغلبو 2 /صفر؟ - مش الكويس الما أدونا ستة ؟ (4) - ما مشيت لي عباس قالوا وقع كسر إيدو وراسو إتظلط؟ - جات سليمة الحمدلله الما كسر (حوضو) ومخروقتو ما جاتا حاجة (5) - أها والحرامي سرق منكم شنو يا سعاد؟ - والله ما خلى لينا حاجة .. لقط الملايات والمفارش والتياب وهدوم الأولاد والتلفزيون والرسيفر وكل الموبايلات الفي البيت - والدهب نعل ما شالو؟ - ما خلا ليا إلا الغويشة اللابساها في إيدي دي - أحمدي الله الما شالا هي كمان ! (6) - والحفلات عندكم بتنتهي الساعة كم؟ - والله محددنها لينا تنتهي السلعة حداشر - جميل والله كان ممكن يقولو ليكم الساعة تسعة (7) - والورم الفي بطنك طلع من شنو؟ - تتخيل اتضح انو الدكتور نسى ليهو شاش في بطني؟ - ياخي جات سليمة كان ممكن ينسى الموبايل بتاعو (8) - وان شاء الله تكون يا عمران عرستا؟ والله لسه يا حمزة أحسن ليكا هسه تجيب ليكا مرا تسل روحك (9) تتصور قالوا في شركات حكومية رايحة وما لاقنها والمراجع العام عاوز يراجعا لكن ما عارفين ليها عنوان؟ ياخي مش برضو كويس انو في شركات لقوها وعارفين العناوين بتاعتا؟ (10) - الوالد أن شاء الله خرجتوهو من المستشفى؟ - تعيش إنتا الوالد اتوفى اول امبارح - والله أحسن ليهو من الحياة النكد دي (11) - بالله شوف (الجنوب) إنفصل ! - مش كويس إنو (دارفور) قاعدة ما إنفصلت (12) - ودكتور العيون قال ليك شنو؟ - قال ليا عندك مويه بيضاء في العين الشمال - مش كويس إنو اليمين ما فيهاااااا كسرة : بينما كان العبدلله يقوم بكتابة هذا المقال على اللابتوب نسبة لإنقطاع الكهرباء (من صباح الرحمن) إذا بالكهرباء تجئ فتهتف حرمه المصون قائلة : - الحمدلله الكهرباء جات .. والله كان ممكن لحدت بكرة ما يجيبوها ! - كسرة ثابتة (قديمة) : - أخبار ملف خط هيثرو العند النائب العام شنو(وووو وووو وووو وووو وووو وووو)+و+و+و؟ - - كسرة ثابتة (جديدة) : - أخبار تنفيذ توجيهات السيد الرئيس بخصوص ملف خط هيثرو شنو(وووو وووو)+و+و+و؟
