كشف المطرب الشعبي شعبان عبد الرحيم سر الحديث التليفوني بينه وبين عمرو موسى الأمين العام السابق لجامعة الدول العربية والمرشح المحتمل لانتخابات الرئاسة. وانتقد شعبان الرئيس المخلوع محمد حسني مبارك وحمله مسئولية ما لحق بالبلاد من خراب مشيرا إلى أن الرئيسين الراحلين جمال عبد الناصر ومحمد أنور السادات كانا زعيمين وطنيين. وتحدث شعبان عبد الرحيم في حواره مع "الفن أونلاين" عن سبب تأجيل فيلمه الجديد مناخوليا وعن مشروع تحويل قصة حياته إلى عمل فني وغيرها من الأسرار فإلى تفاصيل الحوار: *ترددت كثيرا في مسألة ترشحك للرئاسة فهل حسمت الموقف؟ نصحني البعض للترشح للرئاسة وفكرت طويلاً في هذه المجازفة لأن هناك منافسين أقوياء فقررت التراجع وسأكتفي بعضوية مجلس الشعب. *ولكن ترددت الشائعات حول تراجعك لخوفك من عمرو موسى؟ "مش خوف والله ولكن حبا في الراجل ده" فهو أذكى واقدر على إدارة البلد في هذه الظروف وكانت وجهه نظري صحيحة عندما غنيت له "بحب عمرو موسى"وشهادتي هذه أثبتتها الأيام لأنه من القلائل الذين خرجوا من نظام مبارك وهم نظاف اليد. *وما سر مكالمة عمرو موسى لك ؟ "كتر خيره" فهو اتصل بي بعد أن علم بمرضى ودخولي المستشفى وقد سعدت كثيرا بهذه المكالمة إنه لسه فاكرني لدرجة أنى شعرت أن قلبي سيتوقف من الفرحة واشكره كثيرا ويا ريت كل الناس تعمل زيه. *هل هذا ما دفعك للوقوف بجانبه في حملته الانتخابية؟ طبعا "ده أقل واجب ممكن أعمله معاه "فانا أراه الأصلح في اللعبة السياسية وأشعر انه قريبا من حزم عبد الناصر وذكاء السادات وده اللى خلاني كمان أعمله أغنية جديدة مخصوص علشان ربنا يوفقه " والأغنية بتقول "بحب عمرو موسى عشان راجل أصيل وقايلها زمان في غنوة أنا بكره إسرائيل لو شفت عمرو موسى هتحس إنه أخوك أو صاحبك أو زميلك أو عمك أو أبوك بحب عمرو موسى الطيب الحسيس وان شاء الله هينجح وهو ده الرئيس". ولكن البرادعي مرشح منافس قوي لعمرو موسى؟ البرادعي ده أنا ما أعرفوش ولا أعرف أي حاجة عنه خالص علشان طول عمره عايش بره ومش موجود في وسطنا يعنى الراجل ده مش عارف حاجة عن مصر ولا عن أهلها يبقى ازاي هيمشى البلد وما يعرفش عنها حاجة ولا عن همومها ومشاكلها وعلشان كده أنا غنيت أغنية مخصوص له بقوله فيها "يا برادعى ياللى مولعها كبر دماغك وسعها كفاية العراق واللى عملته دي مصر مش هتوقعها" *تحدثت كثيرا عن عبد الناصر والسادات أيهما اقرب إلى قلبك ؟ السادات هو اللى انتصر على إسرائيل ورفع راسنا فوق وعصره كان كويس وكل الناس استفادت منه وعبد الناصر كان زعيم وطني أيضا يعنى بصراحة محدش خربها غير مبارك. *وما شعورك عندما رأيت مبارك في قفص الاتهام؟ في الأول هو صعب عليا بس بصراحة مش أكتر من منظر الشهداء اللى ماتوا في الثورة ورجالة العادلى دبحوهم *وما رأيك في رجال الشرطة حاليا ؟ الشرطة هي أساس أي مجتمع "وهى اللى بتضمن أمان الناس وهما مالهومش ذنب في اللى حصل هما عبد المأمور والمفروض اللى بيشيل الليلة العادلى وأعوانه وبالمناسبة مصعبش عليا خالص العادلى وكان نفسي القاضي يحكم بإعدامه زى ما أعدم شبابنا في التحرير وبالمناسبة حبيت أصالح الشرطة وعملتلهم أغنية بتقول"كلنا بنحب الشرطة الجدعان ومن غيرها هانبقى في ورطة والأمن كمان ينهز,عرفنا يا ناس قيمتهم وعشنا في العذاب وخوفنا واترعبنا من يوم ما الأمن غاب"
