ريحة ترابك يابلد وطيبة بناتك والولد ونشوة كرامتك من زمان فياضه خير ماليهو حد ونسمة دعاشك في الخريف حرياتك القلاية صيف وعزيف نخيلك في الشتاء حاجات تشهي الزول صباه روحو المفارقة لطين هواه عمرو المباع في المنفي بنص الامل قسموك صح مقهورة صاح لكنك اشهي من الصباح رفعة اذانك في الفجر وتركيز شيوخك في القنوت قهوة رجالك في الضحي قدح الدواوين البجر الضحوي البصنقع بالدموع وسرعان يهامي غمام غمام ينزل عليك سلام سلام مبسوطة والشفع قبيل نادوها بقلبا نضيف: يامطيره صبي لينا ما بتخلف النداء والوعد تسقي البلود لامن تفيض والخضره باكر يوم تقوم تحلف تفرش روحا ليك مبلولة بالنداء والسماح بسامه واللهو المباح بلدا بذورا اتوزعت نبتت قيم قامت كرامة وعز شموخ رجعولا شوقن في القلوب رجعولا ايديهم نضاف ماك البلاد البهجروك ماسمعو اولادك نصيحتك يا البلد كان حرروك كان عمروك وخضروك كان ضرضروك لكنك الام الرؤوم يات البدور يرحل في يوم بتوادعو والاسي في الحشا و دماعا بتضج في العيون ويات البقبل ليها صاد دمعاتا تسبق مرحباب هم شن لقو في الغربه في بعدك هناك ؟؟ غير لفحة الشقا والعذاب وهم شن قعادهم في الخلا الفسل الوحيح؟؟ سموه بالكضب اغتراب زرعو ورعو وكتبو ووعو وحسبو وتفانو تفننو خبراء ودكاترة وفنيين درجاتهم العلميه كوم اطفالهم البسطاء اللطاف بتضج قلوبهم وتنتشي مع فتحة الباب للمروق او ضيف يزورهم في الشهر فد مره يلقوهوه (عم، حبوبة ام يقروه خال والعمة مسبولة الجمال خالة حنينة وجد ولوف ما الهم مطوق للمجال السجن والبوابة خوف نظراتهم الممحونة ديك تفرح بجيتك وليك تحوش طلاقة اطفالنا الصغار وحرية امالنا العراض وضحكة الطفلة الضفاف وعقول تفتش ويوت تجول مغموسة في حبر الالم تنسال وتكتب للبلد: عذرا بلدنا عن العقوق عذرنا زرعنا عن الهروب عذرنا وطنا عن الغياب مهما تباعدت الخطي ياكا المئاب ما الحسرة في البعد اللطال والفات عيون امو ومرق يلقي السعادة في ياتو باب؟ ولدوك ات لا شقة لا سيارة لا اير كوندشن لافيزا لا ورقة ضمان فكرك مخالطاهو السهول والخضرة والنيل والحقول وتقسم ليالي الدنيا نص وتقوم نشييييييييط ولقيمتك المقسومه ليك بتشيلا تب من أي بيت تعليمك الفاخر دا يا من قرية نائية هناك بعييد تمشي المسافات الصباح وتقري العشيات بام طليس القيمة في لمة وأمل وعمار بلادك وطين ابوك ضحكة عيون في وجه ام وطفلا يربيه الجميع والسهله والحوش الوسيع والشلة والجو البديع ورب الخلق ما شق خشما ضيعو. كل القضية قرار كبير وبئس ذكري الهم تكون. كل الحكاية قرار كبير وبئس ذكري الهم تكون