أتاريك يا الحِمشْ تِتقدل تَناطح الدنيا جوة الدارْ تهين في شعبك المغلوب وتشعل كل يوم في النارْ تبيع أرضك تبيع شعبك تطأطيء الرأس تخاف الجارْ رجالتك برة سويها كان تقدر ونطِط ْ زيْ جِنيْ الفارْ حليل زمن الأُسود الحكموا بالعزة وما جابوا لينا العارْ ================== عِرفناكَ وعرفنا كمان مَكنكشْ في الحكم بالخوفْ تَذوِر فاكر مخلدْ فيها تكضِب تستر حالك المكشوفْ زمانك ولىَ من أصلوُ وخراب من يومو كان مَعروفْ خلاص والله حُكمك ضَاع وكل القصة باقية كُسوفْ سنين بالخيبة إتوالتْ ومِن تالانا حارقة الجوفْ ================== جنود دعمك وطيرانك أقتل بيهم ولاد العازة طهِر ناسا وأرضنا المسروقة سَاوِم بيها أمانْ عرشك وشُلة النخاسة يمين الله تندم بكرة وتقول يا ريت يوم ما طلبت رئاسة يمين الله تندم بكرة وتشحدْ الوضعوكَ إنفرادي حراسة وسيرتك تبقى في التاريخ سبب نكبة وبلاوي تعاسة ================= عرفناكَ بس ساكتين عشان حُكم الله بنهي عُروشْ أريتا الدنيا تمشي معاك تزين حالك تزيدو قروش أبنيِ إتملكْ الدنيا وبدل كافوري عَمرْ وأورث كوش ولهان وما داري بالحولك ومظاليمك يوماتي تهدي نعوش وطبع الدنيا غدارة وبكرة بتبقى وحيد يا الديمة مغشوش ================= زمان أجدادنا بالحكمة قالولنا سَوايْ الهِمة ما نضام ما ترجوا زول نضميِ هضرابْ بالحيل سِعايتو كلام زولاً كل الفضول شايلو يساسق في الدروب حوام راكب والعوجة متردفاهُ محل ما يميل بالصدود متلام حليل العازة يا المحجوب وحليل زمنا كنت أسد حكام ....أبوناجي.... [email protected]